Deuteronomio 17 - Qheshwa Biblia DC

¹ Señor Diosniykichejmanqa rikuchikupaj ama apankichejchu imanasqa torosta, chayri ovejasta. Chayqa millay paypajqa kanman.

² Ichapis mayqen llajtallapipis Señor Diosniykichej qosonqachej, chaypi kanman qhari, chayri warmi, Señor Diosniykichejpa ñaupaqempi mana allin kajta ruwaspa, tratontapis mana junt'aspa.

³ Ichapis waj dioskunata yupaychaj rinman, chaykunaman qonqorikuspa, chayri intiman, killaman, tukuy estrellasmampis, Señorpa kamachisqanta p'akispa.

⁴ Chaymanta imallatapis uyariwajchej chayqa, allinta tapurispa yacharqoychej. Ichapis chay jina millaytapuni israelitas ruwarqanku.

⁵ Jina kajtenqa, chay juchachakojta, qharichus, chayri warmichus, llajtamanta jawaman orqhonkichej. Chaypitaj rumiwan ch'anqaspa wañuchinkichej.

⁶ Iskay, chayri kinsa rikojkuna kajtin, chay runata wañuchinkichej. Sichus uj runalla rikoj tiyan chayqa, ama chay runata wañuchinkichejchu.

⁷ Chay rikojkunaraj ñaupajta ch'anqananku tiyan, chaymantaraj tukuy runas ch'anqanqanku chay runata wañuchispa. Ajinamanta qankuna ukhumanta kay jina sajrata chinkachinkichej.

⁸ Sichus uj juiciopi manaraj atinkichejchu cheqan kajta sut'inchayta chayqa, wañuchiymanta kajtin, chayri jallp'amanta jap'inakuymantachus, maqanakuymantachus, chayri llajtaykichejpi ima ch'ajwa pasasqanmantapis, Señor Diosniykichej ajllakorqa chay cheqaman wicharinkichej.

⁹ Chaypi kaj sacerdote levitaman ninkichej, chaypi pichus juez kashan chaymanwan. Paykunatataj maychus kajta tapukunkichej, paykunataj imatachus ruwanaykichejta nisonqachej.

¹⁰ Qankunataj ruwankichej imatachus juezkuna nisonqachej Señor ajllakorqa chay cheqamantapacha, allintataj ruwankichej paykuna nisusqaykichejman jina.

¹¹ Qankunaqa kikintapuni ruwankichej chay juezkuna nisusqaykichejman jina mana pantaspa ni pañaman, nitaj lloq'eman.

¹² Sichus pipis machu machuykachaspa mana ruwanmanchu Señorpa kamachimpi kashaj sacerdotempa nisqanman jina, chayri juezpa nisqanman jina chayqa, wañuchisqa kachun. Ajinamanta qankunaqa israelitas ukhumanta kay jina sajrata chinkachinkichej.

¹³ Chayta runas yachanqanku chayqa, manchachikuyniyoj kanqanku, manaña jinata machu machuykachaspapis ruwanqankuchu.

Reyes imaynachus kanankumanta

¹⁴ Señor Diosniykichej ima jallp'atachus qosonqachej chayman jap'ikapoj yaykojtiykichej, chaypitaj tiyakuspa niwajchej: Reyniyoj kayta munanchej kamachinawanchejpaj, imaynatachus qayllanchejpi kaj naciones reyniyoj kanku ajinata, nispa.

¹⁵ Ajina kajtenqa qankuna ukhumanta reyta churakunkichej. Señor Diosniykichej qankuna ukhumanta ajllanqa chaytapuni churankichej. Ama karu llajtayojtaqa reyniykichejpaj churankichejchu, mana qankunaj llajta masiykichejchu kajtaqa.

¹⁶ Chay reyqa ama ashkha caballosta rantichunchu, nitaj Egiptomampis runasta kachachunchu astawan caballosta rantejta. Señorqa nisorqachejña: Amaña jayk'ajpis Egiptoman kutirinkichejchu, nispa.

¹⁷ Amallataj ashkha warmisniyoj kachunchu, ama sonqompi Señormanta t'aqakunampaj, nitaj ancha ashkha qolqeyoj, qoriyoj kachunchu.

¹⁸ Maypachachus rey kamachiytaña qallarejtin, nenqa Diospa kamachiykunasninta papelpi churanankuta, orqhospa sacerdote levitas jallch'ashanku chay libromanta.

¹⁹ Chay librotaqa jap'enqapuni. Mayk'ajkamachus kausanankama sapa kuti chaytaqa leenqapuni. Chay jinamanta Señor Diosniykita jatumpi qhawayta yachanampaj, imastachus nisqasninta kasunampaj, ruwanampajtaj.

²⁰ Ajinamanta mana yuyakonqachu llajta masisninmanta aswan yachayniyoj kasqanta, nitaj pañaman, nitaj lloq'eman Diospa kamachisqanmantapis t'aqakonqachu. Ajinamanta chay rey, chanta wawasnimpis unayta Israel ukhupi kamachenqanku.