Deuteronomio 16 - Qheshwa Biblia DC

Diosta yupaychanapaj sapa wata tantakuykuna

¹ Abib killata sumajta waqaychankichej, Señor Diosniykichejman Pascuata ruwaspa, imaraykuchus chay killapi Señor Diosniykichej Egiptomanta ch'isita orqhomusorqachej.

² Chay Pascuapeqa Señor Diosniykichejpaj ñak'ankichej wakasta, ovejasta ima; maypichus Señor ajllakorqa uj cheqata, sutin jatunchasqa kanampaj, chaypi.

³ Chay rikuchiku kankasqa uywataqa mana levadurayoj t'antatawan mikhunkichej. Chay t'antataqa qanchis p'unchay junt'ata mikhunkichej, imaraykuchus chayqa llakiy t'anta. Qankunaqa ajinata may apurasqata Egiptomanta llojsimorqankichej. Chayrayku qankunaqa kausanaykichejkama yuyarikunkichejpuni ima p'unchaypichus Egiptomanta llojsimusqaykichejta.

⁴ Chay qanchis p'unchaykunapeqa ama wasisniykichejpi kanqachu levaduraqa tukuy jallp'aykichejpi. Señorman rikuchikuta jaywankichej chay kankasmantaqa q'ayantimpaj mana ima puchonqachu.

⁵ Ama may llajtallapipis, Señor Diosniykichej qosorqachej chaykunapi Pascua rikuchikuta jaywankichejchu.

⁶ Manachayqa jaywankichej maypichá Señorqa Diosniykichej sutin jatunchasqa kanampaj ajllakorqa chayllapi. Chaytaqa jaywankichej ch'isiyaykuyta inti chinkaykushajtin, imaraykuchus qankunaqa ajina ch'isiyaykuyta Egiptomanta llojsimorqankichej.

⁷ Chay rikuchiku aychasta apasqaykichejta kankaspa mikhunkichej, maypichus Señorqa ajllakorqa sutin jatunchasqa kanampaj chaypi. Q'ayantintaj wasiykichejman ripunkichej.

⁸ Sojta p'unchayta mikhunkichej chay mana levadurayoj t'antata, qanchis kaj p'unchaypitaj jatun tantakuyta ruwankichej Señor Diosniykichejta jatunchanaykichejpaj; chay p'unchaypitaj amapuni ima ruwanallatapis ruwankichejchu.

^9-10 Qanchis semanaña kajtin, trigo ruthuy qallarikusqanmantapacha, semanas nisqa fiestata Señor Diosniykichejpaj ruwankichej. Señor Diosniykichej qosusqaykichejman jina, chaykunamanta ofrendasta, munasqaykichejman jina qonkichej.

¹¹ Chay kusikuykunataqa Señor Diosniykichejpa ñaupaqempi ruwankichej, maypichus Pay uj cheqata ajllakorqa, chaypi. Chaytataj ruwankichej wawasniykichejwan, kamachisniykichejwan khuska, chantapis llajtaykichejpi tiyakoj levitaswan, karu llajtayojkunawan, wajcha wawaswan, warmisapaswan ima.

¹² Yuyarikuychej qankunapis Egiptopi kamachis kasqaykichejta; chayrayku kay kamachiykunataqa junt'aychejpuni.

¹³ Trigosniykichejta oqhariyta tukuytawan, uvasniykichejta ch'irwaytapis, qanchis p'unchaykunata ramadas nisqa fiestata ruwakunkichej.

¹⁴ Chaypeqa wawasniykichejwan kusikunkichej, kamachisniykichejwan khuska, chantapis llajtaykichejpi tiyakoj levitaswan, karu llajtayojkunawan, wajcha wawaswan, warmi sapaswan ima.

¹⁵ Chay jinata qanchis p'unchayta Señor Diosniykichejta yupaychaspa kusikunkichej, maypichus Pay uj cheqata ajllakorqa, chaypi. Ajinamanta kusikuychejpuni Señor Diosniykichej bendicisusqaykichejrayku tukuy cosechasniykichejpi tukuy llank'ayniykichejpi ima.

¹⁶ Señor Diosniykichejpa ñaupaqenman tukuy qharisqa watapi kinsa kutita qayllanqanku, may cheqatachus Señorqa ajllakorqa chaypi, kay fiestaspi: Mana levadurayoj t'anta, nisqa qhochukupi, semanas nisqa fiestapi, ramadas nisqa fiestapipis, mana ni mayqellampis mana imayojqa Señorman qayllaykonqachu.

¹⁷ Manachayqa sapa ujninku ofrendasninkuta apakonqanku ima kapuykunatachus Señor Diosniykichej qosunkichej chayman jina.

Cheqanta ruwanamanta

¹⁸ Sapa ayllupi juezkunata, kurajkunatawan ajllaychej, maykunapichus Señor Diosniykichej llajtasta qosonqachej chaypi. Ajinamanta paykunaqa runasta sumajta cheqanchanqanku.

¹⁹ Ama justiciataqa cheqan kajmanta karunchachinkichejchu, amataj wakillanman kutikunkichejchu. Ama qolqetapis lluk'ichikunkichejchu. Chay lluk'iykunaqa aswan yachayniyoj runastapis pantaykuchin, cheqan runaspa nisqasnintapis waj jinaman tukuchin.

²⁰ Cheqan kajllatapuni ruwanaykichej tiyan, Señor Diosniykichej qosunkichej chay jallp'api tiyakunaykichejpaj.

²¹ Señor Diosniykichejpaj altarta ruwaspalla, chaypa ñaupaqempi ama ima yupaychana k'ullutapis, chayri sach'atapis ruwakunkichejchu.

²² Yupaychana rumistaqa ama oqharinkichejchu, chaykunata Señor Diosniykichejqa chejnimpuni.