Deuteronomio 12 - Qheshwa Biblia DC

Uj cheqallapi Diosta yupaychana

¹ Kaykuna kanku leykuna, kamachiykunapis. Chayman jina qankunaqa tukuy kausayniykichejpi ruwankichej, ñaupa tatasniykichejpa Señor Diosnin qosunkichej chay jallp'aspi.

² Chay jallp'asman yaykuspaqa maynejpichus yupaychaj kanku chay cheqasta chinkachinkichej. Maypichus chay nacionesqa dioskunasninkuta yupaycharqanku chaykunata, jatuchaj orqospi kajkunata, lomaspi kajkunata, laqherara sach'a uraspi kajkunata ima.

³ Altaresninkuta thuñinkichej, yupaychana rumisninkuta p'akinkichej, yupaychana k'ullusninkuta ninawan q'olaykuchinkichej; dioskunasninkoj lantisnintarí p'akirankichej. Ajinamanta sutisninkupis manaña rejsisqasñachu kanqanku.

⁴ Qankunaqa Señor Diosniykichejta ama chay jinamanta yupaychankichejchu.

⁵ Señorqa ayllusniykichej ukhupi uj cheqata mask'anqa, qankuna chaypi sutinta yupaychanaykichejpaj.

⁶ Qankuna chaypi uywasta ruphachinkichej, rikuchikustapis jaywankichej. Apankichejtaj chunkamanta ujta ofrendata, rama ofrendata, qosaj nisqaykichej ofrendata, munasqaykichejman jina ofrendata, waka uñasta, kuraj oveja uñasta ima.

⁷ Chaypi chay rikuchikusta Señor Diosniykichejpa ñaupaqempi mikhunkichej, tukuy familiasniykichejwan khuska kusikuspa, tukuy ruwasqaykichejta qhawarispa, imaynatachus Señor Diosniykichej bendicionninwan poqochin, chayta.

⁸ Chaypeqa ama ruwankichejchu imaynatachus kunan ruwashankichej ajinata; kaypeqa sapa uj munasqanchejman jina ruwanchej.

⁹ Kunankama manaraj samarikuyman chayashankichejchu, Señor Diosniykichej chayaqeykichejta qopusonqachej, chayman.

¹⁰ Jordán mayuta chimpajtiykichej Señorqa qankunaman qopusonqachej, chay jallp'api tiyakunkichej. Chaypi Señor Diosniykichejqa muyuyniykichejpi kaj enemigosniykichejmanta jark'asonqachej, mana manchachikuspa kakunaykichejpaj.

¹¹ May cheqapichus Señorqa sutin yupaychasqa kanampaj ajllakonqa chaypi, qankunaqa kamachisusqaykichejman jina kay tukuy imasta Señorman jaywankichej: Ruphasqa kanampaj uywasta, ruphachinapaj kajta, sapa chunkamanta uj kaj ofrendata, rama ofrendasta, imastachus ajllaspa Señorman qosaj nerqankichej chay ofrendasta ima.

¹² Señor Diosniykichejpa ñaupaqempi mayta kusikunkichej, wawasniykichejwan, kamachisniykichejwan ima, qankunawan tiyakoj levitaswampis, imaraykuchus levitasqa mana qankuna jina jallp'asniyojchu kanku.

¹³ Amapuni uywastaqa Señorpaj ruphachillankichejchu maynejpichus kashankichej chay cheqapi.

¹⁴ Manachayqa ruphachimunkichej ima ayllu ukhupichus kikin Señor uj cheqata ajllakorqa chaypi. Chaypimá qankunaqa ruwankichej imastachus kamachiykichej chaykunata.

¹⁵ Chaywampis may cheqapichá tiyakunkichej chaykunapi ñak'aspa aychataqa atinkichej mikhuyta munasqaykichejman jina; imaynatachus Señor Diosniykichej qosusqaykichejman jina. Chantapis tukuyniykichej llimphu sonqoyoj mana llimphu sonqoyojpis kashajtiykichej chayta atinkichej mikhuyta tarukaspis kankuman jina.

¹⁶ Yawartaqa amapuni mikhunkichejchu, manachayqa jallp'aman suruykuchinkichej yakuta jina.

¹⁷ Llajtasniykichejpeqa mana mikhuyta atinkichejchu sapa chunkamanta qosqa ofrenda trigota, vinota, aceiteta ima, nitaj kuraj waka uñasta, kuraj oveja uñastapis ni ima kajta Señorman imastachus qosaj nerqankichej chaykunamanta, nitaj qankunallamanta ofrendasta munasqaykichejman jina qorqankichej chaykunatapis.

¹⁸ Chaykunataqa atillankichej mikhuyta Señor Diosniykichejpa ñaupaqempi, may cheqatachus pay ajllakorqa chaypi, wawasniykichejwan khuska, kamachisniykichejwan khuskataj. Jinallataj qankunawan tiyakoj levitaswampis. Ajinaqa tukuy ruwasqasniykichejmanta mayta kusikunkichej.

¹⁹ Chay jallp'api tiyakushaspaqa pajtataj jayk'ajpis levitasta saqerpariwajchej mana imayojta.

²⁰ Maypachachus Señor Diosniykichej jallp'aykichejta jatunyachejtin, pay qosqaykichej nisqanman jina, aychamanta yarqhasonqachej chayqa, ima ratollapis mikhuyta atinkichej.

²¹ Sichus Señorpa ajllakusqan cheqaqa sutinta churanampaj qankunamanta karupiraj kanman chayqa, Señorpa qosusqaykichej chay wakasta, chay ovejastawan atinkichej ñak'ayta munasqaykichejman jina mikhunaykichejpaj, maypichus tiyakushankichej chaypi, imaynatachus kamacherqaykichej chayman jina.

²² Chay aychataqa tukuyniykichej atinkichej mikhuyta, tarukaspatapis kankuman jina, llimphu sonqo kashajtiykichej, mana llimphu sonqo kashajtiykichejpis.

²³ Yawartaqa ni ima kashajtin mikhunkichejchu, imaraykuchus yawarqa kausaymin. Ajinaqa amapuni yawartaqa aychawan khuska mikhunkichejchu.

²⁴ Manachayqa yawarta jallp'aman yakuta jina suruykuchinkichej.

²⁵ Ama mikhunkichejchu. Señorpa munasqanman jina ruwankichej chayqa, allin risonqachej, Jinallataj wawasniykichejmampis.

²⁶ Señorman ofrendata jina qorqankichej chaykunata, payman qosaj nerqankichej chaykunatawan apaspa, Señorman jaywamunkichej maypichus ajllakorqa uj cheqata chaypi.

²⁷ Señor Diosniykichejpa altarnin patapi sumaj q'apashaj rikuchikuta jaywankichej. Chay jaywasqaykichej uywasniykichejpa yawarnintaqa Señor Diosniykichejpa altarnin pataman jich'asqa kanqa. Chay aychastataj atinkichej mikhuyta.

²⁸ Uyariychej, junt'aychejtaj kamachisqasniyta, jinamanta allimpuni risunaykichejpaj, qankunata, wawasniykichejtapis, Señorpa ñaupaqempi allin kajta munasqanman jinataj ruwasqaykichejrayku.

Lantista mana yupaychanachu

²⁹ Señor Diosniykichej ñaupaqeykichejmanta chinkachenqa chay nacionesta, paykunaj jallp'asninkuman yaykojtiykichej, chaypi tiyakunaykichejpaj.

³⁰ Chay naciones qankunaj ñaupaqeykichejpi chinkachisqas kasqankumantaña. Ama qankunapis ruwasqankuman jina ruwankichejchu. Pajtataj niwajchej: Imaynatachus kay nacionesqa dioskunasninkuta yupaychaj kanku, ajinallatataj noqanchejpis yupaychasun, nispa.

³¹ Qankunaqa amapuni jinata ruwankichejchu Señor Diosniykichejpa contranta. Imaraykuchus, imastachus Señor mana munanchu ruwanata, chaykunata chay nacionesqa ruwanku dioskunasninkuta yupachaspa. Chay lantisninkuta ninawan jap'iykuchispa, wawasninkuta jaywanku chaypi ruphachinankupaj.

³² Kay tukuy kamachiykunamanta willasqasniyta ruwaychejpuni, ama yapaspa, nitaj qhechuspa.