Deuteronomio 15 - Qheshwa Biblia DC

Manusmanta qonapuna

^1-2 Sapa qanchis watamanta manusqaykita perdonankichej. Kay jinata perdonankichej: Runa masisninkuman manojkunaqa, manusqasninkuta perdonanqanku. Chaymantaqa ama mañanqankuñachu qopunankuta imatachus runa masisninkuman, chayri llajta masisninkuman manusqankuta. Chay wataqa Señorpa sutinrayku manu qonqapuna wata nisqa kanqa.

³ Karu llajtayojmantaqa mañakapuyta atinki imatachus manusqaykita qopusunanta. Llajta masiykitaqa perdonankipuni imatachus manusqaykimanta.

⁴ Jinamanta qankunaj chaupiykichejpi mana wajchas kanqachu, Señor Diosniykichejtaj sumajta bendicisonqachej, ima jallp'atachus jap'ikapunaykichejpaj qosunkichej chaypi.

⁵ Ajina kanqa sichus qankuna Señor Diosniykichejpa palabrasninta uyarinkichej, junt'ankichejtaj kay kamachiykunata kunan qoshaykichej chaykunata chayqa.

⁶ Arí, Señor Diosniykichej bendicisonqachej nisusqaykichejman jina. Ashkha nacionesman manunkichej; qankunarí mana manukunkichejchu. Ashkha naciones patapi kamachinkichej, qankunatataj ni mayqen naciompis kamachisonqachejchu.

⁷ Sichus mayqen llajta masiykichej wajcha runaman tukupunman chayqa, mayqen llajtasnillaykichejpipis Señor Diosniykichej qosonqachej chay jallp'api ama sonqoykichejta rumiyachinkichejchu, amallataj mich'as kankichejchu, chay llajta masisniykichej pisichikoj runaswan.

⁸ Paykunamanqa imachus tiyapususqaykichejta qollankichej, imatachus pisichikunku chaytapis manurinkichej.

⁹ Ama sajra yuyayniykichejwan atipachikunkichejchu, kay jinata: Qanchis kaj wataqa chayamushanña, manus perdonana wata, nispa. Pajtataj sajra ñawiwan qhawawajchej wajcha llajta masiykichejta. Mana manojtiykichejqa Señorman qankunaj contraykichejta qhaparenqa. Qankunarí juchachasqas kankichej.

¹⁰ Chay llajta masiykichejta yanapariychejpuni, ama sonqoykichejta nanachikuspa. Kay jinata ruwasqaykichejmanta Señor Diosniykichejqa tukuy ima ruwasqaykichejpi aswan ashkhata qopusonqachej.

¹¹ Kay pachapeqa wajchasqa kallanqapuni. Chayrayku noqaqa kamachiykichej kay jinata: Qankunaqa tukuy sonqo llajta masisniykichejmanta pisichikojkunata, wajchastawan yanapaychej, nispa.

Wata runas imaynachus kanankumanta

¹² Sichus chay hebreo llajta masiykichejmanta, qharipis, chayri warmipis qankunawan rantichikuspa wata kamachiykichejpaj yaykupunman chayqa, sojta watallata kamachiykichejmanta kanqa, qanchis watapeqa kacharipunkichej.

¹³ Chay kacharipushaspataj ama mana imayojtaqa kacharipunkichejchu.

¹⁴ Manachayqa ovejasniykichejmanta qorinkichej. Chantaqa qollankichejtaj trigota, vinota ima. Chayqa niyta munan, imastachá Señor Diosniykichej qorisunkichej, chaykunamanta qankunapis payman qorillankichejtaj.

¹⁵ Ama qonqankichejchu qankunapis Egiptopi kamachis kasqaykichejmanta, maynejmantachus Señor Diosniykichej kacharichimusunkichej. Chayrayku kunanqa noqa kay kamachiyta qoykichej.

^16-17 Sichus chay kamachiykichej mana ripuyta munanchu allinta kamachisqaykichejrayku, familiaykichejmanta qankunawan yachasqa kasqanraykutaj chayqa, uj lesnawan ningrinta wasiykichej punku kurkupi takaspa, jusk'unkichej; jinamanta chay runaqa wiñaypaj kamachiykichej kanqa.

¹⁸ Kikillantataj warmi kamachiykichejwampis ruwankichej. Kamachiykichejta kacharipunaykichejmanta ama pesachikuychejchu. Paykunaqa peonman paganaykichejpa khuskannillanmanta llank'apusunkichej sojta watasta; chaynejtataj Señor Diosniykichejqa bendicisonqachej tukuy ima ruwasqaykichejpi ashkhata.

Kuraj orqo uywasqa Señorpata

¹⁹ Tukuy kuraj orqo uñasta, wakasmanta, ovejasmanta ima, Señor Diosniykichejman qopunkichej. Ama llank'achinkichejchu chay kuraj uña torillosta. Amallataj kuraj uña corderoj millmasninta ruthunkichejchu.

²⁰ Chaykunatataj tukuy familiaykichejwan khuska sapa wata Señor Diosniykichejpa ñaupaqempi mikhunkichej, maypichus Pay ajllakun uj cheqata chaypi.

²¹ Sichus chay uywaqa wist'u kanqa, chayri ciego, chayri imallampis imanasqa kanman chayqa, ama chayta Señorman rikuchikupaj jaywankichejchu.

²² Chaykunataqa may llajtapichus tiyakunkichej chayllapi mikhuyta atinkichej, llimphu sonqoyoj, mana llimphu sonqoyojpis kashajtiykichej, tarukaspis kankuman jina.

²³ Yawarniyojtaqa amapuni mikhunkichejchu, manachayqa jallp'aman yakuta jina jich'ankichej.