Amós 9 - Qheshwa Biblia DC

Señorpa jasut'iyninmanta ni pi ayqeyta atinchu

¹ Señorta altar patapi rikorqani, niwarqataj: Wasi k'aspista wajtay, punkus thalakunankama, runaspa uman patapitaj urmaykuspa t'unakuchunku, puchojkunatataj espadawan t'ojsispa wañurachisaj; jinamanta mana pipis kanqachu pakakoj, nitaj ayqejpis, jinamanta llusp'inampaj.

² May jina jallp'a ukhumampis pakakuchunku, chaymanta aysarqamusaj may jina patasmampis pakakuchunku, chaymanta wijch'ukamusaj.

³ Carmelo orqo puntamampis pakakamuchunku, chaymampis risaj mask'aj; sichus ukhu mar qochaman pakakamuwanqanku chaypis, qocha ukhupi purej katarita kachaykusaj, chayñataj chinkachinampaj.

⁴ Waj llajtasmanchus enemigosninkunejta apachisqas kanqanku chayqa, chayman espadayta kachasaj wañurachimunampaj. Ñawisniywantaj paykunata qhawasaj mana chinkachispa sajrapaj, manataj allin rinampajchu.

⁵ Tukuy Atiyniyoj Señor Diostaj jallp'ata llankhaykonqa, jallp'ataj unuyarparenqa, chaypi tiyakojkunataj mayta waqanqanku; jallp'ataj oqharikonqataj tiyaykonqataj, imaynatachus Egipto Nilo mayu ashkhayantaj, pisiyantaj, jinata.

⁶ Señorqa janaj pachapi wasinta churan, chay muyurisqa qhosi qhatanatataj jallp'a pataman k'umpuykun; paymin mar qochamanta yakustaqa wajyan, jallp'a patamantaj jich'amun. Chaypataqa Señormin sutenqa.

⁷ Ajinata nin Señorqa: Noqapajqa israelitas etiopeswan ujlla kankichej. Imaynatachus Egiptomanta pusamorqaykichej, ajinallatataj filisteostapis Cretamanta pusamorqani, arameostapis Kirmanta pusamorqani.

⁸ Señorqa qhawamushan kay juchasapa reinota. Chantaqa nintaj: Kay kamachinata kay jallp'a patamanta chinkachisaj; Jacobpa ayllunmanta kajkunallata mana tukuynintachu chinkachisaj.

⁹ Kamachisajtaj Israelpa ayllunmanta tukuynejman suysusqas kanankuta, trigopis suysunapi suysukun jinata, mana uj trigo granollatapis pampaman urmachispa.

¹⁰ Aylluy ukhupi tukuy juchasapas kajkuna espadawan wañuchisqas kanqanku, nejkunaqa: Mana ima sajrapis qhatiriwasunchu, nitaj taripawasunchu.

Israelpa kutiripuynin

¹¹ Uj p'unchay jamushan Davidpa ayllunta urmasqamanta sayarichinaypaj. Davidpa yupaychana wasinta sayarichisaj, lajrasninta llup'aykusaj, pampachasqa kasqanmanta oqharisaj, watejmanta sayarichisaj, imaynachus ñaupajta karqa kikinta.

¹² Edommanta puchojkuna, tukuy llajtasmantawan puchojkuna noqajta karqa, chaypi Israelqa watejmanta llajtachakonqa. Señormin ajinataqa nin, chaytaj junt'akonqapuni.

¹³ Jamushan p'unchaykuna, trigota oqharishallajtinkuraj barbechana p'unchay chayamonqa. Manaraj uvasta ch'irwayta tukushajtinku, ñapis trigo tarpuna chayamonqaña. Chaykamataj vinoqa tukuy orqosta kinraykunasta ima jich'akuspa yaku jina purirenqa.

¹⁴ Chaymanta karu llajtaman wijch'usqamanta Israel aylluyta pusakampusaj. Watejmanta sayarichenqanku t'unasqa llajtankuta, chaypitaj tiyakonqanku; watejmanta uvaskunata plantanqanku, vinotataj ujyanqanku. Chaymanta huertasta ruwanqanku, chaykunapi poqojtataj mikhonqanku.

¹⁵ Chay kikin jallp'ankupi paykunata tiyachisaj, manañataj ni jayk'aj qosqay jallp'ankumanta wijch'usqaschu kanqanku. Ajinatamin nin Señor Diosniykeqa.