Amós 7 - Qheshwa Biblia DC

Langostas rikhurin

¹ Kayta Señor Dios rikuchiwarqa: Pay uywasqa langostasta qhepa tarpuy p'utuyta qallarishajtin, chay tarpuytaj qhepamanraj reypa cosechampaj karqa.

² Chay langostasqa chay chajrasta rukushajtinña noqa nerqani: Señor Dios, juchasniykuta pampachapuwayku. Imaynatataj Jacobpa chhikititan aylluyki ñak'arenqari?

³ Señortaj chay imasta ruwayta mana munarqachu, chayqa mana jinachu kanqa, nispa.

Nina rikhurin

⁴ Kayta Señor Diosqa rikuchiwarqa: Rikorqani nina jap'iykukojta, mar qochachataj ukhukama ch'akerparichejta, jallp'atapis uj cantonta q'olaykushajta.

⁵ Noqataj nerqani: Amaña ari Señor, mañakuyki khuyakuyniykita. Imaynatataj Jacob chhikititan aylluyki ñak'arenqari?

⁶ Señortaj mana munanchu saqeyta, nintaj: Chaypis mana jinachu kanqa, nispa.

Plomada rikhurin

⁷ Señorqa kayta rikuchillawarqataj: Señorqa uj perqa qayllapi kasharqa, makimpitaj jap'ishasqa uj wasi ruwajpa plomadanta.

⁸ Noqamantaj niwan: Amós, imatataj rikunki? Noqataj nerqani: Albañilpa plomadanta, nispa. Paytaj niwarqa: Kunanqa albañilpa plomadanan qhawasaj Israel llajtayta cheqantachus purishan manachus chayta. Manaña kunampeqa juchasninta pampachasajchu.

⁹ Isaacpa sumaj altaresnin thuñisqas kanqanku, Israelpa Diospa yupaychana wasisnin urmachisqas kanqanku. Espadata oqharisaj Jeroboampa ayllumpa contrampi.

Amoswan Amasiaswan parlanku

¹⁰ Betel sacerdote Amasías uj willajta kacharqa Israelpa reynin Jeroboamman, kay jinata nispa: Amosqa, Israel runa, ukhupi purishan qampa contraykita parlaspa. Runasqa manaña paypa parlasqanta uyariyta munankuchu.

¹¹ Payqa tukuynejta purishan kay jinata nispa: Jeroboamqa espadawan wañuchisqa kanqa, tukuy Israel ayllutaj preso waj llajtaman wijch'usqa kanqa.

¹² Chaymanta Amasías Amosta kamacherqa: Profeta, riy kaymanta. Diosmanta willaspa kausayta munanki chayqa, ripuy Judaman, chaypi willamuy.

¹³ Amataj astawan Betelpi Diosmanta willaychu, imaraykuchus kayqa reypa sumaj qhawasqan cheqa, reinoj sumaj kajnin templon.

¹⁴ Amostaj chayman kutichin: Noqaqa mana profetachu kani, nitaj munanichu kayta. Kausanaypajqa ganakuni ovejasta michispa, k'ipa higoskunasta pallaspataj.

¹⁵ Señortaj qhechuwan ovejasta michinayta, niwantaj: Riy sutiypi parlamuy Israel aylluyman.

¹⁶ Chayrayku uyariy Señorpa palabranta. Kaytaqa qanlla nishanki; ama imatapis parlaychu Diospa sutimpi Israelpa contranta, amataj parlaychu Isaacpa miraynimpi contrantapis, nispa.

¹⁷ Kay jinatamin nin Señorqa: Warmiyki llajta chaupipi qhenchachakonqa, qhari wawasniyki, jinataj warmi wawasniykipis wañurachisqas kanqanku espadawan. Jallp'asniykitaj sorteopi rak'ikonqanku, qantaj wañumunki mana cheqan Diospi creejkunaj llajtampi, israelitastaj karu llajtasman presos apachisqas kanqanku jallp'asninkumanta.