Apocalipsis 2 - Qheshwa Biblia DC

Cartas Asiapi kaj qanchis iglesiasman: Efeso iglesiaman

¹ Efeso iglesiaj angelninman escribiy: Kayta nin paña makimpi qanchis qoyllurkunata jap'ej, pichus chay qanchis qori k'anchachinas chaupipi purin chay:

² Ruwayniykita, llank'asqaykita, pacienciaykitawan rejsini. Yachanitaj sajra runastapis mana rikuyta atisqaykita; apóstoles kayku nejkunatapis pruebaman churasqaykita; llullas kasqankutataj rikurichimusqaykita.

³ Pacienciawan ñak'arerqanki sutiyrayku mana sayk'uspa.

⁴ Chaywampis, noqajta uj ima tiyan contraykipi, ñaupaj kaj munakuyniykita saqerpayasqaykimanta.

⁵ Chayrayku yuyarikuy maymantachus urmasqaykita. Juchamanta ithirikuy, ñaupaj ruwaykunata ruway; manachayrí, usqhayta qanman jamusaj, k'anchachinaykitataj maypichus kananmanta qhechusaj, manachus juchamanta Diosman kutirikunki chayqa.

⁶ Kaytaj allin kapusunki: Nicolaitaspa ruwasqasninkuta chejninki; noqapis chaykunata chejnillanitaj.

⁷ Ningriyoj kajqa uyarichun imatachus Espíritu iglesiasman nisqanta. Atipajmanqa kausaj sach'amanta mikhuchisaj. Chaytaj Diospa paraisompi kashan.

Esmirna iglesiaman

⁸ Esmirna iglesiaj angelninman escribiy: Ñaupaj kaj, qhepa kajtaj, pichus wañusqa karqa, kausarerqataj, chaymin kayta nin:

⁹ Rejsini llakiyniykita, pisipasqa kasqaykitapis. Chaywampis qhapaj kanki. Yachani qampaj sajrata rimasqankuta judíos kayku nikojkuna. Paykunaqa mana judioschu, astawanqa Satanaspa tantakuna wasi kanku.

¹⁰ Ama manchachikuychu chay imasta ñak'arinaykimantaqa. Qhaway, qankunamanta wakinta supayqa carcelman wisq'achenqa, rejsisqa kanaykichejpaj, chunka p'unchaytataj llakiyniyoj kankichej. Wañuykama creellaypuni, noqataj kausay pilluta qanman qosqayki.

¹¹ Ningriyoj kajqa uyarichun imatachus Espíritu iglesiasman nisqanta. Pichus atipanqa chaytaqa, iskay kaj wañuy mana imananqachu.

Pérgamo iglesiaman

¹² Pérgamo iglesiaj angelninman escribiy: Kayta nin pichus iskay filoyoj afilasqa espadata jap'in:

¹³ Noqa yachani tiyakusqaykita maypichus Santanás chaypi. Sutiytapis jap'ishallankiraj, manaraj creeytapis qhesachashankichu. Ni cheqan willajniy Antipas kausharqa chay p'unchayllapipis. Paytaqa wañucherqanku qankuna ukhupi, maypichus Satanás tiyan chaypi.

¹⁴ Chaywampis uj pisi imas contraykipi tiyapuwan: Balaampa yachachiyninwan kajkunata chaypi jap'ikushanki. Payqa Balacta yachacherqa Israelpa churisnimpa ñaupaqenman misk'anata churananta, lantikunaman jaywasqata mikhunankupaj, qhenchachakunankupaj ima.

¹⁵ Ajinallatataj nicolaitaspa yachachiyninta qhatejkunata chaypi jap'ikushanki.

¹⁶ Chayayku juchata saqey ari, manachayqa usqhayta jamusqayki, simiypi kaj espadawantaj paykunaj contrampi maqanakusaj.

¹⁷ Ningriyoj kajqa uyarichun imatachus Espíritu iglesiasman nisqanta. Atipajmanqa pakasqa mana nisqata mikhuchisaj, juch'uy yuraj rumitataj qosaj. Chay juch'uy rumipitaj uj mosoj suti escribisqa. Chaytaqa mana pipis rejsinchu, astawanqa pichus chayta jap'ejlla rejsin.

Tiatira iglesiaman

¹⁸ Tiatira iglesiaj angelninman escribiy: Kayta nin Diospa Churin, pejpatachus ñawisnin nina larwaj jina, pejpatachus chakisnimpis llusk'achasqa lliphipej bronceman rijch'akun, chay:

¹⁹ Noqa rejsini ruwasqasniykita, munakuyniykita, creesqaykita, yanapasqaykita, pacienciaykitapis. Ajinallatataj chay qhepa ruwasqasniykitapis, ñaupaj kajkunamanta nisqaqa, aswan sumaj kasqankuta yachani.

²⁰ Chaywampis uj ima qampa contraykipi tiyapuwan: Chay Jezabel warmita, Diosmanta sut'inchaj kani nikojta saqenki yachachinanta, kamachisniytataj ch'aukiyananta, qhenchachakunankupaj, chay lantikunaman jaywasqasta mikhunankupaj ima.

²¹ Unayta suyarqani juchamanta Diosman kutirikunanta; manataj payqa munanchu chay qhenchachakuy juchamanta kutirikuyta.

²² Payta noqa onqoykuchisaj. Pikunachus paywan qhenchachakunku chaykunapis, jatun ñak'ariyman chayanqanku, manachus sajra ruwasqankumanta kutirikonqanku chayqa.

²³ Wawasnintataj mana khuyakuspa wañurachisaj; ajinamanta tukuynin iglesias yachanqanku noqa rejsisqayta runaj yuyayninta, sonqontawan. Qankunamantaj, sapa ujman, ruwasqaykichejman jina qopusqaykichej.

²⁴ Tiatirapi kajkunamantaqa wakin mana chay millay yachaykunata qhaterqankichejchu. Mana yachakorqankichejchu imatachus chaykuna Satanaspa pakasqa imasninta ninku chayta. Noqaqa niykichej: Mana waj q'epita pataykichejman churaykusajchu, nispa.

²⁵ Chaywampis, imatachus kapusunkichej chaytaqa jap'illaychej jamunaykama.

²⁶ Atipajmanqa, ruwasqasniyta tukukunankama waqaychajman ima, atiyta qosaj nacionesta kamachinampaj.

²⁷ Fierro varawantaj chaykunata kamachenqa, mankasta jinataj t'unarakanqa. Noqapis ajinallatataj chay atiyta Tataymanta jap'erqani.

²⁸ Paymantaj paqarimuy ch'askata qosaj.

²⁹ Ningriyoj kajqa uyarichun imatachus Espíritu iglesiasman nisqanta.