Apocalipsis 22 - Qheshwa Biblia DC

¹ Chay qhepata kausaj yakuyoj ch'uwa mayuta rikuchiwarqa, cristal jina lliphipejta, Diospa trononmanta, Corderojmantawan llojsimushajta.

² Llajtaj plazan chaupipi, mayoj puraj chimpampitaj kausaj sach'a kasharqa chunka iskayniyoj poqoyta qoj, sapa killa ujta. Sach'aj laqhesnintaj nacionesta thañichinankupaj karqanku.

³ Manañataj astawan ima maldiciompis kanqañachu; Diospa tronontaj Corderojpatawan chaypi kanqa; kamachisnintaj payta kasonqanku.

⁴ Uyanta rikonqanku, sutintaj frentesninkupi kanqa.

⁵ Chaypitaj tuta mana astawan kanqañachu. Manataj k'anchanaj k'anchayninta necesitanqankuñachu, nitaj intej k'anchaynintapis. Diosqa Señortaj k'anchaykonqa paykunata; wiñay wiñaypajtaj paykuna kamachenqanku.

Jesucristoj kutimuynin qayllapiña kashan

⁶ Niwarqataj: Kay palabrasqa maychus kaj, cheqataj kanku. Profetaspa espiritumpata Señor Diosnin, angelninta kachamorqa kamachisninman rikuchinampaj, usqhayta chay imas ruwasqas kananku kasqanta.

⁷ Usqhayta jamushani! Kusikuyniyojmin kay libroj nisqasnimpa palabrasninta junt'ajqa.

⁸ Noqa Juanqa kay imasta uyarerqani, rikorqanitaj. Uyarispaña, rikuspataj qonqorikorqani kay imasta rikuchiwaj angelpa chakisninman yupaychanaypaj.

⁹ Paytaj niwarqa: Qhawakuy, ama chayta ruwaychu. Noqaqa kamachi masiyki kani, hermanosniyki profetaspata, kay libroj palabrasninta waqaychajkunajta ima. Diosllata yupaychay.

¹⁰ Niwarqataj: Ama sellaychu kay libroj sut'inchana palabrasnintaqa; imaraykuchus tiempoqa qayllaña kashan.

¹¹ Ch'aukiyajqa ch'aukiyachunraj; ch'ichi kajqa ch'ichiraj kachun; cheqan kajqa cheqanraj kachun; llimphu kajpis, aswan llimphu kachun.

¹² Kayqa usqhayta jamushani, t'inka aparisqa sapa ujman maychus ruwasqanman jina qopunaypaj.

¹³ Noqa alfa, omegataj kani, qallariy, tukukuytaj, ñaupaj kaj qhepa kajtaj.

¹⁴ Kusikuyniyojmin kanku p'achasninkuta t'ajsajkunaqa. Paykunaqa kausay sach'amanta jap'inankupuni tiyan kausayta, punkusnejtataj llajtaman yaykonqanku.

¹⁵ Jawapitaj qhepakonqanku alqos, layqas, qhenchas, runa wañuchis, lantista yupaychajkuna, jinallatataj llullakuyta munakojpis, llullata ruwaj ima.

¹⁶ Noqa Jesús, angelniyta kachamorqani kay imasmanta iglesiasman willanampaj. Noqa Davidpa saphin, miraynintaj kani, sut'iyaypi lliphipej ch'askataj.

¹⁷ Espirituwan, noviawan ninku: Jamuy. Ch'akichikojqa jamuchun, munajrí, kausay yakumanta qhasilla ujyachun.

¹⁸ Kay libroj sut'inchanampaj palabrasninta uyarejman, noqa Juan nini: Pillapis kay imasman yapaykunman chayqa, Dios payman jasut'iykunata apachimonqa; kay libropi escribisqas kashanku chaykunata.

¹⁹ Pitajchus kay libroj sut'inchanampa palabrasninta qhechunman chayqa, Dios kausay sach'amanta chayaqenta qhechonqa, ajllasqa llajtamantawan, kay libropi escribisqas kashanku chaykunamanta.

²⁰ Kaykunata willajqa nin: Cheqamanta usqhayta jamushani. Amén. Arí, jamuy Señor Jesús.

²¹ Señor Jesucristoj khuyakuynin tukuyniykichejwan kachun. Amén.