Apocalipsis 19 - Qheshwa Biblia DC

Janaj pachapi atipay takiykuna

¹ Kay imas qhepata ashkha runaspa parlasqanta jina uyarerqani janaj pachapi, nishajta: Aleluya! Salvación, k'anchay, atiy ima Diosninchejpata kanku.

² Diospa juzgasqanqa cheqan, cheqataj. Chayrayku chay jatun qhenchachakoj warmita juchacharqa. Chay warmeqa, qhenchachakuyninwan kay pachata ismucherqa, Diostaj kamachisnimpa yawarninrayku, payman maychus kajta kutichispa ñak'aricherqa.

³ Ujtawantaj nerqanku: Aleluya! Babilonia llajtaj q'osñintaj wiñaypa wiñayninkama wicharishan.

⁴ Iskay chunka tawayoj kuraj runastaj, chay tawa animalespiwan jallp'aman k'umuykuspa Diosta yupaycharqanku. Paytaj tronompi tiyasqa kasharqa. Nerqankutaj: Amén! Aleluya!

⁵ Uj parlamojtaj tronomanta uyarikorqa, nispa: Diosninchejta yupaychaychej tukuy kamachisnin, tukuy payta manchachikojkuna, juch'uykuna, jatuchejkuna ima.

Kusiy Corderoj casamientompi

⁶ Ashkha runaj parlasqanta jina uyarerqani, ashkha yakoj p'ajchasqanta jina, ashkha qhon qhonkunaj manchay sinch'ita sonasqanta jina, nerqataj: Aleluya! Señor Tukuy Atiyniyoj Diosninchej kamachishan.

⁷ Kusikuna jatun kusiywan sutinta jatunchaspa. Corderoj casamienton chayamunña, warmintaj wakichisqaña.

⁸ Chay warmimantaj Dios atiyta qorqa, sumaj awasqa ch'uwa lliphipej linowan p'achallikunampaj. Sumaj awasqa linoqa niyta munan ajllasqaspa allin ruwasqasninku.

⁹ Angeltaj niwarqa: Escribiy: Kusikuyniyojmin kanku Corderoj casamiento mikhuyninman wajyasqa kajkunaqa. Nillarqataj: Kaykunaqa Diospa cheqa palabrasnin kanku.

¹⁰ Noqataj chakisninman urmarqani payta yupaychanaypaj. Paytaj niwarqa: Qhawakuy, ama chayta ruwaychu. Noqa kamachi masiyki kani, hermanosniykejtapis, pikunachus Jesuspa willayninta jap'inku, chaykunajta. Diosta yupaychay. Jesuspa willaynenqa Diosmanta sut'inchanaj espiritunmin.

Yuraj caballopi lloq'asqa kaj

¹¹ Chaypacha, janaj pacha kicharisqata rikorqani. Uj runa yuraj caballopi tiyasqa kasharqa, paytaj junt'aj, cheqa sutichasqataj karqa. Payqa cheqanta juzgan, maqanakuntaj.

¹² Ñawisnenqa nina larway jina. Uman patapitaj ashkha pillus karqanku. Escribisqa sutitaj tiyaporqa. Chayta mana pipis rejsiyta atejchu, manachayqa paylla rejsej.

¹³ Yawarpi pukachasqa p'achawan p'achallisqa kasharqa, sutintaj Diospa palabran karqa.

¹⁴ Janaj pachapi yupa soldadostaj sumaj awasqa, yuraj llimphu linowan p'achallisqas, payta yuraj caballospi qhatikusharqanku.

¹⁵ Paypa siminmanta uj filo espada llojsimushan, chaywan runakunata t'ojsinampaj. Payllataj fierro varawan kamachenqa; paytaj saronqa uvas sarunata, Tukuy Atiyniyoj Diospa k'ajaj phiñakuyninwan.

¹⁶ P'achampi moqon patanejpi escribisqa sutiyoj karqa: reykunaj Reynin, señorkunaj Señornintaj.

¹⁷ Uj angeltataj intipi sayashajta rikorqani. Chaytaj patata cieloj chaupinta tukuy p'isqosman sinch'ita qhaparerqa: Jamuychej, tantakamuychej Diospa jatun mikhunanman, nispa.

¹⁸ Chaypi reykunaj aychasninta mikhunkichej, capitanespata, kallpasapakunaj aychasninta, caballospa aychasninta, caballospi purejkunata; tukuypa aychasninta, kamachispata, mana kamachispata, juch'uykunajta, jatuchejkunajta, ima.

¹⁹ Rikorqani animalta, kay pachapi reykunatawan, chay ashkha soldados tantasqatawan maqanakuman rejta, chay caballopi lloq'asqa kajpa contrampi, yupa soldadosnimpa contrampi ima.

²⁰ Phiña animaltaj presochasqa karqa. Paymantaj llulla profeta, pichus chaypa ñaupaqempi señalesta ruwasqa, chay señaleswan animalpa marcanta apajkunata ch'aukiyarqa. Paykunataj lantinta yupaycharqanku. Chay iskaytataj kausashajta wijch'orqanku azufrewan larwashaj uj nina qochaman.

²¹ Puchojkunataj wañuchisqas karqanku, caballopi lloq'asqa kajpa siminmanta llojsej espadawan. Tukuy p'isqostaj, q'arqañastaj aychasninkuwan sajsakorqanku.