Apocalipsis 20 - Qheshwa Biblia DC

Waranqa watas

¹ Rikorqanitaj uj angelta janaj pachamanta uraykamushajta, makimpitaj ukhu pachaj llaventa jap'ishajta, uj jatun cadenatawan.

² Sierpetaj presocharqa chay ñaupa katarita, pichus supay, Satanás karqa. Paytataj waranqa watapaj wataykorqa.

³ Ukhu pachamantaj wijch'uykorqa, wisq'aykuspataj patanta sellaykorqa, amaña runasta ch'aukiyanampaj waranqa wata junt'akunankama. Chay qhepatataj phaskarasqa kanqa pisi p'unchaykunallapaj.

⁴ Tronostataj rikorqani. Chaykuna patapitaj tiyaykukorqanku pikunachus atiyta jap'erqanku juzganankupaj, chaykuna. Uman qholusqakunaj almasnintapis rikullarqanitaj, pikunachus Jesusmanta, Diospa palabranmantawan willarqanku, chaykunata. Paykunaqa phiña animalta mana yupaycharqankuchu, nitaj lantintapis, nitaj frentesninkupi, nitaj makisninkupipis marcata jap'erqankuchu. Chaykunaqa kausarqanku, kamacherqankutaj Cristowan waranqa watata.

⁵ Chay waj wañusqasqa mana kausarimorqankuchu waranqa wata junt'akunankama. Chaymin ñaupaj kaj kausarimoyqa.

⁶ Kusikuyniyojmin ajllasqataj ñaupaj kaj kausarimuypi chayaqeta jap'ejqa. Iskay kaj wañoyqa manaña paykunapaj atiyniyojchu, astawanqa, paykuna Diospaj, Cristopajwan sacerdotes kanqanku, paywantaj waranqa watata kamachenqanku.

⁷ Waranqa wata junt'akojtintaj, Satanás watasqa kasqanmanta kacharisqa kanqa.

⁸ Paytaj llojsenqa runasta ch'aukiyaj, kay jallp'aj tawantin k'uchupi kashanku chaykunata; Gogta, Magogtawan. Chaykunatataj maqanakupaj tantanqa. Paykunaj yupayninrí, mar qochaj t'iyun jina ashkha.

⁹ Chaykunataj wicharimorqanku maychus jallp'aj jatun kayninman jina. Ajllasqaspa wasi toldosnintataj muyuykorqanku, chay munasqa llajtatawan. Janaj pachamantataj nina uraykamuspa q'olarqa.

¹⁰ Paykunata ch'aukiyaj supaytaj nina qochaman wijch'uykusqa karqa, maypichus chay phiña animal, llulla profetawan kasharqanku chayman; tuta p'unchaytaj, wiñaypa wiñayninkama ñak'arenqanku.

Jatun yuraj tronoj ñaupaqempi juicio

¹¹ Rikorqanitaj uj jatun yuraj tronota, chaypi tiyasqa kashajtawan. Paypa ñaupaqenmantataj kay pacha, janaj pachapis ayqerqanku, manañataj ni mayman riyta aterqankuchu, chinkarerqankutaj.

¹² Rikullarqanitaj wañusqasta, jatuchejkunata, juch'uykunatapis Diospa ñaupaqempi sayashajta. Libros kicharikorqanku, chantá waj libropis kicharikullarqataj. Chayqa kausaypa libron. Wañusqastaj juchachasqas karqanku, imamantachus librospi escribisqa kasqanmanta, ruwasqankuman jina.

¹³ Mar qochataj chaypi wañusqa kajkunata qoporqa. Wañuypis, ukhu pachapis paykunapi wañusqas kajkunata qopullarqataj. Sapa ujninkutataj juchacharqa ruwasqasninkuman jina.

¹⁴ Wañuywan, ukhu pachawan nina qochaman wijch'usqas karqanku. Kaymá iskay kaj wañoyqa, nina qocha.

¹⁵ Pichus kausay libropi mana escribisqachu tarikorqa chayqa, nina qochaman wijch'usqa karqa.