Deuteronomio 19 - Qheshwa Biblia DC

Pakakuna llajtas

^1-2 Maypachachus Señor Diosniykichej chay nacionesta chinkachenqa, jallp'asninkutataj qopusonqachej, tiyakunkichejtaj llajtasninkupi, wasisninkupipis, chaypacha Señor Diosniykichej qopusonqachej chay jallp'api kinsa llajtasta ajllankichej.

³ Chay llajtasman rej ñantapis sumajta pichankichej. Chantapis, Señor Diosniykichej qopusonqachej chay jallp'astaqa kinsaman t'aqankichej. Ajinamantaqa mayqen runa wañuchillapis chay llajtaman ayqeyta atenqa pakakunampaj.

⁴ Sichus mana wañuchiyta munaspalla uj runata wañuchin chayqa, mana paywan phiñanasqa kaspa, chay runaqa chay llajtaman ayqeyta atenqa.

⁵ Ajinaqa iskay runas monteman llant'aj rejtinku, sichus ujninku ch'ejtashajtin, chaypacha hachaqa cabonmanta ch'utaspa t'akaykunman, hachayojpa wauqenta payta wañuchispa chayqa, chay runaqa atin chay kinsa llajtasmanta mayqen llajtallamampis ayqekuyta, jinamanta ama wañunampaj.

⁶ Sichus uj pakakuna llajtalla kanman chayqa, ancha karu ñan kasqanrayku, chay wañoj runaj ayllun, manchay phiñasqa kaspa chay runa wañuchita tariytawankama ñampi wañurparichillanmantaj, chay mana juchayoj runataqa. Payqa manapuni ñaupajmanta wauqenwan chejnichikojchu.

⁷ Chayrayku kamachiykichej kinsa llajtasta t'aqakunaykichejta.

^8-9 Señor Diosniykichej jallp'aykichejta jatunyachejtin, tukuynin jallp'asta qopusojtiykichej, ñaupa tatasniykichejman nisqanman jina, chaypacha kinsa pakakuna llajtastawan yapankichej chay kinsa llajtasman, ñaupajta karqaña chaykunaman. Chayqa kanqa sichus junt'ankichejpuni, kay qosqaykichej kamachiykunasta Señor Diosniykichejta munakuspa, ñannintapuni purispataj.

¹⁰ Chay jinata ama jich'akonqachu mana juchayojpa yawarnin, Señor Diosniykichej jap'ikapunaykichejpaj qosonqachej chay jallp'aspi. Jinamanta runa wañuchisqamantaqa mana juchachasqaschu kankichej.

^11-13 Ichapis mayqellampis runa masinta chejnispa wateqaytawan jap'ispa maqanman wañunankama, ayqekuspataj rinman ujnin kaj pakakuna llajtaman; chaypacha llajtanmanta kaj kuraj runasqa kamachenqanku chay ayqekojta presochaspa, wañojpa qayllan kaj ayllunman jaywanankuta, jinamanta wañuchinampaj chayqa, chay runataqa ama khuyankichejchu. Jinamanta mana jich'akonqachu israelitas ukhupi mana juchayoj runaj yawarnin. Chayta ruwankichej chayqa, tukuy imapi allin risonqachej.

¹⁴ Maypichus Señor Diosniykichej qosonqachej chay jallp'aspi, qayllaykichejpi kaj runaspa jallp'ankoj lindesninkuta ama pasankichejchu, imaynachus ñaupajmantapacha karqa jinallapuni kanan tiyan.

Llulla kamachiykunata parlajkunamanta

¹⁵ Mayqen juchasapaj contrampi, ima laya jucharaykullapis mana uj runallachu testigo jina sayayta atin. Chay juchallikojta juchachanapajqa kanankupuni tiyan iskay, chayri kinsa rikojkuna.

^16-17 Sichus uj sajra sonqo runa llullakuspa sayarinman sut'inchanampaj, imastapis runa masimpa contrampi chayqa, iskaynin runas ch'atanakojkuna renqanku Señorpa ñaupaqenman, sacerdotespaman, chantaqa juezpaman ima, pikunachus chaypi kashanqanku runasta uyarinankupaj chay p'unchaypi, chaykunaman.

^18-19 Chay kurajkunaqa allintapuni chay imasta qhawanqanku yachanankukama imaynapunichus kasqanta. Sichus chay runaqa runa masimpa contranta llullakun chayqa, kikillantataj payta ruwaychej, imaynatachus payqa runa masinta ruwayta munasharqa, ajinata. Ajinamanta chay jina mana allin kajkunata qankuna ukhumanta chinkachinkichej.

²⁰ Wajkunapis chayta yachaytawan manchachikonqanku, manañataj chay jina sajrata ruwanqankuchu.

²¹ Chay jina runasmantaqa amapuni khuyakunkichejchu. Manachayqa kay jinata kutichiychej: Runamanta runata, ñawimanta ñawita, kirumanta kiruta, makimanta makita, chakimantataj chakita.