Daniel (hebreo) 10 - Qheshwa Biblia DC

Danielqa mosqoypi jina rikullantaj

¹ Persiamanta kaj Ciro, kinsa watataña rey kashajtin, Daniel Beltsasar nisqa, uj palabrata uyarisqa; chay palabrataj cheqapuni karqa. Imatachus niyta munasqataj mana yachayta atinapaj jinachu karqa. Chay tukuywampis, Danielqa, sumajta chay palabrastaqa unancharqa, yacharqataj imatachus niyta munasqanta.

² Jaqay p'unchaykunapi, noqa Danielqa, kinsa semana junt'ata may llakisqa kasharqani.

³ Allin kaj mikhuytapis mana mikhorqanichu, mana aychata llamerqanichu, nitaj vinotapis. Nillataj q'apaj jawinawampis churakorqanichu, chay kinsa semanas tukukunankama.

⁴ Chay watapi, ñaupaj killamanta iskay chunka tawayoj p'unchaypi, Tigris nisqa jatun mayu cantopi noqa kasharqani.

⁵ Chay rato qhawarispa, rikorqani uj runata, linomanta ruwasqa p'achayojta, sumaj kaj qorimanta ruwasqa chumpiwan chumpillisqatataj.

⁶ Cuerponqa topacio rumi jina lliphiperqa, uyanrí, lliuj lliuj jina k'ancharerqa. Ñawisnenqa k'anchashaj lámparas jina karqanku. Makisnin chakisnintaj bronce jina lliphipisharqanku. Parlasqantaj ashkha runaspa parlasqanman rijch'akorqa.

⁷ Noqa sapallay rikorqani chay jina rikhurejtaqa, noqawan kasharqanku chay runakunaqa ni imata repararqankuchu, imaraykuchus mayta mancharikuspa juñarikaporqanku pakakamunankupaj.

⁸ Sapallay kasharqani chay jina rikhuriwajta qhawaspa. Manchay q'ellumantaj tukorqani, reparakorqanitaj kallpay pisiyawasqanta.

⁹ Parlajta uyarispataj mana yuyayniyoj urmarqani, pampakamataj uyamanta k'umpukorqani.

¹⁰ Chay rato, uj maki jap'iykuwaspa aysariwarqa, thalariwaspa qonqorisqata, makisniytataj pampaman churasqasta saqewarqa.

¹¹ Chanta niwarqa: Daniel, Diospa may munasqa runan, uyariway allinta imatachus nisqayki chayta: Sayarikuy, noqaqa qanman kachamusqa kani. Chay palabrasta parlayta tukuchisqantawan, mancharisqa kharkatitispa sayarikorqani.

¹² Chaypacha niwarqa: Ama mancharikuychu, Daniel. Qanqa ñaupaj p'unchaymantapacha, mana entiendeyta atikoj imasta yachayta munaspa, Diosman k'umuykukuyta yuyaychakorqanki. Chaymantapacha, Dios uyarisorqa paymanta mañakusqaykita. Chayrayku noqa jamorqani.

¹³ Persiata waqaychaj angelqa jark'awarqa iskay chunka p'unchay junt'ata. Migueltaj, atiyniyoj angelkunamanta uj ángel jamorqa yanapanawampaj, imaraykuchus noqa sapallay qhepakusqani Persiamanta kaj reyeswan khuska.

¹⁴ Allinta willasunaypaj jamuni, imachus qhepa p'unchaykunapi aylluykiman jamonqa chayta. Kay rikusqaykeqa, chay p'unchaykunamantamin kashan.

¹⁵ Chayta ninawankamaqa, pampa qhawarisqa kasharqani, manataj uj simillatapis parlarispa.

¹⁶ Chay rato, uj runaman rijch'akoj simiyta llankhariwarqa. Chanta, ñaupaqeypi kasharqa chayman nerqani: Señor, kay mosqoypi jina rikusqayqa mayta llakichiwan, mana kallpayojmantaj tukuchiwan.

¹⁷ Imaynatataj qanwan parlayta atisaj kay kamachiykirí, kay jina mana kallpayoj tarikuspa, samayniypis pisiyawajtinri?

^18-19 Runaman rijch'akojqa, ujtawan llankharillawarqataj, mosoj kallpata qowaspa; niwarqataj: Ama manchachikuychu, amataj llakikuychu. Diosmin munakusunki. Umachakuy, kallpachakuytaj! Pay parlashawajtillanraj, reparakorqani watejmanta umachakushasqayta; chanta nerqani: Señorníy, parlaway, kallpayta kutichipuwankiña.

²⁰ Chaymanta nillawarqataj: Yachankichu imaraykuchus watukusoj jamusqaytaqa? Kunanqa watejmanta maqanakunay tiyan Persiata waqaychaj angelwan. Maypachachus paywan maqanakuyta tukusaj, chaypacha Greciata waqaychaj angelqa jamonqa.

²¹ Kunanqa imachus cheqa kaj libropi qelqasqa kashan chayta willasqayki: Paykunaj contrampi maqanakunaypeqa, kamachejniykichej ángel Miguel sapallan yanapawajneyqa, paytaj Israelpa waqaychajnin.