Daniel (hebreo) 2 - Qheshwa Biblia DC

Rey Nabucodonosorpa mosqoynin

¹ Nabucodonosorpata ashkha mosqoynin tiyaporqa iskay wataña rey kashajtin. Chayrayku payqa anchata llakikuspa mana puñuyta aterqachu.

² Chanta wajyacherqa aysirista, yatirista, layqasta, yachayniyojkunatawan, mosqokusqasnin imatachus niyta munasqanta ninankupaj. Paykuna rerqanku, chimparqankutaj reyman.

³ Reytaj paykunata nerqa: Ujta mosqokuni. Kunan yachayta munashani, imatachus chay mosqokusqay niyta munasqanta.

⁴ Yachayniyojkunataj reyman nerqanku: Atiyniyoj rey, kausayniyki wiñaypaj kachun. Mosqokusqaykita willariwayku, chanta noqayku willasusqayku, chay mosqoyniykeqa imatachus niyta munasqanta.

⁵ Reytaj paykunaman kutichispa nerqa: Sichus qankuna mana willawankichejchu imatachus mosqokusqayta, ima niytatajchus chay mosqoyniy munasqanta chaypachaqa, allinta yachaychej kayta: Qankuna t'unasqas rikhurinkichej, wasisniykichejtaj thuñisqas kanqanku.

⁶ Sitajchus niwankichej imatachus mosqokusqayta, chanta ima niytatajchus chay mosqokusqay munasqanta willawankichej chayqa, t'inkata qosqaykichej, yanapasqaykichej, may jatumpajtaj jap'isqaykichej. Ajina ari, niwaychej imatachus mosqokusqayta, chay mosqoyniytaj imatachus niyta munasqanta allinta willawaychej.

⁷ Yachayniyojkunataj iskay kaj kutita reyman kuticherqanku: Reyniykoqa willariwachuyku ari imatachus mosqokusqanta, noqaykutaj sumajta willasqayku, chay mosqoyqa imatachus niyta munasqanta.

⁸ Reytaj kuticherqa: Noqa allinta yachani, tiempota qhasillapaj pasachiyta munashankichej, imatachus ruwayta munashani chayta uyarisqaykichejrayku.

⁹ Chayraykumá kunanqa imatachus mosqokusqayta mana willawankichejchu chayqa, tukuyniykichej uj rej juchachayllata jap'ikunkichej. Uj yuyayllaman tukunkichej llullakuspa mana kajta kutichinawaykichejpaj, chaykama tiempo pasananta suyaspa. Qankuna niwaychej imatachus mosqokusqaytaqa. Chaytachus willawankichej chayqa, atillankichejtaj willawayta chay mosqoyneyqa imatachus niyta munasqantapis.

¹⁰ Yachayniyojkunataj kutichispa nerqanku: Kay pachapi mana kanchu pipis imatachus reyqa yachayta munashan chayta willayta atinampajqa. Waj jinamantaqa, mana jayk'ajpis, manataj ayqen reypis may atiyniyoj kasqampiwan, kayman rijch'ajtaqa imatapis mañarqachu. Manapuni mayqen aysirimanta, nitaj yatirimantapis, nillataj yachayniyojkunamantapis.

¹¹ Reypa mañasqanqa manapuni atinapaj jinachu. Mana pipis kanchu chay mosqoyta ninampajqa. Dioskunalla chaytaqa niyta atinkuman. Paykunatajrí, mana runaswanchu tiyakunku!

¹² Kayta uyarispataj reyqa manchayta phiñakorqa, kamacherqataj wañurachinankuta Babiloniapi kaj tukuynin yachayniyojkunata.

¹³ Chay kamachiy llojsisqanmantawan, Danielta, paywan khuska karqanku chaykunatawan mask'allarqankutaj, paykunatapis wañurachinankupaj.

Daniel sut'inchan reypa mosqoyninta

¹⁴ Chanta Daniel parlarerqa Ariocwan, may yachaywan allin yuyaywantaj. Ariocqa karqa, reypa palaciompi sirvejkunajpata kamachejnin. Chantapis payllataj wakichisqaña karqa, Babiloniapi tukuynin yachayniyojkunata wañurachinampaj.

¹⁵ Daniel tapurerqa payta: Imaraykutaj reyqa kamachiyta qon chay jinatapuniri?, nispa. Arioctaj sut'inta willarqa Danielman, imajtinchus jina kasqanta.

¹⁶ Chanta Daniel rerqa reyta waturej. Paymanta mañakorqataj uj pisi tiempotawan suyarinanta, reypa mosqoyninta sut'inchayta atinampaj, willanampajtaj imatachus niyta munasqanta chay mosqoynin.

¹⁷ Chay rato Danielqa wasinman riporqa. Chantá willarqataj tukuyta imachus kasqanta Ananiasman, Misaelman, Azariasmantaj, mayqenkunachus paywan khuska karqanku chaykunaman.

¹⁸ Paykunata wajyarqa, janaj pachapi kaj Diosmanta yanapata mañakunankupaj, chay mana yachay atina mosqoy payman sut'inchasqa kanampaj. Ajinamanta ama paykuna wañurachisqas kanankupaj Babiloniapi kaj yachayniyojkunawan khuska.

^19-20 Chay tutapi Danielman, chay mana yachay atina pakasqa mosqoyqa sut'inchasqa karqa uj rikuypi, chaymanta janaj pachapi kaj Diosta Daniel yupaycharqa, kay palabraswan: Diospa sutenqa wiñaynintinkama yupaychasqa kachun, imaraykuchus yachayqa, atiypis paypata kanku.

²¹ Paymin tiemposta, watastapis waj jinaman tukuchin, reyesta qhechun sayachinta. Yachayta qon yachayniyojkunaman, aswan rejsiytataj tukuy imata rejsejkunaman.

²² Dios sut'ita rikuchin pakaypi kaj imasta, mana yachay atina imastapis. Laqhapi kaj imastapis pay rikun. K'anchayqa paypimin kashan.

²³ Tatasniypa Diosnin, qanman graciasta qoyki, yupaychaykitaj. Qan yachayniyojta ruwawanki, kallpachawankitaj. Kunantaj sut'ita rikuchiwanki imatachus mañakususqaykuta. Rikuchiwaykuñataj imatachus rey yachayta munasharqa chaytapis.

²⁴ Chanta Daniel rerqa Ariocta watukoj. Paytaqa rey kamachisqa Babiloniapi kaj yachayniyojkunata wañurachinampaj. Nerqataj: Ama wañurachiychu yachayniyojkunata. Pusaway reypa ñaupaqenman, noqataj sut'ita willasaj tukuy msqoyninta.

²⁵ Chay rato Arioc pusarqa Danielta rey Nabucodonosorpa ñaupaqenman, nerqataj reymanqa: Jallp'ankumanta wijch'usqa kanku chay judiokunamanta uj qharita tarini. Pay sut'ita willanqa reypa mosqoyninta, chanta imatachus chay mosqoynin niyta munasqantawan.

²⁶ Chaypacha reyqa, Beltsasar nisqata suticharqanku chay Danielta nerqa: Qan atiwajchu niwayta imatachus mosqokusqayta, chay mosqoyniytaj imatachus niyta munasqanta?, nispa.

²⁷ Daniel kuticherqa: Mana kanchu uj yachayniyojpis, ni pi yatiri, ni yachaj, nitaj k'anchaykunata rejsejkuna, willayta atinampaj, rey yachayta munashan chay pakasqa imataqa.

²⁸ Chay tukuywampis janaj pachapi uj Dios tiyan. Payqa sut'ita rikuchin pakaypi kaj tukuy imasta. Paymin rey Nabucodonosormanqa sut'ita rikuchin, imaschus jamoj p'unchaykunapi chayamunanta. Kayqa, reyman willasaj mosqoyninta, imaschus rikhurerqa puñushajtin chayta.

²⁹ Arí rey, qanqa puñunaykipi kasharqanki, yuyayniykimantaj chayamusorqa imaschus qhepa p'unchaykunapi kanqa chay imasmanta. Pakaypi kaj imasta sut'inchaj Diostaj rikuchisunki, imaschus jamoj p'unchaykunapi kanqa chaykunata.

³⁰ Noqamampis kay mana yachay atina pakasqa kajta Dios rikuchiwarqa. Manamin tukuy runasmanta aswan yachayniyoj kasqayraykuchu, mana chayqa reyman sut'ita willanaypaj, imatachus niyta munasqanta chay mosqoynin, ajinamanta reyqa yachanampaj imastachus sonqompi yuyaychakusharqa chay imasmanta.

³¹ Arí rey, mosqoyniykipi rikorqanki uj may jatun lliphipiyniyoj lantita. Mancharinapaj jina karqa. Chay lantitaj ñaupaqeykipi sayachisqa karqa.

³² Lantej umanqa qori purumanta karqa. Pechonwan makisninwantaj qolqemanta karqanku. Wijsantaj rakhu piernasnimpis broncemanta karqanku.

³³ Ñañu piernasnenqa fierromanta karqanku. Chakisnintajrí khuskan fierromanta, khuskantaj t'urumanta karqanku.

³⁴ Chanta qhawashajtillayki, orqomanta uj rumi, mana pejpa kachaykamusqallan urmamorqa, chay lantej chakisninman qomuspataj t'unaykorqa.

³⁵ Chay rato ujllata chay fierropis, t'urupis, broncepis, qolqepis, qoripis ñut'usqas karqanku, imaynatachus chajra oqharina tiempopi trigo trillakojtin q'oshñilla jatarin ajinata. Chanta wayrataj oqharerqa mana imata puchuchispa. Lantita t'unaykorqa chay rumitajrí, uj jatun orqoman tukorqa, tukuynin jallp'amantaj junt'aykorqa.

³⁶ Ajinamin chay mosqoyniyki karqa. Kunantaj reyman sut'inchasaj imatachus niyta munasqanta chay mosqoynin.

^37-38 Tukuynin reyesmanta aswan atiyniyoj reymin qan kanki. Janaj pachapi kaj Diosqa qosunki reinota, atiyta, kallpata ima, jatumpaj qhawasqa kanaykipaj, tukuynejpi runas tiyakunku chaykunata kamachinaykipaj. Chantapis uywasta, p'isqosta, qampa makiykiman churan kamachinaykipaj. Chayrayku chay qori umaqa qan kanki.

³⁹ Kaymanta qhepata waj reino jatarenqa, qampa reinoykimanta aswan pisi atiyniyojlla. Chay qhepata kinsa kaj reinoqa bronce jina kanqa, chaytaj tukuy kay pachapi kamachenqa.

⁴⁰ Chaypa qhepanta jamullanqataj uj tawa kaj reino, chaytaj fierro jina sinch'i kanqa. Imaynatachus fierroqa tukuy imata p'akin t'unantaj, ajinata chay reinoqa tukuy wajkuna reinosta urmachenqa t'unaykonqataj.

⁴¹ Imaynatachus qan reyqa, chay lantej chakisnimpi dedosnimpipis rikorqanki khuskan fierromanta, khuskantaj t'urumanta. Kayqa niyta munan, chaypacha reinoqa t'aqanasqa kanqa. Chay reinotaj uj pisi fierrowan sinch'ichasqa kanqa, imaynatachus qan rikorqanki fierrota t'urutawan chajrusqata, ajinata.

⁴² Chay lantej chakisnimpa dedosnenqa wakinnej fierromanta, wakintaj t'urumanta karqanku. Kayqa niyta munan, chay reinoqa wakinnejpi sinch'i kanqa, wakinnejpitaj kallpa pisi kanqa.

⁴³ Ajinaqa, imaynatachus qan rikorqanki fierrota t'uruwan chajrusqata, kikinta chay p'unchaykunapi reinosqa chajrukonqanku casarakuykunanejta; manataj ujllaman tukuyta atenqankuchu, imaynatachus fierroqa t'uruwan mana chajrukuyta atinmanchu ajinata.

⁴⁴ Chay reykuna kamachishajtinkutaj, janaj pachapi kaj Dios uj reinota sayarichenqa, chaytaj mana jayk'ajpis t'unasqachu kanqa manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa.

⁴⁵ Chaytamin niyta munan reypa rikusqan rumi mana pejpa tanqarimusqallan orqomanta choqakamojqa. Chay rumitaj fierrota, bronceta, t'uruta, qolqeta, qoritapis ñut'u polvoman tukucherqa chayqa. Jatun Diosqa rikuchin reyman, imachus kananmanta qhepa p'unchaykunapi. Mosqokusqaykeqa cheqamin, sut'inchaynimpis cheqapunitaj.

⁴⁶ Chaypacha rey Nabucodonosorqa Danielpa ñaupaqenman qonqorikorqa, pampakamataj k'umuykukorqa. Chanta kamacherqa uywasta ñak'aspa jaywanankuta payman, inciensotataj q'osñichinankuta.

⁴⁷ Chanta Danielman nerqa: Cheqamanta Diosniykichejqa aswan jatun tukuynin dioskunamanta. Paymin reykunaj Señornenqa, tukuy pakaypi kajta sut'inchajtaj. Qan aterqanki kay pakaypi kaj imasta sut'inchayta.

⁴⁸ Chaypachamanta reyqa Danielta jatun puestoman churarqa, k'acha t'inkastataj payman qorqa. Babiloniapi kamachinampajtaj payta churarqa. Chay naciompi tukuynin yachayniyojpa jatun kamachejnin kanampajtaj churasqa karqa.

⁴⁹ Danielpa mañasqanman jina Sacracta, Mesacta, Abed-negotawan rey churarqa aswan kuraj puestosman Babilonia llajtapi. Danieltaj tiyakorqa reypa tiyakunan wasipi.