Daniel (hebreo) 9 - Qheshwa Biblia DC

Danielqa ayllumpaj Diosmanta mañakun

¹ Asueroj wawan Darío, medospa ayllunmanta karqa. Caldea llajtapi rey karqa kamachinampaj.

² Ñaupaj kaj watata rey kashajtin, noqa Daniel, Diospa palabranta leekusharqani profeta Jeremiaspa librompi, qanchis chunka watas junt'akuna kasqanta Jerusalén urmanampaj, profeta Jeremiasman Señorpa nisqanman jina.

³ Señor Diosman k'umuykukorqani majakuspa, mañakuspa, ayunakuspa ima. Qhashqa p'achata churakuspataj ushphas patapi tiyaykukorqani.

⁴ Señor Diosniymanta mañakorqani, kay imastataj willakorqani: Señor, may jatun Diosníy, trato ruwasqaykitaqa junt'ankipuni, munakuyniykitataj rikuchinki qanta munakusojkunaman, kamachisqasniykita junt'ajkunamampis.

⁵ Noqayku juchalliyku, millay imasta ruwayku, sajra kajta ruwayku, qanta mana kasuspataj kausayku. Kamachisqasniykimanta, imatachus ruwanaykuta nisqasniykimantawan karunchakuyku.

⁶ Kamachisniyki profetastapis manaña kasupuykuchu. Paykunaqa reyniykuman sutiykipi parlarqanku, chanta kurajkunaman, ñaupa tatasniykuman, tukuynin Israel aylluman ima.

⁷ Señor, qan cheqampuni kanki. Noqayku judiosqa p'enqaypi rikhuriyku: Jerusalempi tiyakojkuna, jinallataj israelitas, qaylla llajtaspi, chayri, karu llajtaspi tiyakojkunapis. Paykunata qan chay karu llajtasman wijch'orqanki, contraykipi sayarisqankurayku.

⁸ Noqaykupis Señor, reyesniyku jina, kurajkunasniyku jina, ñaupa tatasniyku jinataj p'enqaypi rikhuriyku contraykipi juchallikusqaykurayku.

⁹ Señor Diosniyku, qampi kashan khuyakoyqa, juchasta pampachaypis. Noqaykoqa contraykita sayarerqayku.

¹⁰ Señor Diosniyku, manataj qanta uyarisorqaykuchu, manataj kasukorqaykuchu, kamachisniyki profetasnejta yachachiwasqaykuta.

¹¹ Israelita runakunaqa, yachachisqasniykita tukuyninku mana kasorqankuchu. Kamachiyniykita kasunankuta qonqakaporqanku. Chayrayku kunanqa, kamachiyki Moisespa leynimpi juramentowan qelqasqa kashan chay maldicionqa pataykuman urmamuwayku, imaraykuchus contraykipi juchalliyku.

¹² Kay jatun jasut'ita apachimuspa qan junt'anki imatachus niwasqaykuta, noqaykuman, jinallataj kamachejkunamampis. Manapuni mundontimpi karqachu jayk'ajpis, Jerusalenman chayamun chay jasut'iman rijch'akojqa.

¹³ Tukuy kay jasut'eqa chayamuwayku, Moisespa leynimpi qelqasqa kasqanman jina. Noqaykurí, mana mask'asorqaykuchu, Señor Diosniyku, manataj sajra kausayniykuta saqerqaykuchu, nillataj cheqa kajtapis qhaterqaykuchu.

¹⁴ Chayraykumá, Señor, kay jasut'itaqa wakicherqanki, apachimuwarqaykutaj pataykuman. Qan, Señor Diosniyku, cheqan kanki tukuy ima ruwanaykipi, noqaykutaj mana uyarisuyta munarqaykuchu.

¹⁵ Señor Diosniyku, qan rikucherqanki jatun atiyniykita, aylluykita Egiptomanta orqhomuspa. Ajina ruwasqaykiwanqa, sutiyki jatumpaj qhawasqa kashan chay p'unchaykunamantapacha kunankama. Noqaykutaj juchalliyku, sajra kajtataj ruwayku.

¹⁶ Señor, yachayku may k'acha kasqaykita. Ama jinachu kay ari, Jerusalenmanta karunchay phiñakuyniykita, k'ajaj phiñakuyniykita, imaraykuchus llajtaykimin chayqa, chayllapitaj kashan ajllakusqayki lomaykipis. Tukuy muyuynimpi nacionesmanta kaj runakunaqa, Jerusalenmanta, aylluykimantapis asikunku, noqaykoj juchasniykurayku, jinallataj tatasniykoj juchasninkuraykupis.

¹⁷ Diosniyku, uyariy kay kamachiykej majakuspa mañakususqanta. Sutiykirayku, Señor, munakuywan qhawariy temployki kay jina llakiypi rikhurisqanta.

¹⁸ Diosniyku, uyarillawayku ari. Qhawariy kay jina mana imayoj rikhurisqaykuta, jinallataj sutiykita yupaychana llajtatapis. Mana kausayniykupi cheqanta ruwasqaykuta creekuspachu qanmanta majakushayku, mana chayqa qampa jatun khuyakuyniykipi creespa.

¹⁹ Señorníy, Señorníy! Uyariwayku, juchasniykuta pampachapuwayku. Uyarillawayku, Señor, jamuytaj yanaparinawaykupaj. Qanrayku, Diosníy, usqhayllata jamuy ari, imaraykuchus kay llajtayki, kay aylluykipis sutiykita oqharikunku.

Qanchis chunka semanamanta willasqa

²⁰ Diosmanta mañakushallarqanipuni, juchasniyta willakuspa, jinallataj Israel aylluypa juchasninta willaspa, Señor Diosniypa ñaupaqempi majakuspa ajllakusqan lomanrayku.

²¹ Ajinata mañakushajtiy, ñaupajta mosqoypi jina rikhuriwarqa Gabriel, phawamorqataj maypichus noqa kasharqani chayman, tardempi Diosman uywata wañuchispa rikhuchikuta jaywana chay horastaña.

²² Niwarqataj: Daniel, kunanqa jamuni kay imasta qanman sut'inchasunaypaj.

²³ Mañakuyta qallarisqaykitawan, Dios kutichisorqaña. Chayta willasunaypaj noqa jamuni, imaraykuchus Dios mayta munakusunki. Kunanqa, sumajta uyariy, kay jamoj imasmanta, chay rikusqaykimanta yachanaykipaj:

²⁴ Aylluyki, ajllasqa llajtaykipis, kayta yachachunku: Qanchis chunka semanas pasananku tiyan, Diospa contranta sayariykuna, juchallikuypis tukukunampaj; sajra kajta chinkachinapaj, wiñaypajtaj cheqa kajta churanapaj. Mosqoypi jina rikusqasniyki, profetaspa willasqasninku ima junt'akunankupaj, ajllasqa kajtaj jawisqa kanampaj.

²⁵ Kayta yachay; unanchaytaj: Jerusalén llajta watejmanta ruwakunampaj kamachisqa kanqa chay ratomantapacha. Kamachej Mesías chayamunankamaqa, qanchis semanas kanqa. Chanta Jerusalempa callesnin, muyuynimpi perqasnimpis watejmanta ruwasqas kanankamataj, sojta chunka iskayniyoj semanas kanqa. Chaypachataj manchay llakikuy p'unchaykuna kanqa.

²⁶ Sojta chunka iskayniyoj semanas qhepata chay Mesiasta wañuchenqanku. Uj rey jamuspa, Jerusalén llajtata, jinallataj templotapis runasninwan t'unaykuchenqa. Tukukoyqa usqhayllata chayamonqa, uj apaj mayu jina. Chay tukukuykama kallanqapuni maqanakuy t'unanakuypis, imaynachus nisqa kasqanman jina.

²⁷ Uj semanatawan, chay reyqa tratota ruwanqa ashkha runaswan. Chaupi semanamantataj rikuchiku uywa jaywanata, ofrenda qonatapis sayachenqa. Uywata wañuchispa Diosman jaywana altarpa ñaupaqempi ashkha millay imasta ruwanqanku, imachus ruwakunampaj nisqaña karqa chay, millay imasta ruwachejpa patanman urmamunankama.