Apocalipsis 21 - Qheshwa Biblia DC

Mosoj janaj pacha, mosoj jallp'a ima

¹ Uj mosoj janaj pachata, uj mosoj jallp'atawan rikorqani. Ñaupaj kaj janaj pachaqa, ñaupaj kaj jallp'apis chinkarerqankuña, mar qochapis manaña karqachu.

² Noqa Juanqa ajllasqa llimphu llajtata rikorqani, mosoj Jerusalenta, janaj pachamanta uraykamushajta, Diosmanta novia jina wakichisqata, qosampaj k'achanchasqatataj.

³ Tronomanta sinch'ita qhaparejta uyarerqani, nejtataj: Kayqa Diospa paykunawan tiyakuynin. Diosqa paykunawan kanqa. Runastaj paypa ayllun kanqanku, kikin Diostaj paykunaj Diosninku kanqa.

⁴ Diostaj tukuy waqayta ñawisninkumanta pichanqa. Manañataj wañuy kanqanchu, nitaj waqaypis, nitaj qhapariypis, nitaj nanaypis. Ñaupa kaj imasqa manaña kanqañachu.

⁵ Tronopi tiyasqa kashajtaj nerqa: Noqa tukuy imata mosojyachini. Nillarqataj: Escribiy, kay palabrasqa maychus kajpuni, cheqataj kanku.

⁶ Niwarqataj: Junt'asqaña. Noqa kani alfa, omegataj; qallariy, tukukuytaj. Ch'akichikojmanqa kausay yakuta pujyumanta qhasilla ujyachisaj.

⁷ Pichus atipanqa chayqa, tukuy imata chayaqepaj jap'enqa. Noqataj Diosnin kasaj, paytaj waway kanqa.

⁸ Manchachikojkunarí, mana creejkuna, millay kajkuna, runa wañuchis, qhenchachakojkuna, layqakuna, lanti yupaychajkuna, tukuy llullakojkunapis, chayaqepaj jap'enqanku, ninawan azufrewan larwashan chay qochata. Chaymá iskay kaj wañoyqa.

Mosoj Jerusalén llajta

⁹ Chay qanchis angelesmanta uj jamuwarqa, qanchis qhepata jamoj jasut'iykunamanta, qanchis junt'asqa copasta jap'isharqanku chaykunamanta. Parlapayawaspataj niwarqa: Jamuy kayman, rikuchisqayki noviata, Corderoj warminta, nispa.

¹⁰ Espiritupitaj uj manchay jatun orqoman pusawarqa, rikuchiwarqataj chay jatun ajllasqa Jerusalén llajtata, Diosmanta, janaj pachamanta uraykamushajta.

¹¹ Jerusalén llajtaqa Diospa k'anchayninwan lliphipisharqa. Lliphipiynintaj rijch'akoj uj sumaj k'achitu qhapaj rumiman, jaspe rumiman. Cristal jinataj ch'uwa karqa.

¹² Jatun perqawan muyuykusqataj karqa, chunka iskayniyoj punkusniyoj. Punkuspitaj chunka iskayniyoj ángeles karqanku. Punku pataspitaj sutis escribisqa karqa. Chaykunaqa chunka iskayniyoj aylluspa sutisnin, Israelpa wawasninmanta.

¹³ Inti llojsimuynejman kinsa punkus karqanku, patanejman kinsa punkus, uranejman kinsa punkus, inti yaykuynejmantaj kinsa punkus.

¹⁴ Llajtaj perqanrí chunka iskayniyoj cimientosniyoj karqa. Chaykuna patapitaj chunka iskayniyoj sutis, Corderoj chunka iskayniyoj apostolesnimpata.

¹⁵ Noqawan parlajrí, uj qori soqo varayoj karqa, llajtata, punkusninta, perqasnintawan midinampaj.

¹⁶ Llajtaqa tawa esquinasniyoj karqa, anchonman sayt'unmampis uj rejlla. Paytaj chay llajtata soqosowan miderqa. Karqataj tawa pachaj kinsa chunka iskayniyoj leguas. Uj rejllataj karqa sayt'unman, sayayninman, anchonman ima.

¹⁷ Perqantapis midillarqataj. Karqataj sojta chunka tawayoj metros, pusaj chunka centimetrosniyoj, runaj medidanman jina, chayllataj angelespatapis.

¹⁸ Perqantaj jaspe rumimanta karqa. Llajtapis ch'uwa qorimanta karqa, ch'uwa cristalmantaj rijch'asqa.

^19-20 Llajtaj perqa cimientosnintaj tukuy imaymana k'achitu rumiswan, k'achanchasqas kasharqanku. Ñaupaj kaj cimientoqa jaspemanta karqa; iskay kaj safiromanta; kinsa kaj calcedoniamanta; tawa kajtaj esmeraldamanta; phishqa kaj sardonicamanta; sojta kaj sardiomanta; qanchis kaj crisolitomanta; pusaj kaj berilomanta; isq'on kaj topaciomanta; chunka kaj crisoprasomanta; chunka ujniyoj kaj jacintomanta; chunka iskayniyoj kajtaj amatistamanta.

²¹ Chay chunka iskayniyoj punkustaj, chunka iskayniyoj walqas karqanku; sapa punkutaj uj walqalla karqa. Llajtaj plazantaj ch'uwa qorimanta, sut'i vidrio jina karqa.

²² Manataj chaypi templota rikorqanichu. Llajtaj templonqa kikin Señormin, Tukuy Atiyniyoj Dios, Corderotaj.

²³ Llajtaqa mana necesitanchu intita, nitaj killatapis chaypi k'anchanampaj. Diospa k'anchaynin llajtata k'anchaykun, k'anchanantaj Cordero.

²⁴ Nacionesqa Diospa k'anchaynimpi purenqanku. Jallp'api reyes kajkunataj, yupaychayta chayman apamonqanku.

²⁵ Punkusnintaj p'unchay tukukojtin, mana jayk'ajpis wisq'akonqankuchu. Jaqaypeqa manaña tuta kanqachu.

²⁶ Chaymantaj nacionesqa yupaychayta, allin sutitawan apanqanku.

²⁷ Chaymanqa mana ima ch'ichi kajpis yaykonqachu, nitaj millayta ruwajkuna, chayrí llullakojkunapis. Manachayqa Corderoj kausay librompi escribisqa kajkunalla yaykonqanku.