Deuteronomio 21 - Qheshwa Biblia DC

Mana rejsisqa runa wañuchismanta

^1-2 Señor Diosniykichej jallp'ata qosunkichej, chaypi uj wañusqa runa rikhurinman, manataj yachakunmanchu pichus wañuchimpis chayqa, kurajkunawan juezkunawan jamuspa qhawanqanku, mashkha karuchus kasqanta chay ayamantapacha, chay qayllapi llajtaskama.

³ Chay aswan qayllapi kaj llajtaj kurajkunasnin apamonqanku uj china waka uñata manaraj llank'ayta yachajta, mayqenmanchus manaraj yugota churankuchu.

⁴ Chaywantaj uj yakuyojpuni mayu pampaman uraykonqanku, mayqen jallp'aspichus mana llank'ajchu kanku, nitaj tarpojchu kanku. Chaypitaj chay waka uñaj kunkanta p'akenqanku.

⁵ Chaymantaj qayllaykonqanku sacerdote levitas, imaraykuchus paykunaqa ajllasqas karqanku Señorqa yupaychanankupaj, Señorpa sutimpi bendicinankupajtaj. Chantapis paykunapuni quejanakus kajtin maychus kajta nenqanku.

⁶ Chay aswan qayllapi kaj llajtamanta kurajkunataj mankisninkuta mayllakonqanku mayupi chay uma p'akisqa waka uñaj patampi.

⁷ Chanta nenqanku: Chay runataqa mana noqaykuchu wañucherqayku, ni rikullarqaykupischu imaynatachus wañuchisqankuta.

⁸ Señor, Egiptomanta orqhomusqayki Israel llajtaykita perdonay ari. Ama juchachayku qhasimanta kay runaj wañuyninmanta, nispa. Ajinamanta Señorqa chay runaj wañuyninmantaqa mana juchachasqaschu kankichej.

⁹ Qankunaqa imachus Señorpa ñaupaqempi cheqan kajta ruwaspa qankuna ukhumanta chay runaj wañuyninmanta juchata chinkachinkichej.

Maqanakupi presochasqa warmismanta

¹⁰ Ichapis enemigosniykichejwan maqanakushajtiykichej, Señor Diosniykichej presosta makisniykichejman urmachimunman.

¹¹ Ichapis chay presos ukhupi mayqellampis rikunman uj k'acha warmita munanmantaj warmimpaj jap'ikapuyta.

¹² Chaypacha chay warmita wasinman pusachun. Chaypitaj chay warmeqa chujchasninta ruthukuchun, sillusnintataj k'utukonqa.

¹³ Chaymantaqa ima p'achanwanchus presochasqa urmarqa chaytapis lluch'ukonqa. Qharej wasimpitaj tiyakaponqa. Chaypitaj tatanmanta, mamanmantawan uj killa junt'ata waqanqa. Chaymantaraj chay israelitaqa chay warmita jap'ikapuyta atenqa warmimpaj.

¹⁴ Sichus qhareqa chay warminta manaña munakunmanchu chayqa, kachariponqa. Amataj vendenqachu, nitaj mit'aninta jinachu jap'enqa, imaraykuchus honranta t'akarqa.

Kuraj wawaj chayaqen

¹⁵ Uj runaqa iskay warmisniyoj kaspa ichapis ujninta munakunman ujnintataj mana. Qhari wawasniyoj kajtenqa, chay kuraj wawanqa mana munasqa warmejtachu kanman.

¹⁶ Mayk'ajpis imasninchus kajta wawasninman rak'inan kashajtenqa, mana atenqachu kuraj kajman chayaqeta munasqa warmej wawanman qoyta, mana munasqa warmej wawanta qhesachaspa pay kuraj wawa kashajtin.

¹⁷ Chaytapuni qhawanan tiyan kuraj wawanta jina. Tukuy kapuyninmantataj payman iskay t'aqata qonan tiyan. Paypuni ñaupaj kaj yumasqa wawan kasqanrayku, kuraj kaj chayaqeta jap'inan tiyan.

Mana kasukoj wawasmanta

^18-19 Sichus mayqempata wawan mana uyarikunmanchu, nitaj kasukunmanchu tatan maman jasut'ejtinkupis chayqa, tatasnin payta pusachunku llajtapi kaj kurajkunajpaman.

²⁰ Nichunkutaj: Wawaykoqa ancha k'ullu uma, mana kasuwaykuchu, nitaj nisqaykutapis uyarikunchu, ancha viciosman, machaykunamampis qosqa, nispa.

²¹ Chay llajtamanta tukuy runas rumiswan ch'anqaspa payta wañuchenqanku. Ajinamanta qankuna ukhumanta sajra kajta chinkachinkichej. Chayta uyarispataj israelitasqa manchachikonqanku.

Waj kamachiykuna

^22-23 Sichus pipis wañuywan jasut'isqa kanampaj jina juchata ruwanman, wañuchiwajchejtaj sach'aman warkhuspa chayqa, chay ayantaqa ama tutantinta warkhurayasqata saqenkichejchu. Manachayqa chay diapacha p'ampankichej, imaraykuchus warkhusqa runaqa Diosmanta maldicisqa karqa, amataj Señor Diosniykichej qosusqaykichej jallp'aykichejta ch'ichichankichejchu.