Apocalipsis 6 - Qheshwa Biblia DC

Qanchis sellos

¹ Rikorqanitaj Cordero kicharishajta ujnin sellota, uyarerqanitaj tawa kajkunamanta ujnin animalta nejta, qhon qhompis sonanman jina: Jamuy, rikuytaj, nispa.

² Rikorqanitaj: Chaypi karqa uj yuraj caballo. Patampitaj lloq'asqaqa uj arcota flechanampaj jap'isharqa. Paymantaj uj pilluta qorqanku. Atipaspa llojserqa, atipanallampajtaj.

³ Iskay kaj sellota kicharejtintaj, iskay kaj animalta uyarerqani nejta: Jamuy, rikuytaj.

⁴ Uj puka caballotaj llojsimorqa. Chaypa patampi lloq'asqa kajmantaj atiyta qorqanku, sonqo tiyakuyta jallp'a patamanta qhechunampaj, ujkuna ujkunataj wañuchinakunankupaj, uj jatun espadatataj payman qorqanku.

⁵ Kinsa kaj sellota kicharejtintaj, kinsa kaj animalta uyarerqani nejta: Jamuy, rikuytaj. Rikorqanitaj uj yana caballota. Chay patampi lloq'asqa kajtaj pesasta makimpi jap'isharqa.

⁶ Tawa animalespa chaupimpitaj uj parlajta jina uyarerqani nejta: Iskay libra trigo uj denario qolqepaj, sojta libra cebadataj uj denario qolqepaj. Amataj aceiteta, vinotapis usuchiychejchu.

⁷ Tawa kaj sellota kicharejtintaj, tawa kaj animalpa parlamusqanta uyarerqani nejta: Jamuy, rikuytaj.

⁸ Rikullarqanitaj uj q'ellu caballota. Patampi lloq'asqa kajpatataj sutenqa wañuy karqa. Wañuy nisqataj payta qhatisharqa. Payman tukuynin jallp'amanta tawan kaj suyuta qorqanku wañuchinampaj espadawan, yarqhaywan, onqoykunawan, jallp'api monte animaleswan ima.

⁹ Phishqa kaj sellota kicharejtintaj, altar urapi almasta rikorqani, pikunachus wañorqanku Diospa palabranrayku, payta rejsichisqankuraykutaj.

¹⁰ Sinch'itataj qhaparisharqanku nispa: Jayk'ajkamataj Señor, santo, cheqa kaj, jallp'a patapi tiyakojkunata mana juzgankichu, nitaj yawarniykumanta cuentata mañankichu?

¹¹ Yuraj p'achasta sapa ujninkuman qorqanku, nerqankutaj uj pisitawan samarinankuta, kamachi masisninku, hermanosninku ima junt'amunankukama. Paykunapis wañuchisqasllataj kananku tiyan.

¹² Sojta kaj sellota kicharejtintaj, rikorqani manchay jallp'a ikhakuyta; intitaj yanayarqa uj qhashqa yana p'acha jina, killataj yawarman tukorqa.

¹³ Cielo qoyllurkunataj jallp'a pataman urmaramorqanku, imaynatachus higo sach'ata wayra thalaspa, higosta urmarachin, ajinata.

¹⁴ Cielotaj ithirikaporqa, imaynatachus uj escribisqa papel k'uyuykukun ajinata. Tukuy orqotaj, yaku pata churu jallp'aspis, kasqankumanta kuyurerqanku.

¹⁵ Jallp'api reyes kajkuna, kurajkuna, soldadosta kamachejkuna, qhapajkuna, atiyniyojkuna, tukuy kamachis, mana kamachis kajkunapis, qaqa jusk'uspi, orqo jusk'uspi ima pakaykukorqanku.

¹⁶ Orqosman, qaqasmantaj nerqanku: Pataykuman urmaykamuwayku. Pakaykuwaykutaj jaqay trono patapi tiyajpa uyanmanta, Corderoj k'ajaj phiñakuyninmantawan.

¹⁷ Paypa k'ajaj phiñakuynimpa jatun p'unchaynin chayamunña. Pitaj atenqa sayaytari?