Apocalipsis 12 - Qheshwa Biblia DC

Warmimanta sierpemantawan

¹ Uj jatun señaltaj janaj pachapi rikhurerqa. Intiwan p'achallisqa warmi, killataj chakisnin urapi, uman patapitaj uj pillu chunka iskayniyoj qoyllurkunayoj.

² Wijsallisqa kaspataj, wachakuy nanaykunawan qhaparispa, nacichikunampaj ñak'arisharqa.

³ Waj señaltaj janaj pachapi rikukorqa: Uj jatun puka sierpe, qanchis umayoj, chunka wajrayoj, umasnimpitaj qanchis pilluyoj.

⁴ Chupantaj janaj pachapi qoyllurkunaj kinsa kaj t'aqanta phiskurparerqa, jallp'amantaj wijch'uykamorqa. Chay sierpeqa wachakunayashaj warmej ñaupaqempi sayaykorqa, wachakojtinkama wawanta oqoykunampaj.

⁵ Warmitaj uj qhari wawata nacichikorqa, paytaj tukuy llajtasta fierro varawan kamachenqa. Wawantaj oqharisqa karqa Diospaj, tronompajtaj.

⁶ Chay warmitaj ch'inman ayqerqa, maypichus uj cheqata Dios paypaj wakicherqa chayman. Chaypitaj waranqa iskay pachaj sojta chunkayoj p'unchayta payman mikhucherqanku.

⁷ Jatun maqanakutaj janaj pachapi karqa. Miguel, angelesnin ima sierpewan maqanakorqanku.

⁸ Manataj Miguelta atiparqankuchu, paykunapajtaj janaj pachapi manaña astawan tiyananku atikorqachu.

⁹ Jawamantaj chay jatun sierpeta wijch'orqanku, chay unay ñaupa katarita, pichus sutichasqa Supay, Satanastaj. Payqa llullakuspa mundontinta pantachin. Payta angelesnintawan jallp'aman wijch'umorqanku.

¹⁰ Janaj pachamanta uj sinch'ita parlamojta uyarerqani, nimojta: Kunanqa Diosninchejpa salvacionnin, atiynin, reinompis chayamunña, Cristompa atiynimpis. Hermanosninchejta ch'atajqa, wijch'usqa kashan, pichus tuta p'unchay Diosninchejpa ñaupaqempi paykunata ch'ataykoj, chay.

¹¹ Paykunaqa atiparqanku Corderoj yawarninrayku, Diospa palabranta willasqankurayku, pisipitaj kausayninkuta jap'isqankurayku wañunankukama.

¹² Chayrayku kusikuychej janaj pachakuna, chaypi tiyakojkunapis. Ay, jallp'a patapi, qocha patapipis tiyakojkunamanta!, imaraykuchus supayqa manchay phiñasqa qankunaman uraykamun, yachaspa paypaj pisi tiempollaña kasqanta.

¹³ Sierpetaj jallp'aman wijch'usqa kasqanta rikukuspa, qhari wawata wachakoj warmita qhatiykacherqa.

¹⁴ Warmimantaj jatun ankajpa iskaynin lijrasninta qorqanku, phawanampaj katarej qayllanmanta ch'innejman, maypichus tiyakun chayman, maypitajchus mikhuchinku uj tiempopaj, tiempospaj, khuskan tiempopaj ima.

¹⁵ Kataritaj warmej qhepanta siminmanta yakuta ajtumorqa mayuta jina, chay warmita yaku apanampaj.

¹⁶ Jallp'ataj warmita yanaparqa; jallp'aqa siminta kicharispa chay mayu yakuta ch'onqaykorqa, mayqentachus sierpeqa siminmanta ajtumorqa, chayta.

¹⁷ Chaypachataj sierpeqa warmipaj mayta phiñakorqa; rerqataj warmej mirayninmanta kajkunawan maqanakoj, Diospa kamachisqasninta waqaychanku, Jesuspa willasqasnintataj jap'inku chaykunawan.