Apocalipsis 5 - Qheshwa Biblia DC

Corderoqa librota kicharin

¹ Tronopi tiyasqa kajpa paña makimpi rikorqani uj librota, ukhumpi jawampitaj escribisqata, qanchis selloswantaj sellasqata.

² Rikullarqanitaj uj kallpasapa angelta, qhaparispa tapojta: Pitaj librota kicharinampaj jina kanman, sellostataj phaskaranampajri?

³ Manaraj pipis janaj pachapi, kay pachapipis, nitaj jallp'a urapipis, librota kichariyta, nitaj qhawaykuyllatapis atejchu.

⁴ Noqarí, maytapuni waqasharqani, mana ujllapis atiyniyoj tarikusqanmanta chay librota kicharinampaj, nitaj qhawaykunallampajpis.

⁵ Kuraj runasmanta ujnintaj niwarqa: Ama waqaychu. Judaj ayllunmanta Leonqa, Davidpa saphin, atiparqa kicharinampaj librota, qanchis sellosnintawan.

⁶ Rikullarqanitaj tronoj chaupimpi, tawa animalespa chaupimpi, kurajkunaj chaupimpiwan Corderota, ñak'asqata jina sayashajta. Chay Corderoqa karqa qanchis wajrayoj, qanchis ñawisniyojtaj. Chaykunaqa Diospa qanchis espiritusnin kanku, tukuy mundoman kachamusqas.

⁷ Corderotaj qayllaykuspa, tronopi tiyashajpa paña makinmanta chay librota jap'erqa.

⁸ Librota jap'isqantawantaj, chay tawa animales, chay iskay chunka tawayoj kurajkuna ima, Corderoj ñaupaqenman qonqoriykukorqanku. Sapa ujninkutaj arpasniyoj karqanku, copasninkutaj inciensowan junt'asqas karqanku. Chaykunaqa ajllasqaspa mañakuynin.

⁹ Uj mosoj takiytataj takerqanku, nispa: Allimpaj qhawasqa kanki librota jap'inaykipaj, sellosnintataj phaskaranaykipaj; imaraykuchus qan wañuchisqa karqanki, yawarniykiwantaj Diospaj rantiwarqayku, tukuy ayllumanta, tukuy laya parlaykunamanta, tukuy laya runamanta, tukuy nacionesmanta ima.

¹⁰ Diosniykupajtaj paykunata reyesta, sacerdotesta ima churarqanki, jallp'a patapi kamachinankupaj.

¹¹ Chantá qhawarqani, uyarerqanitaj ashkha angelespa parlayninta, chay animalespatapis, kuraj runaspatapis tronoj muyuynimpi. Paykunaqa waranqa waranqa karqanku.

¹² Sinch'itataj nisharqanku: Wañuchisqa karqa chay Corderoqa jap'inampuni atiyta, qhapaj kayta, yachayta, kallpata, sumaj sutitapis, janaj pacha k'anchayta, yupaychayta ima.

¹³ Tukuy ima ruwasqa kajpata, janaj pachapi, jallp'a patapi, jallp'a urapi, mar qochapi, tukuy ima paykunapi kajkunata ima uyarerqani nejta: Tronopi tiyasqa kajman, Corderomampis yupaychay, allimpaj qhawasqa kay, janaj pachaj k'anchaynin, atiytaj wiñay wiñaypaj kachun.

¹⁴ Tawantin animalestaj nerqanku: Amén. Chay iskay chunka tawayoj kurajkunataj qonqoriykukuspa yupaycharqanku.