Amós 4 - Qheshwa Biblia DC

¹ Uyarichej kay palabrasta, sumaj mentasqa warmis, Samaria orqospi tiyakojkuna. Qankuna ñak'arichinkichej wajchasta, pisichikojkunata maqankichej. Qosasniykichejtataj kamachinkichej: Apamuychej vinota, ujyanachejtaj, nispa.

² Señor Dios juran santo kayninrayku: Qhawaychej, jamonqa uj p'unchay, chay p'unchaypitaj presos apasqas kankichej ganchoswan jap'ichisqas, wawasniykichejpis anzueloswan t'islusqas kanqanku.

³ Perqa q'asasninta sinrulla wasaykunkichej, wijch'usonqachejtaj Hermón orqo cheqaman. Ajinata nin Señorqa.

Señorqa phiñasqa parlan

⁴ Riychej Betelman, Gilgalman ima; chaypitaj juchawan yapakamuychej, sayariychejtaj astawan noqaj contraypi, paqarimpi apamuychej rikuchikusta, diezmostataj sapa kinsa p'unchaymanta.

⁵ Mana levadurayoj t'antasta ruphachiychej graciasta qona ofrendata jina, ofrenda qosqaykichejtataj tukuyman willaychej. Chaymin qankunapajqa sumaj. Ajinata nin Señorqa.

Jasut'ishasqapis Israelqa mana yachayta atinchu

⁶ Noqa yarqhayta apachimorqaykichej tukuy llajtasniykichejman; noqa mikhunamanta pisicherqaykichej, tukuy llajtasniykichejpi. Chaywampis qankunaqa mana noqaman kutirimuwankichejchu. Ajinata nin Señorqa.

⁷ Paratapis manallataj parachimporqaykichejchu, kinsa killa junt'ata manaraj cosecha kashajtin. Uj llajtaman parachimorqani, uj llajtamantaj mana; wakin chajraspaj paracherqani, wakimpajtaj mana, chaynejta ch'akipunku yakumanta jina.

⁸ Runastaj llajtamanta llajta rerqanku yakuta mask'aspa manataj tarerqankuchu ch'akiyninkuta thasnunankupaj jina. Qankunataj mana noqaman kutirimuwankichejchu. Ajinata nin Señorqa.

⁹ Q'oñi wayrawan jasut'erqaykichej, chajrasniykichejtapis khuruykucherqani, huertasniykichejta ch'akicherqani, jinallataj uvasniykichejtapis. Langostaswan mikhuracherqani higos sach'asniykichejta, olivo sach'asniykichejta ima. Qankunataj noqaman mana kutirimuwankichejchu. Ajinata ni Señorqa.

¹⁰ Uj jasut'ita apachimorqaykichej imaynatachus Egiptoman apachimorqani jinata; saqerqani wayna runasniykichejta maqanakupi wañuchinankuta; saqerqani enemigos caballosniykichejta apakapunankuta; muskhicherqaykichejtatj wañusqaspa asnasqankuta. Qankunataj mana kutirimuwarqankichejchu. Ajinata nin Señorqa.

¹¹ Jasut'erqaykichej t'unanaykama, imaynatachus Sodomata Gomorratawan jasut'erqani jinata. Nina brasas orqhosqa jina karqankichej. Qankunataj mana kutirimuwankichejchu. Ajinata nin Señorqa.

¹² Chayrayku Israel, qantapis kikinta ruwasqayki, chaytaqa ruwasajpuni. Wakichikuy Diosniykiwan tinkunaykipaj.

¹³ Señormin ruwarqa orqostaqa, jinallataj wayratapis; runamantaj imatachus yuyasqanta rejsicherqa; k'anchay kajta laqhaman tukuchin; jallp'a patasta purejqa; Señor, Tukuy Atiyniyoj Dios: Chaymin sutenqa.