Daniel (hebreo) 7 - Qheshwa Biblia DC

Tawa jatuchej animalespa rikhurisqan

^1-2 Uj tuta, Belsasar ñaupaj watata Babiloniapi rey kashajtin, Danielqa mosqoynimpi jina ashkha imasta rikorqa. Rijch'arispataj chay ratopacha qelqaykorqa mosqoynimpi rikusqasninta. Kaytaj chay qelqasqanqa: Noqa rikorqani mosqoyniypi, tawantin wayras janaj pachamanta phukumuspa, jatun qhochapi kaj yakusta qhollch'uqachejta.

³ Kaymanta jina, tawa jatuchej animales, sapa uj waj rijch'ayniyoj, chay jatun qhochamanta llojsiramorqanku.

⁴ Ñaupaj kajqa leonman rijch'akorqa, lijrasnintaj ankajta jina karqanku. Qhawashajtillayraj lijrasninta sik'irarqanku, pampamanta oqharerqanku. Chantá qhepa chakisninmantataj churarqanku, runa kikinta sayachispa, yuyaynintaj runaj yuyayninman tukuchisqa karqa.

⁵ Qhepa kaj animaltaj jukumariman rijch'akorqa, ujnin ladonqa aswan alto karqa ujnin ladonmantaqa. Kirusnin chaupipi kinsa wajtas karqanku, uyarerqanitaj payman nishajkunata: Jatarikuspa riy, atisqaykita aychata mikhumuy!, nispa.

⁶ Kinsa kaj animaltaj rijch'akorqa tigreman, wasampi tawa lijrasniyoj karqa. Chantapis tawa umayoj karqa, paymantaj atiy qosqa karqa.

⁷ Tawa kaj animalta rikorqani chaytaj ancha fiero karqa, manchachikunapaj jinapuni, manchay kallpayojtaj. Kirusnenqa fierromanta karqanku, jatuchejtaj. Tukuy imata oqoykorqa, t'unaykorqataj, puchojtataj sarorqa. Mosqoyniypi rikorqani chaykunamanta kay kajqa waj laya animalpuni karqa. Umampis chunka wajrasniyoj karqa.

⁸ Chay wajrasta qhawashaspataj rikorqani uj aswan juch'uy wajritata p'utumojta chay ujkunaj chaupinkumanta, chanta sik'irarqanku kinsa wajrasta, qhepata p'utumoj wajritaman campota qonankupaj. Chay juch'uy wajritaj ñawisnintaj runaj ñawisninman rijch'akorqanku, jatun jatunmanta parlaj simiyojtaj karqa.

Diospa juicion

^9-10 Qhawallarqanipuni, tronosta churanankukama. Uj ancianotaj tiyarikorqa. Paypa p'achantaj rit'i jina yuraj, umampi kaj chujchantaj llimphu millma jina karqa. Tronoqa ruedasnimpis larwaj nina jina karqanku, ñaupaqenmantataj uj nina mayu llojserqa. Waranqa waranqastaj payta sirverqanku, millones millonestaj paypa ñaupaqempi sayarasharqanku. Juezqa tiyarikorqa juzgayta qallarinampaj, librostaj kicharisqas karqanku.

¹¹ Chay juch'uy wajritata uyarisharqani, may jatunchakuspa t'ukuna imastataj parlajta, chanta qhawashajtillayraj chay fiero animalta wañucherqanku, chanta ninaman choqaykorqanku ruphanampaj.

¹² Ajinallatataj chay ujkuna animalesmanta atiyninkuta qhechorqanku, chaywampis chaykunaqa saqesqas karqanku kausanallankupajpuni wañunanku p'unchay chayamunankama.

¹³ Noqa qhawashallarqanipuni chay mosqoypi jina rikhurejkunata tutapi. Rikorqani phuyus chaupipi jamojta; uj runaman rijch'akojta. Paytaj rerqa maypichus Anciano kasharqa chayman, paymantaj qayllaykucherqanku.

¹⁴ Paymantaj atiyta qorqanku, chanta k'anchayniyoj kayta, llajtasta kamachiytapis. Tukuy nacionesmanta kaj runakuna, tukuy parlaymanta kaj runakunataj payta sirverqanku. Atiynintaj kikillampuni kanqa, kamachinantaj mana jayk'ajpis t'unasqachu kanqa.

^15-17 Noqa Daniel, reparakorqani manchachikorqanitaj. Chay tukuyta rikusqaymanta llakikuspa, qayllaykorqani, chaynejpi sayarasharqanku chaykunaman, paykunamanta ujnin kajmanta mañakorqani, chay tukuy rikusqasniyta sut'inchanawanta. Paytaj sut'inchanawampaj uyariwarqa, niwarqataj: Kay tawantin jatuchej fiero animalkunaqa, tawa reykuna kanku, paykunataj mundontimpi runakunata apaykachanqanku.

¹⁸ Chay qhepatataj reinoqa, jatun atiyniyoj Diospa ayllunman qosqa kanqa, paypatataj kanqa wiñaynintimpaj.

¹⁹ Noqa munarqani astawan yachayta tawa kaj jatun animalmanta. Chay animalqa waj jinapuni karqa chay ujkunamantaqa, imaraykuchus rijch'aynenqa chay jina fiero karqa: Fierromanta kirusnin karqa sillusnintaj broncemanta. Tukuy imata oqoykorqa t'unaykorqataj, puchojkunatataj sarurarqa.

²⁰ Aswan yachayta munallarqanitaj chay chunka wajrasniyojmanta, juch'uy wajramantawan, chaytaj ñawisniyoj karqa, jatunmanta parlaj simiyojtaj. Chay wajraqa, ujkuna wajrasmanta aswan jatunman jich'awarqa. Kinsa wajrasta urmarasqanku, payman campota qonankupaj.

²¹ Chanta rikorqani kay wajrata maqanakojta Diospa ayllumpa contranta, atiparqataj.

²² Chanta Ancianoqa chayamuspa jatun atiyniyoj Diospa ayllunta cheqanyacherqa, imaraykuchus p'unchaykuna junt'akorqankuña Diospa ayllun reinoman yaykupunampajqa.

²³ Chay Ancianotaj nerqa: Tawa kaj jatun animalqa, niyta munan: Kay pachapi kanqa tawa kaj reino. Chay reinotaj waj jina kanqa chay ujkunamantaqa. Tukuy jallp'ata oqoykonqa, saruraspataj t'unaykonqa.

²⁴ Chunka wajrastaj chunka reyes kanku. Paykuna chay reinopi kamachenqanku. Paykunaj qhepanta wajñataj wicharenqa kamachinampaj. Chay kamachejtaj waj jinapuni kanqa ñaupajta karqanku chaykunamantaqa. Urmachenqataj chay reykunamanta kinsata.

²⁵ Jatun atiyniyoj Diospa contranta rimanqa, Diospa ayllunta ñak'arichispa chinkachinayanqa. Diospa kamachiyninta, fiestastapis waj jinaman tukuchiyta munanqa. Diospa aylluntaj makimpi kanqa, kinsa tiempos khuskanniyojkama.

²⁶ Juezkunataj uj juiciota ruwanqanku. Chay kamachejpata atiynintaj qhechusqa kanqa, chanta chinkachisqataj kanqa.

²⁷ Kay jallp'api tukuynin llajtaspa reinosninku, atiyninku, jatun kayninkupis, jatun atiyniyoj Diospa ajllakusqan aylluman qopusqa kanqanku. Chay kamachinantaj wiñaypaj sayanqa, kay pachapi kaj tukuynin llajtakunataj paytaqa sirvenqanku, kasukonqankutaj.

²⁸ Kaypi tukukun chay parlawasqanqa. Noqa Danieltaj, may llakisqa tarikorqani, uyaypis waj jinaman tukorqa, manataj pimampis willarqanichu kay rikusqaytaqa.