Daniel (hebreo) 12 - Qheshwa Biblia DC

Tukukuy p'unchay

¹ Chaypacha aylluykita qhawaj kuraj ángel Miguelqa rikhurimonqa. Chaypachataj may llakiy kanqa. Chay jinaqa manapuni jayk'ajpis karqachu runas kasqankumantapacha. Chay tiempo chayamojtintaj aylluykimantaqa libropi sutisnin qelqasqa kajkunalla salvasqas kanqanku.

² Jallp'aj sonqompiña puñojkunamanta ashkhas rijch'arimonqanku, ujkunaqa wiñayta kausanankupaj, wakinkunataj, wiñaj p'enqaypi, wiñay phutiypitaj kanankupaj.

³ Yachayniyoj runasqa, janaj pacha jina lliphipiranqanku. Ashkha runasman cheqa kajta yachachejkunataj, wiñaypaj lliphirenqanku estrellas jina!

⁴ Qantaj Daniel, kay imastaqa sonqoykipi pakay, sellaykuytaj librota tukukuy p'unchay chayamunankama. Ashkha runas kayman jaqayman puriykachanqanku, astawan yachayta munaspa.

⁵ Noqa, Daniel, rikorqani iskay waj runasta, mayoj sapa cantompi ujtakama sayashajta.

⁶ Ujnintaj taporqa linomanta p'achayoj runata, chaytaj mayu chaupipi yaku patapitaj sayasharqa: Mayk'ajtaj tukukonqa kay t'ukuna imasri?, nispa.

⁷ Linomanta p'achayoj runaqa, makisninta janaj pachaman oqharispa, kausaj Diospa sutimpi juraspa nerqa: Kinsa tiempo khuskanniyojmanta, maypachachus Diospa ayllumpata atiynin mana atipasqañachu kanqa, chaypacha kay tukuynin imasqa tukukonqa.

⁸ Noqataj uyarerqani imatachus nishajta, manataj imatapis entiendeyta aterqanichu. Chanta tapurerqani: Señorníy, kay tukuy imas qhepamanta imastaj kanqari?, nispa.

⁹ Paytaj kutichiwarqa: Daniel, ñanniykita rillaypuni, kay imasqa pakayllapirajpuni kanqanku, tukuykuy p'unchay chayamunankama.

¹⁰ Ashkhastaj kanqanku llimphuchasqas, rit'iyachisqas, allinchasqastaj. Mana allin runastaj sajra imasta ruwallanqankupuni, mana unanchakuspa imachus kasqanta. Yachayniyoj runastaj tukuy imata allinta unanchakonqanku.

¹¹ Waranqa iskay pachaj isq'on chunkayoj p'unchaykuna pasanqanku, Diosman sapa p'unchay jaywana kajta saqerasqamantapacha, Diosta yupaychana wasipi, imachus mana yupaychana kajllata churasqa karqa chaymantapacha.

¹² Kusikuyniyojmin pichus waranqa kinsa pachaj kinsa chunka phishqayoj p'unchaykuna junt'akunankama suyajqa.

¹³ Qantaj, Daniel, purillaypuni tukukuykama, chanta samarikunkitaj. Qhepa p'unchaykunapitaj jatarikunki t'inkaykita jap'ikapunaykipaj.