Deuteronomio 10 - Qheshwa Biblia DC

Trato watejmanta ruwakun

¹ Chaymantaqa Señor niwarqa: Qan kikiyki ch'eqospa ruway palqayoj p'alta rumita ñaupajta karqa ajinata. Chanta orqoman wicharimuy noqajpaman. Chaymantataj ruwallaytaj maderamanta uj cajonta.

² P'akisqa rumipi chay qelqasqa palabrastaqa, watejmanta kay rumipi qelqallasajtaj. Chaytataj chay cajompi waqaychanki.

³ Jinata niwajtintaj acacia maderamanta cajonta ruwarqani, p'alta palqayoj rumitapis ch'eqospa ruwallarqanitaj. Jinaytawantaj chaykunata oqharikuspa orqoman wicharerqani.

⁴ Señortaj chay p'alta palqayoj rumiman qelqarqa chay chunka kamachiykunasta, orqopi kashaspa nina chaupimanta parlamusorqachej chaykunata, nina chaupimanta tukuyninchej tantasqa kashajtinchej. Chaymantataj chay rumita qowarqa.

⁵ Noqataj orqomanta uraykamorqani. Chaymantataj chay rumita chay cajonman churaykorqani Señor kamachiwasqanman jina. Chayqa kunankama jaqaypiraj kashan.

⁶ Israelitasqa purirerqanku Beerot-bene-jaacamanta Moseraman. Chaypi Aaronqa wañuporqa, kikimpitaj p'ampakorqa. Wawan Eleazartaj cuentanmanta sacerdote kayninman yaykorqa.

⁷ Jaqaymanta rerqanku Gudgodaman, chaymantataj Jotbataman, maypichus yakusniyoj karqa chayman.

⁸ Chaypacha Señorqa Leví aylluta ajllarqa trato cajonta apanampaj, Señorpa ñaupaqempi kanampaj, payta yupaychaspa, sutimpi bendicispa. Chaytaqa kunankama ruwashallankupuni.

⁹ Chayrayku levitasqa chayaqetaqa mana wauqesninku jinachu jap'ikunku, chayaqenkoqa Señorlla kasqanrayku Señor nisqanman jina.

¹⁰ Noqaqa ñaupaj kutipi jina, tawa chunka p'unchaykunata, tawa chunka tutastawan orqopi kamorqani. Kay kutipitaj Señorqa uyariwaspa, manaña qankunata chinkachiyta munarqachu.

¹¹ Niwarqataj: Rillayña israelitasta pusaj, ima jallp'atachus tatasniykichejman qosqaykichej nerqani chayman, chay jallp'ata jap'ikapunaykichejpaj.

Diospa imatachus mañakusqan

¹² Kunanqa israelitas, imatataj mañakusunkichej Señor Diosniykichejri? Payqa munan Payta manchachikunaykichejta, Paypa ñannintataj purinaykichejta. Munallantaj payta yupaychanaykichejta tukuy sonqoykichejwan, tukuy almaykichejwan ima.

¹³ Chanta munallantaj kamachisqasninta, leyesninta ima junt'anaykichejta tukuy ima allin rinasuykichejpaj.

¹⁴ Kunanqa yachanaykichej tiyan; janaj pachaqa janaj pachamanta aswan patapi kajkuna, kay pacha, chaypi imaschus kajkunasnintin, Señor Diosniykichejpata kashanku.

¹⁵ Chaywampis Señorqa qankunaj tatasnillaykichejta munakorqa, tukuy ayllus ukhumantataj paykunaj mirayninkuta ajllakorqa. Chaykunataj qankunalla kankichej kunankama.

¹⁶ Chayrayku kunanmantapacha Señor Diosniykichejpa nisqanta waqaychaychej, amaña rumi sonqoschu kaychej.

¹⁷ Señor Diosniykichejqa dioskunaj Diosnin, señorkunaj Señornin. Payqa jatun Dios, atiyniyoj manchachikunataj. Tukuyta kikin munakuyllawan qhawan. Ni ima t'inkaswampis rantichikunchu.

¹⁸ Payqa cheqanta ruwan wajcha wawaspaj, warmi sapaspajpis. Chanta munakun, mikhunatataj qon, p'achallichintaj qankunawan kaj karu llajtayoj runaman.

¹⁹ Qankunaqa karu llajtayojta munakuychej ari, yachaspa qankunapis karu llajtayojllataj kasqaykichejta Egiptopi kashaspa.

²⁰ Señor Diosniykichejta manchachikuychej, pay sapallanta yupaychaychej. Payman sayasqas kaychej. Juramentotapis ruwanaykichej kajtenqa Paypa sutimpi ruwaychej.

²¹ Payta yupaychaychej, Paylla Diosniykichejqa. Qankuna rikushajtiykichej Pay ruwarqa chay jatuchaj t'ukuna imastsa qankunarayku.

²² Mayk'ajchus ñaupa tatasniykichej Egiptoman chayarqanku chaypacha paykuna qanchis chunkalla karqanku. Kunanrí qankunata Señor Diosniykichej ashkhata mirachisunkichej janaj pacha estrellasta jina.