Deuteronomio 22 - Qheshwa Biblia DC

¹ Sichus mayqenniykichej rikunkichej wauqeykichejpa wakanta, chayri ovejanta chinkashajta chayqa, chay uywata qhatispa wauqeykichejman apapunkichej.

² Sichus chay uywa mana qayllaykichejpi tiyakojpatachu, nitaj pejpatachus kasqantapis yachankichejchu chayqa, chay uywata wasiykichejman qhatikapuychej dueñon rikhurimunankama. Rikhurimojtintaj qopunkichej.

³ Chaymantaqa runa wasiykichejpa burron chinkajtin, p'achan chinkajtin, iman chinkajtimpis, chaykunata tarispaqa, ajinallatataj ruwankichej. Chaykunata rikuspa amapuni mana rikojman tukunkichejchu.

⁴ Sichus mayqenniykichej rikunkichej llajta masiykichejpa wakanta, chayri burronta ñampi urmasqata chayqa, ama qhawallankichejchu, manachayqa qayllaykuspa runa masiykichejta aysaysinkichej.

⁵ Warmeqa mana qhari p'achata churakunanchu tiyan, nitaj qharipis warmi p'achata churakunanchu tiyan; kaykunata ruwajkunataqa Señor Diosniykichej millachikun.

⁶ Sichus pipis p'isqo thapata tarin ñanta rishaspa sach'api, chayri pampapi irpasniyojta, chayri runtusniyojta, mamantaj ojllashajta chayqa, ama mamantinta irpasnintinta apachunchu.

⁷ Manachayqa irpasllata apakuchun, mamantataj phawachichun. Ajinamanta chayta ruwajqa may kusisqa kanqa, unaytataj kausanqa.

⁸ Mosoj wasita mayqenniykichejpis ruwaspaqa, alto pata kajta imawampis perqata jark'achiychej, Ajinamanta qankunaqa mana juchayojchu kankichej, pipis chay patamanta urmaykuspa wañojtin.

⁹ Uvas chajraykichejmanqa ama waj mujustawan tarpunkichejchu. Jinata ruwankichej chayqa, ni uvasniykichejta, nitaj waj mujustapis mikhuyta atinkichejchu, Diospa t'aqasqan kasqanrayku.

¹⁰ Ama ujllapi wakata, burrotawan llank'achinkichejchu.

¹¹ Ama churakunkichejchu millmamanta, linomantawan ruwasqa p'achata.

¹² Pata p'achaykichejpa tawantin cantosninman flecosta churakuychej.

Ama qhenchachakunamanta

¹³ Ichapis uj runa casarasqanmantaña warminta chejniyta qallarinman.

¹⁴ Chanta, ichapis qhasillata tumpaspa paypaj parlayta qallarinman kay jinata: Casarakusqaymanta ñaupajtaña mana doncellachu kasqa, nispa.

¹⁵ Chayta uyarispaqa chay warmej tatasnin apanqanku wawanqa doncella kasqa señalninta llajtamanta kurajkunaman.

¹⁶ Chay warmej tatanqa kurajkunaman kay jinata nenqa: Noqa ususiyta kay runawan casaracherqani. Kunantaj kay runaqa payta chejnipun.

¹⁷ Wawaypajtaj qhasillata tumpaspa parlashan, kay jinatataj niwashan: Wawaykeqa mana doncellachu kasqa, nispa. Jinapis qhawaychej, kaypi kashan wawaypa señalesnin doncella kasqanmanta. Chaymanta tatasqa wawankoj casamiento p'achanta kurajkunaj ñaupaqenman mast'anqanku.

¹⁸ Chaymantataj, kurajkunaqa chay qharita presochaspa jasut'enqanku.

¹⁹ Pagachenqankutaj pachaj qolqeta, chaytataj sipaspa tatanman qonqanku, chay jinata uj israelita doncellata qhasillata tumpasqanrayku. Chay tukuywampis chay sipasqa warmillampuni kanqa, manataj chay sipasmanta t'aqakuyta atenqachu tukuy kausaynimpi.

^20-21 Sichus uj warmi cheqamantapuni mana doncellachu karqa chayqa, tatampa wasinmanta jawaman orqhospa llajtamanta runas rumiwan ch'anqaspa wañuchenqanku, chay jina millayta Israel ukhupi ruwasqanrayku, tatampa wasinta p'enqaypi rikuchisqanraykutaj. Ajinamanta qankuna ukhupi chay jina millay juchata chinkachinkichej.

²² Sichus uj qhareqa casada warmiwan puñushaspa taripachikunman chayqa, iskayninku wañuchisqas kanqanku. Ajinamanta Israel ukhupi chay jina millay juchata chinkachinkichej.

^23-24 Sichus uj doncella casarakunampaj uj qhariwan parlapayasqaña kashajtin, waj qharitaj llajtapi taripaspa paywan puñuykunman chayqa, iskayninkuta llajtamanta jawaman orqhonkichej. Chaypitaj rumiwan ch'anqaspa iskayninkuta wañuchinkichej. Chay sipasqa wañuchisqa kanqa llajta ukhupi kashaspa mana qhaparikusqanrayku. Qharitaj wañuchisqa kanqa qhari masimpa warminta honranta t'akasqanrayku. Ajinamanta qankuna ukhupi chay jina millay juchata chinkachinkichej.

²⁵ Sichus uj doncella casarakunampaj uj qhariwan parlasqaña kashajtin, waj qharitaj campopi taripaspa paywan puñuykunman chay doncella mana munashajtin chayqa, chay qharilla wañuchisqa kanqa, chay warmej honranta t'akasqanrayku.

²⁶ Sipastaqa ama imanankichejchu. Payqa mana juchayojchu wañunampaj jina. Imaynachus uj runa qhari masinta taripaspa, wañuchin, ajina kayqa.

²⁷ Chay qhareqa sipasta sapallanta campopi taripan. Pay qhaparikushajtimpis ni pi uyarinmanchu karqa payta jark'arakunampaj.

^28-29 Sichus uj qhareqa kallpanwan atipaspa kallpata ruwaspa mana parlapayasqa doncellawan puñunman, jap'ichikunmantaj chayqa, chay qhari, sipaspa tatanman phishqa chunka qolqeta qonqa honranta t'akasqanrayku. Chay sipaswampuni casarakunan tiyan. Payantataj mana t'aqakuyta atenqachu tukuy kausaynimpi.

³⁰ Ni pi qharipis tatampa warminwan puñuykonqachu, jinamanta tatanta p'enqaypi rikhurichinman.