Apocalipsis 14 - Qheshwa Biblia DC

Pachaj tawa chunka tawayoj waranqa runaspa takiynin

¹ Chantá rikorqanitaj Corderota Sión orqo patapi sayashajta, paywantaj kashajta pachaj tawa chunka tawayoj waranqa runasta. Paykunaj frentesninkupitaj paypa sutin, Tatampa sutin ima escribisqa karqa.

² Janaj pachapitaj sonajta uyarerqani, ashkha yaku phajchajta jina, qhon qhompa sonasqanta jina. Chay sonasqanta uyarisqaytaj rijch'akorqa arpata tocajkunaman, arpasninkutapis waqachishankuman jina.

³ Uj mosoj takiyta jina tronoj ñaupaqempi, tawa kausaj animalespa, kuraj runaspa ñaupaqempi ima takisharqanku; manataj pipis chay takiyta yachakuyta atejchu; manachayqa chay pachaj tawa chunka tawayoj waranqalla, pikunachus kay pachapi kajkuna ukhumanta kacharisqas karqanku.

⁴ Kaykunaqa warmiswan mana ch'ichichakorqankuchu; imaraykuchus warmita mana rejserqankuchu. Kaykunaqa Corderota qhatinku maymanchus rishan chayman. Kaykunaqa runa ukhumanta rantisqas kanku, ñaupaj poqoy jina Diospaj, Corderopaj ima.

⁵ Siminkupipis mana ima llullakuy tarikorqachu. Paykunaqa mana ima ch'ichiyoj kanku.

Kinsa angelespa willaynin

⁶ Waj angeltataj janaj pachaj chaupinta phawajta rikorqani, wiñay evangelio jap'ishajta; kay pachapi tiyakojkunaman, tukuy llajtasman, ayllusman, waj parlayniyojkunaman, tukuy runasman ima willanampaj.

⁷ Qhaparispataj nerqa: Diosta manchachikuychej, sutinta jatunchaychej; juiciompa horanqa chayamushanña; janaj pachata, kay pachata, mar qochata, yaku pujyusta ima ruwajta yupaychaychej.

⁸ Waj angeltaj payta qhaterqa, nispa: Urmanña, urmanña jaqay jatun Babilonia llajta, pichus millay qhenchachakuy vinonta tukuy llajtasman ujyacherqa, chay.

^9-10 Kinsa kaj angeltaj paykunata qhaterqa, qhaparispataj nerqa: Pillapis phiña animalta lantintapis yupaychanman, frentempitaj, chayrí makimpitaj marcata churachikunman chayqa, paypis Diospa phiñakuynimpa vinonmanta ujyallanqataj, chay mana imawan chajrusqa, jich'asqataj kashan phiñakuynimpa vasompi, chaymanta. Ajinallatataj ninawan, azufrewan ñak'arichisqa kanqa, ajllasqa angelespa ñaupaqempi, Corderoj ñaupaqempi ima.

¹¹ Ñak'ariyninkoj q'osñintaj wiñaypaj wicharin. Chay phiña animalta, lantintapis yupaychajkunaqa, mana tuta p'unchay samankuchu, nillataj sutimpa marcanta churachikojkunapis.

¹² Kaypi kashan ajllasqaspa paciencian. Kaypi kashanku Diospa kamachisqasninta, Jesuspa fenintapis waqaychajkuna.

¹³ Janaj pachamanta uj wajyamuwajta uyarerqani, nispa: Escribiy: Kusikuyniyojmin kanku kunanmanta qhepaman Señorpi wañojkunaqa. Arí, nin Espiritoqa, sayk'uyninkumanta samakonqanku, imaraykuchus ruwasqasninkoqa paykunawan kashanku.

Poqoy pallana p'unchaykuna

¹⁴ Rikorqanitaj uj yuraj phuyuta, phuyu patapitaj uj tiyasqata, runaj churinman rijch'akojta, uman patapi qori pilluyoj, makimpitaj filo joseyoj ruthunampaj.

¹⁵ Waj angeltaj templomanta llojsimorqa. Phuyu patapi kajman qhaparerqa, nispa: Joseykita jap'iy, ruthuytaj. Ruthuna hora chayamunña, jallp'aj poqoynenqa ñapis poqosqaña.

¹⁶ Phuyu patapi tiyasqa kajtaj jallp'aman josenta churarqa, ajinapi jallp'aj poqoynenqa ruthusqa karqa.

¹⁷ Waj angeltaj janaj pachapi kaj templomanta llojsimorqa, uj filo ruthuna josellawantaj.

¹⁸ Altarmantataj waj ángel llojsimullarqataj. Chaytaj ninata kamachej, qhaparerqataj chay filo ruthunayojta, nispa: Churay filo ruthunaykita, jallp'api uva sach'aj poqoyninta pallay. Uvasnenqa poqosqasña kanku.

¹⁹ Angeltaj josenta jallp'aman wijch'umorqa. Jallp'api uva sach'aspa poqoyninta pallarqa. Uvastataj Diospa phiñakuynimpa jatun uvas sarunanman, thalliykorqa.

²⁰ Uvas sarunaqa llajtamanta jawanejpi karqa, sarojtinkutaj uvas sarunamanta yawar llojsimorqa, caballospa frenosninkama, sojta chunka leguata jina.