Apocalipsis 11 - Qheshwa Biblia DC

Iskay rikojkuna

¹ Paytaj qowarqa uj soqosota varaman rijch'akojta, niwarqataj: Sayariy, varawantaj midiy Diospa templonta, altarta, chaypi yupaychajkunatawan.

² Temploj jawampi kaj patiota saqellay. Ama midinkichu; imaraykuchus gentilesman qosqa kashan, pikunachus ajllasqa llajtata, tawa chunka iskayniyoj killata saronqanku.

³ Noqataj iskay rikojkunata kachamusaj, yana qhashqa p'achawan p'achallisqasta. Paykunaqa waranqa iskay pachaj sojta chunkayoj p'unchaykunata noqamanta sut'inchanqanku.

⁴ Chay rikojkunaqa iskay olivo sach'as, iskay k'anchachinastaj kanku, jallp'aj Señornimpa ñaupaqempi churasqas kashanku chaykuna.

⁵ Pillapis paykunata imanayta munanman chayqa, paykunaj siminmanta nina llojsimun rupharanampaj. Pitajchus paykunata sajrata ruwayta munanman chayqa, ajinallatataj wañunan tiyan.

⁶ Kaykunaqa atiyniyoj kanku janaj pachata wisq'anankupaj ama paramunampaj, sut'inchasharqanku chay p'unchaykunapi. Atiyniyojllataj kanku yakusta kamachispa, yawarman tukuchinankupaj; jallp'atapis tukuy ima ñak'ariykunawan nanachinankupaj, mashkha kutitachá munasqankuta.

⁷ Willayta tukojtinkuña, supayqa phiña animal jina, ukhu pacha pujyumanta wicharimuspa paykunawan maqanakonqa, atipanqa paykunata, wañuchenqataj.

⁸ Ayasninkutaj jatun llajtaj plazampi wijch'usqas kanqanku, maypichus Señorninku chakatasqa karqa. Chay llajtaj sutenqa Sodoma, Egipto ima.

⁹ Llajtasmanta, ayllusmanta, tukuy laya parlayniyojkunamanta, jawa runasmanta kajkunaqa, kinsa p'unchay khuskanniyojta paykunaj ayasninkuta qhawanqanku, manataj p'ampakunanta saqenqankuchu.

¹⁰ Jallp'api tiyakojkunataj paykuna jawa qhochukonqanku, kusikonqankutaj paykunapura t'inkasta apachinakuspa. Chay iskay profetasqa jallp'api tiyakojkunata llakichej kanku.

¹¹ Kinsa p'unchay khuskanniyoj qhepatataj, Diospa kachamusqan kausaj espíritun paykunaman yaykorqa, chakisninkuwantaj sayarerqanku. Paykunata rikojkunarí anchatapuni mancharerqanku.

¹² Chantá, janaj pachamanta sinch'ita parlamojta uyarerqanku nejta: Kayman wicharimuychej, nispa. Janaj pachamantaj wicharerqanku phuyupi, enemigosninkutaj paykunata rikorqanku.

¹³ Chay horapitaj manchay jallp'a ikhakuy karqa, llajtaj chunka kaj t'aqantaj urmarqa. Jallp'aj ikhakuynimpitaj qanchis waranqa runa wañorqa, wajkunataj manchariywan janaj pachapi kashaj Diosta yupaycharqanku.

¹⁴ Iskay kaj way tukukunña. Kinsa kaj way usqhayta jamonqa.

Qanchis kaj trompeta

¹⁵ Qanchis kaj angeltaj trompetata waqacherqa. Janaj pachapitaj sinch'i parlaykuna uyarikorqa, nispa: Kay pachapi reinosqa Señorninchejpataña kanku, Cristompatawan. Paytaj wiñay wiñaypaj kamachenqa.

¹⁶ Chay iskay chunka tawayoj kuraj runastaj, Diospa ñaupaqempi tiyanasninkupi tiyasqa kasharqanku, qonqorikuspataj Diosta yupaycharqanku.

¹⁷ Nerqankutaj: Qanman graciasta qoyku, Señor Dios Tukuy Atiyniyoj. Qan kanki, karqankitaj. Atiyniykita jap'erqanki, kamachishankiñataj.

¹⁸ Jatun llajtakuna phiñarikorqanku. Qampa phiñakuyniykipis chayamunña, wañusqakunaj p'unchaynimpis juzgasqa kanampaj; kamachisniyki profetasman, ajllasqasman, sutiykita manchachikojkunaman, juch'uykunaman, jatunkunaman ima t'inkata qopunaykipaj; kay pachata tukuchejkunatapis tukuchinaykipaj.

¹⁹ Templotaj janaj pachapi kicharikorqa, Diospa ruwasqan trato cajontaj rikukorqa templopi. Chaypachataj oqharikorqanku lliuj lliujkuna, qhapariykuna, qhon qhonkuna, jallp'a ikhakuy, manchay granizo ima.