Daniel (hebreo) 4 - Qheshwa Biblia DC

Rey Nabucodonosorpa t'ojpikuynin

¹ Noqa rey Nabucodonosorqa, munani tukuynin runakuna sonqo tiyaykusqa kanankuta, chanta ñaupajmantaj rinankuta, tukuy llajtakunamanta, nacionkunamanta kajkuna, tukuy laya parlayniyojkunataj.

² Munani qankuna yachanaykichejta, chay chhika t'ukuna imasta may jatumpi kaj Diosqa noqawan ruwasqanta.

³ May jatuchaj kanku t'ukunapaj jina ruwasqasnin, milagro ruwasqasnimpis! Rey kaynenqa manapuni tukukonqachu, atiynintaj miraymanta waj miraynintinkama kanqa.

⁴ Noqa Nabucodonosor, mana ima llakiyniyoj tiyakusharqani palacioypi kusikuspa, tukuy imapi qhapajyaspataj.

⁵ Uj ch'isipitaj, puñunaypiña kashaspa, uj mosqoyniy mancharichiwarqa, jinallataj yuyaykuna, rikuykunataj umayman junt'aspa musphachiwarqa.

⁶ Chantá kamacherqani Babiloniapi kaj tukuynin yachayniyoj runakuna watukoj jamunawankuta, sut'inchanawankutataj chay mosqoyniy imastachus niyta munasqanta.

⁷ Tukuyninku yachayniyoj runakuna jamorqanku, yatirikuna, yachaysapa kajkuna, jinallataj qoyllurkunamanta yachajkunapis Babiloniamanta. Noqataj paykunaman willarqani mosqoyniyta, manataj sut'inchayta atiwarqankuchu, chay mosqoyneyqa imatachus niyta munasqanta.

^8-9 Chay qhepatataj Daniel jamuwarqa, Beltsasar sutiyoj payqa, diosniypa jatun sutinmanta sutinniyoj. Paypa kausaynintaj Santo Diospa Espiritunwan pusaykachasqan, paymantaj mosqoyniyta willakorqani kay jinata: Beltsasar, yatirikunaj kurajnin, noqa yachani, Santo Diospa Espíritun pusaykachasusqanta, tukuy pakasqa imastataj yachasqaykita. Willariway ari, imatachus mosqoyniypi rikorqani chayta, imatatajchus niyta munasqanta chay mosqoyniy.

¹⁰ Kaykuna kanku, puñunaypi kashaspa mosqoypi jina rikusqasneyqa: Jallp'a chaupipi uj may jatun sach'a karqa.

¹¹ Chay sach'aqa wiñarqa, manchaytataj rakhuyarqa, puntantaj janaj pachakama chayarqa, may karu jallp'amantapis rikukuyta aterqa.

¹² Laqhesnintaj chay jina k'achaspuni karqanku, poqoynintaj may ashkha karqa, tukuynin runakuna mikhojtimpis mana tukukoj karqa. Campopi kaj animalkuna llanthunman chimparqanku. Ramasnimpi p'isqokuna thapachakorqanku. Kay pachapi tukuy kausajkunataj chay sach'arayku kausayta tarerqanku.

^13-14 Kaymanta jinalla chay rikuyniypi uj qhawaj angelta rikorqani janaj pachamanta uraykamojta, jatunmanta qhaparispa nerqa: Sach'ataqa uraman choqaykuychej, ramasninta k'uturaychej, laqhesninta t'ipiraychej, poqoynintataj qhallirpariychej. Llanthumpi kashanku chay animalkunaqa ayqechunku, ramasnimpi tiyarishanku chay p'isqokunapis.

¹⁵ K'ulluntataj saphisnintawan jallp'api saqeychej, fierro cadenawan bronce cadenawantaj wataykuspa saqeychej. Campo qhoras chaupipitaj saqeychej. Chhullaykamuchun patanman, animalkunawan khuskataj campopi qhorata mikhuchun.

¹⁶ Yuyaynin waj jinaman tijrakuchun, animalpa yuyayninman jinataj kutichun. Chay mana allin kaynintaj qanchis wata junt'a kachun.

¹⁷ Chay jina ruwakunanta kamachinku allinta qhawaj santo angelkunaqa, tukuyninku runakuna yachanankupaj jatumpi kaj Diosqa atiyniyoj kasqanta llajtata kamachinku chaykunaj patampi; pay atiyninta qosqanta kamachinampaj pimanchus qoyta munasqanman; uj naciompi kuraj kanampajtaj churasqanta aswan pisi yachayniyoj runata.

¹⁸ Kay jinata noqa rey Nabucodonosorqa, mosqoyniypi rikorqani. Kunanqa, Beltsasar, niway imatachus chay mosqoyneyqa niyta munasqanta, imaraykuchus mana mayqen yachayniyojpis reinoypi kajkunaqa yachayta atinchu. Qanrí atiwaj sut'inchayta, imaraykuchus Santo Diospa espíritun qampi kashan.

¹⁹ Chantá Danielqa, pitachus suticharqanku Beltsasar nisqata, pay uj ratota t'ukurerqa, umanman yuyaykuna jamojtin may maycharisqa karqa. Noqa reytajrí, payta nerqani: Beltsasar, ama llakikuychu chay mosqoyniymantaqa, ni sut'inchayninmantapis. Beltsasartaj kutichispa nerqa: Way, mosqoyniykipi imatachus niyta munan chay tukoyqa urmachun pikunachus chejnisunku chaykunaj patanman!

²⁰ Qan, reyqa, rikorqanki jatun rakhu sach'ata, janaj pachakama puntan chayasqata, karu jallp'amantapachataj rikukushajta.

²¹ K'acha laqhesniyoj may ashkha poqoyniyojtaj karqa, tukuynin runakuna mikhojtimpis mana tukukoj karqa. Llanthunman campo animalkuna llanthukoj chimparqanku, ramasnimpitaj p'isqokuna thapachakorqanku.

²² Wiñarqa atiyniyojtaj karqa chayqa, qan rey, kanki chay sach'aqa. Rey kasqaykipi jatunyasqaykeqa yapakun janaj pachaman chayanankama, kamachisqaykitaj tukuynin jallp'api, uj cantomanta ujnin cantokama jatunyan.

²³ Reyníy, qan rikullarqankitaj uj qhawaj santo ángel janaj pachamanta, uraykamojta nerqantaj: Sach'ata uraman choqaykuychej, t'unaykuychejtaj. K'ulluntataj saphisnintawan jallp'api saqeychej. Wataykuychejtaj fierro cadenawan, bronce cadenawantaj, saqeychejtaj campo qhoras chaupipi. Patanman chhullas urmachun, animalkunawan khuskataj campopi qhorasta mikhuchun qanchis watas junt'ata.

²⁴ Kayqa niyta munan, reyníy, contraykipi patapi kaj Dios kay jasut'ita wakichisqanta.

²⁵ Reyníy, runakunamanta t'aqasqa kanki, animalkunawantaj kausanki. Qhorasta mikhunki bueyes jina, chhullataj cuerpoykita joq'onqa. Ajinata kausanki qanchis watas junt'ata, rejsinaykikama patapi kaj Dios atiyniyoj kasqanta, llajtakunata kamachishanku tukuy chaykunaj patampi kasqanta, paytaj churasqanta kamachinankupaj munayninman jina.

²⁶ Sach'a k'ulluta saphisnintawan saqenapaj kamachisqaqa niyta munan, rey kayniykeqa kutimpusunanta, maypachachus rejsinki Dioslla atiyniyoj kasqanta chaypacha.

²⁷ Chayrayku, kay nisusqayta kasuway: Rey kayniykipi cheqanta ruway, amataj aswan juchalliychu. Sajra kausayniykita saqespa, pisipachikoj wajcha runakunata yanapay. Ichapis ajinamantaqa kausakunki mana ima llakiyniyoj, tukuy imapipis allillan risonqa aswan unaykamataj.

²⁸ Tukuy kay imas rey Nabucodonosorman willasqa karqa chaykunaqa junt'akorqanku:

^29-30 Uj wata qhepamanta, reyqa, Babiloniapi kaj palaciompi puriykashaspa, nerqa: Qhawariychej, kay jina jatun Babiloniaqa! Noqa jatun atiyniywan sayaricherqani reinoypa capitalnin kanampaj, ajinamanta jatun kasqay yuyarisqa kanampaj.

³¹ Chay jinata rey parlashajtillanraj, janaj pachamanta uj parlamojta uyarikorqa: Kayta uyariy, rey Nabucodonosor. Kamachinayki llajtaqa manaña qampatachu.

³² Runakunamantaqa t'aqasqa kanayki tiyan, uywakunawantaj kausanayki tiyan. Bueyes jina qhorata mikhunki qanchis watas junt'ata, rejsinaykikama jatumpi kaj Dioslla atiyniyoj kasqanta, jallp'api tukuynin nacionkunaj patampi, payllataj kamachejkunata churasqanta pikunatachus munasqanta.

³³ Chay ratopachataj junt'akorqa chay jasut'imanta willasqanqa. Nabucodonosortaj runakunamanta t'aqasqa karqa. Bueyes jina qhorata mikhorqa, chhullataj cuerponta joq'orqa, chujchasnin, sillusnimpis wiñaykorqanku, ankajpata jina kanankama.

Nabucodonosorpa jampikuynin

³⁴ Jasut'i p'unchaykuna junt'akojtin, noqa Nabucodonosorqa, janaj pachata qhawarerqani, loco kayniymantataj thañisqa kasqayta reparakorqani. Chaypacha, Jatun Diosta yupaycharqani, kay palabraswantaj wiñaypaj kausayniyojta jatuncharqani: Paypa atiynenqa wiñaypajpuni. Llajtakunata kamachinantaj miraypa miraynintimpaj kanqa.

³⁵ Paypa ñaupaqempi mana imapis kankuchu kay jallp'a patapi tukuy tiyakojkunaqa. Pay ruwan munayninman jina, janaj pachapi, jinallataj kay pachapipis. Mana pipis kanchu Diospa atiyninman sayaykojqa, manallataj pipis payta tapurinmanchu, imarayku jinata ruwanki?, nispa.

³⁶ Chay ratopacha yuyayniyman churakorqani, chanta may jatun kamachinayman, honorniyman, jatun kayniymantaj kutirerqani. Ministrosniy, jatumpi kaj runasniy gobiernoymanta kajkuna noqata mask'aspa jamorqanku. Watejmanta nacionniyta kamachinaypaj churakorqani, ñaupajta karqani chaymanta aswan atiyniyoj kanaykamaraj chayarqani.

³⁷ Kunan ari, noqa Nabucodonosor, yupaychani, honrani, jatunchanitaj janaj pachapi kaj Reyta, imaraykuchus ruwaynenqa, cheqapuni, cheqantaj. Jatunyakojkunatataj pay k'umuykachachiyta atin.