Daniel (hebreo) 8 - Qheshwa Biblia DC

Ujtawan Danielqa mosqoypi jina rikun

¹ Rey Belsasar kinsa watataña kamachishajtin, noqa Daniel ñaupaj rikusqaymanta qhepata ujtawan rikullarqanitaj.

² Chay rikhuriwajta qhawashaspa, Susa nisqa llajtapi, Elam sutiyoj provinciaj capitalnimpi kashasqani, Ulai nisqa mayu cantopi.

³ Karusta qhawarerqani, mayu cantopitaj uj carnerota rikorqani. Iskay jatuchej wajrasniyoj karqa, ujnin kajqa aswan jatun ujninmantaqa. Kay kajtaj qhepamanta aswan jatunman wiñasqa.

⁴ Chay carnerotaqa rikorqani wajrashajta inti yaykuynejman, wichaynejman uraynejmantaj. Mana ima animalpis ñaupaqempi sayaykuyta aterqachu. Imatapis munasqanta ruwarqa, sapa kutimantataj aswan kallpayojman tukorqa.

⁵ Chay rikusqaypi unanchashajtillayraj, uj chivo rikhurimorqa inti yaykuynejmanta, phawaspa jina corremusharqa, manaña pampamampis sarurerqachu. Chay chivotaj ñawisnin chaupipi uj jatun wajrayoj karqa.

^6-7 Mayu cantopi rikusqay iskay jatuchej wajrayoj carnerotaqa qayllaykuspataj, tukuy kallpanwan wajraykorqa, iskaynin wajrasninta p'akirarqa. Carnerojtataj manaña kallpan karqachu kutichikunampajqa. Chanta chivoqa, carnerota pampaman urmachispa sarorqa, nitaj pipis karqachu wajrayninmanta qhechojqa.

⁸ Chivoqa manchayta jatunchakorqa, kallpampipuni kashajtintaj jatun wajranqa p'akirpayakorqa, chaynejllamantataj tawa wajras llojsiramorqanku, puntasnintaj tawantin ladosman qhawashaj karqanku.

⁹ Ujnin wajranmanta uj juch'uy wajrita llojsimorqa, chaytaj manchayta wiñarqa uraynejman, inti llojsimuy ladoman, k'acha jallp'a nisqa ladomantaj.

¹⁰ Chhikantapuni wiñarqa, janaj pachapi kajkunaman chayanankama. Chaykunamanta wakinta, jinallataj wakin qoyllurkunatawan urmarachimuspa sarurarqa.

¹¹ Janaj pachapi kajkunaj kurajnimpa contrampi ima sayaykorqa. Sapa p'unchay Diosman jaywana kajtapis chinkacherqa. Diosta yupaychana cheqatataj thuñerqa.

¹² Sajra kayninman jina, maypichus ñaupaj p'unchaykunapi Diosman jaywana kaj chayman soldadosninta tiyaykucherqa, cheqa kajtataj pampacharqa. Tukuy imatapis munasqanta ruwarqa, tukuy imataj paypajqa allin llojserqa.

¹³ Chay qhepata uyarerqani, uj angelqa waj angelta tapurishajta: Mayk'ajtaj tukukonqa sapa p'unchay jaywana altarpi rikukushan chayrí? Mayk'ajkamataj kanqa kay millay jucharí? Mayk'ajkamataj Señorpa wasinta, chanta, Señorpi creejkunatawan saronqankuri?, nispa.

¹⁴ Chay uj angeltaj kuticherqa: Iskay waranqa kinsa pachajniyoj p'unchaykuna, ch'isin paqarin junt'akunankama ajina kanqa. Chaymantaraj Diosta yupaychana waseqa llimphuchasqa kanqa.

¹⁵ Noqa Daniel qhawashajtiy, chay rikusqayqa imatachus niyta munasqanta yachayta munaspa, mana yuyasqallamanta ñaupaqeypi uj sayashaj, runaman rijch'akoj rikhuriwarqa.

¹⁶ Ulai nisqa mayumantataj runa parlamojta uyarerqani, nejta: Gabriel, chay runaman mosqoynimpi rikusqanta sut'inchay.

¹⁷ Chanta Gabrielqa qayllaykamuwarqa. Noqataj mancharikuywan pampakama k'umuykorqani, paytaj niwarqa: Runa, yachay, chay mosqoypi jina rikhurisojqa niyta munan, p'unchaykunaj tukukuyninmanta.

^18-19 Pay parlashawajtillanraj yuyayniy chinkawarqa, sinch'i puñuywan jina pampapi uyamanta wijch'usqa rikhurerqani, chanta, paytaj aysarispa sayarichiwarqa, chanta niwarqa: Sumajta willasqayki, Diospa phiñakuynin tukukojtinkama imachus jamonqa chayta, imaraykuchus chay rikhurisojqa tiempoj tukukuyninmanta willashan.

²⁰ Iskay wajrasniyoj carneroqa ninakun, Mediaj reyninman, jinataj Persiaj reyninman ima.

²¹ Chivoqa Greciaj reynin. Ñawisnin chaupipi kaj jatun wajrantaj ñaupaj kaj rey.

²² Chay jatun wajra p'akikojtinkama, cuentanmanta tawa wajras llojsiramorqanku chaykunaqa, niyta munan, kay nacionmanta tawa nacionkunaman t'aqakonqanku. Chaykunataj mana ñaupaj kaj jina atiyniyojchu kanqanku.

²³ Maypachachus kay nacionespa kamachinasninku tukukonqanku, juchallikuykunapis phullachirenqanku chaypachaqa, uj rey sayarenqa sajra parlayniyoj, ch'aukiyanapajtaj may churasqa.

²⁴ Atiyniyoj kanqa, manataj pay kikimpa atiyninwanchu, t'ukunapaj jinata t'unaykonqa, tukuy ima ruwasqampitaj atipanqa. Atiyniyoj runakunata chinkachenqa. Diospa ayllunmanta kaj ashkha ajllasqa runasta chinkachillanqataj.

²⁵ Ch'aukiyanapaj may churasqa kasqanrayku, ñaupajman renqa ch'aukiyaypi. Sonqompi may jatun kasqanta yuyakonqa. Sonqo tiyaypi kasqankuta creekoj runakunata ashkhata wañurachenqa. Kurajkunaj kurajnimpa contrampi sayaykonqa. Chay kuraj kajtaj, chay sajra reyta atipaspa chinkachenqa. Chaytataj ruwanqa mana runaj makinwanchu.

²⁶ Ch'isin paqarimpiwan rikhurejmantaqa sumaj willasqa kanki, chaytaj cheqapunimin. Kunanqa chayta sonqoykipi waqaychay, imaraykuchus unaymantaraj junt'akonqa.

²⁷ Noqa Danieltaj, reparakorqani kallpay pisiyawasqanta, ashkha p'unchaykunataj onqosqa tarikorqani. Chaymanta jatarikuspa uyarillarqanipuni nacionta kamachejpa ruwanasninmanta. Noqataj mayta t'ukusharqani chay jinata rikusqaymanta, mana unanchayta atispa.