Colosenses 1 - Qheshwa Biblia DC

Pablo napaykuynin

^1-2 Noqa Pablo, Diospa munayninrayku Jesucristoj apostolnin, hermano Timoteowan khuska, kay cartata escribimuni, Colosas llajtapi ajllasqas hermanos Cristopi kajkunaman. Khuyakuy, sonqo tiyakuytaj qankunapaj kachun, Dios Tatanchejmanta, [Señorninchej Jesucristomantawan.]

Pablo mañan Diosmanta creejkunapaj

^3-4 Qankunarayku graciasta qoykupuni Diosman, Señorninchej Jesucristoj Tatanman, uyarispa Cristo Jesuspi feniykichejmanta, Diospa ajllasqasnintapis munakusqaykichejmanta.

⁵ Janaj pachapi suyakuyniykichejqa qankunapaj waqaychasqa kashan. Chaymantaqa uyarerqankichejña evangelioj cheqa kaj palabrannejta.

⁶ Kay evangelioqa qankunakama chayamorqa, jinallataj tukuy mundontinman. Kaytaj poqon, qankunapipis wiñan, maypachachus Diospa khuyakuyninta cheqamanta uyarerqankichej, rejserqankichejtaj chay p'unchaymantapacha.

⁷ Kayta yachachisorqachej munasqa hermanonchej Epafras. Pay llank'aj masiyku, Jesuspa sumaj kamachin qankunapaj.

⁸ Noqaykumampis pay willawarqayku, Espiritupi munakuyniyoj kasqaykichejmanta.

⁹ Chayrayku noqaykoqa qankunamanta uyarisqaykumantapacha, mana saqeykuchu Diosmanta mañakuyta, Diospa munayninta rejsispa junt'a kanaykichejpaj tukuy laya yachaywan, espiritupi unanchaywampis.

¹⁰ Mañakuyku Señorpa munayninman jina purinaykichejpaj, tukuy imapi Diosta kusichispa, allin poqoyta apaspa, tukuy ima allin ruwaypi, ajinamanta wiñaspataj, Diosta rejsinaykichejpaj.

¹¹ Mañakullaykutaj tukuy atiyninwan kallpachasqas kanaykichejta, janaj pacha k'anchaynimpi atiyninman jina, tukuy imata jap'ikunaykichejpaj pacienciawan.

¹² Jatun kusiywantaj Dios Tataman graciasta qonkichej. Payqa wakichisorqachej chayaqeta jap'inaykichejpaj, Diospa ajllasqasninwan janaj pacha k'anchaypi.

¹³ Dios, laqhaj atiyninmanta orqhospa, munasqa Churimpa reinonman pusawarqanchej.

¹⁴ Paypi kacharisqas kanchej, juchasninchejtaj pampachasqas kanku.

Cristoj wañuyninrayku Dioswan allinyakunchej

¹⁵ Cristoqa mana rikukoj Diospa rijch'ayninmin. Pay karqa tukuy ima ruwasqasmanta ñaupaj nacej.

¹⁶ Paypi tukuy ima ruwasqa karqa patapi kajkuna, jallp'api kajkunapis; mana rikukojkuna, sut'ipi kajkunapis. Jinallataj tronospis, qhapaj suyuspis, kuraj kamachejkunapis, atiyniyojkunapis. Ajina tukuy ima ruwasqa karqa, paynejta paypajtaj.

¹⁷ Cristoqa karqapuni manaraj imapis kashajtin. Paytaj tukuy imata sayachishan.

¹⁸ Payqa cuerpoj uman, iglesia nisqajta. Paymin qallareyqa, tukuy wañusqasmanta ñaupaj nacej, tukuy imapitaj kamachej kanampaj.

¹⁹ Dios Tatapaj allin karqa Jesusqa tukuy Diospa kayninwan junt'asqa kanan.

²⁰ Dios munarqa pay kikinwan allinyachiyta tukuy imata Cristonejta, jallp'api kajkunata, jinallataj janaj pachapi kajkunatapis; sonqo tiyakuy kanampaj Jesuspa yawarninrayku, cruzpi wañusqanraykutaj.

²¹ Qankunapis jinallataj ñaupajta karqankichej, karunchasqas yuyayniykichejpi, Diospa enemigosnin, sajra imasta ruwaspa. Kunantaj Dioswan allinyasqasña kankichej.

²² Cristoqa aycha cuerpoyoj kashaspa, wañuyninnejta Diosman qayllachisonqachej, llimphusta, mana juchayojta, mana k'aminatataj.

²³ Cheqamanta saphinchasqas sinch'ita sayaychej, fepi mana kuyuspa, evangelioj yuyayninta uyarisqaykichejpi. Kay evangeliomanta tukuy kay pachapi kajkunaman willakun. Noqa Pablopis chay evangeliomanta willanaypaj churasqa kani.

Pablo gentilesta yanapanampaj churasqa

²⁴ Kunanqa kusisqa kani, qankunarayku ñak'ariypi rikukuspa. Kay jinamanta aychaypi junt'ashani imachus pisisqanta Cristoj ñak'ariyninman cuerponrayku, chaytaj iglesia.

²⁵ Noqa iglesiata yanapanaypaj churasqa kani. Dios churawarqa qankunarayku, mana qhellakuspa Diospa palabranta willanaypaj.

²⁶ Chay pakasqa yachay, wiñaymantapacha ñaupa miraykunapi mana rejsisqachu karqa. Kunantaj sut'inchasqaña Diospata kajkunaman.

²⁷ Paykunaman Dios rejsichiyta munarqa chay pakasqa yachaypata qhapaj k'anchayninta gentiles ukhupi. Chay pakasqa yachaytaj karqa kikin Cristo. Paynejtataj suyankichej janaj pachaj k'anchayninta. Payqa qankunapi kashan.

²⁸ Kayta Cristomanta noqayku willayku tukuy runaman sonqochaspa, tukuy ima yachaypitaj yachachispa, sapa ujqa Cristopi allinchasqa kanampaj.

²⁹ Chayrayku noqapis llank'ani, maqanakuspa Señorpa atiyninman jina. Chay atiytaj noqapi maytapuni ruwashan.