Amós 6 - Qheshwa Biblia DC

Israelpa t'unakuynin

¹ Ay, Siompi sumajta kausakojkunamanta! Ay, Samariapi k'achata kausakojkuna, chay llajtapi sumajta kamachejkuna, mayqenkunapichus israelitas atienekunku!

² Calneman riychej, qhawariychejtaj; chaymanta jatun Hamatman riychej, chaymanta filisteospa Gat llajtanman uraykuychej. Qhawaychej, qankunaqa chay llajtasmanta aswan sumajchu kankichej? Qankunaj llajtaykichejqa paykunajmanta aswan sumajchu?

³ Qankunataj sajra p'unchaypi mana umachakuyta munankichejchu. Qankunataj astawan aysashankichej sajra imasta ruwayman.

⁴ Marfilmanta ruwasqa k'ancharishaj sirinaspi winkurinkichej, fiestachakunaykichejpi sumajta mast'arikunkichej; mikhunasta wakichinkichej malta ovejasmanta, wira kaj ternero wakasmantawan.

⁵ Qenata tocarinkichej, mana yachankichejchu imatachus tocasqaykichejta, yuyaychakuspa ruwankichej David jina.

⁶ Jatuchaj copaspi vinota ujyankichej, sumachaj q'apashaj jawinaswan jawikunkichej, manataj dakunkichejchu llajta chinkananmanta.

⁷ Qankuna ñaupajta presos apachisqas kankichej, ajinamanta tukukonqa sumaj mikhunasmanta ch'ajwanaykichejqa.

⁸ Pay kikinmanta Señorqa juran. Tukuy Atiyniyoj Señor Diosqa ajinata nin: Jacobpa ayllun wapuykachasqanta chejnini, palaciosninta mana rikuyta munanichu, enemigosman llajtata jaywasaj, imasninchá tiyan chaytawan.

⁹ Chunka qharis uj wasipi qhepakonqanku chayqa, chunkantin wañunan tiyan.

¹⁰ Imayna jatun manchachikuychus kanqapis, chayrayku mayqen wañusqajtapis ayllun wasi ukhumanta jawaman orqhomojtin, uj nenqa chay ukhupi purejta: Tiyanchu pipis qanwan khuska purej? Chay ujtaj nenqa: Mana; ñaupaj kajtaj nenqa: Ch'in kakuy, pajtá Señorpa sutinta oqharishawaj, nispa.

¹¹ Señorqa jasut'ita apachimonqa jatuchaj wasisman, juch'uychaj wasismanwan, ajinamanta chay wasis thuñispa chinkachisqas kanqanku.

¹² Caballosqa atinkumanchu chhankasta wichariyta? Mar qochataqa atikunmanchu wakasman llank'ayta? Qankuna cheqan kajta venenoman tukuchinkichej. Allin ruwaypa poqoynintapis jayaman tukuchinkichej.

¹³ Qankunaqa qhasi mana kajta kusikunkichej: Atiytaqa kallpanchejwan tarinchej, nispa.

¹⁴ Israelitas qankunaqa allinta qhawakuychej, nispa nin Tukuy Atiyniyoj Señor Diosqa. Noqa sayarichimusaj uj nacionta qankunaj contraykichejta. Paykunataj mana kacharisonqachejchu, qhepamantataj, ñaupajmantataj jark'aykusonqachej.