Amós 3 - Qheshwa Biblia DC

Profetaj ruwanan

^1-2 Uyariychej, israelitas, Señorpa nisqanta: Pi ayllustachus Señorqa Egiptomanta orqhomorqa chaykunaman nin: Tukuy kay jallp'a patapi kaj chhika ayllusmanta qankunallata ajllaykichej, chayrayku tukuy juchata ruwasqasniykichejmanta cuentata mañasqaykichej.

³ Iskay khuskallapuni purinku chayqa, uj yuyaylla kasqankurayku purinku.

⁴ León montepi qhaparin chayqa, imachá tiyan jap'inampaj. Uña leoncito qhaparin chaypis, imatachá jap'in.

⁵ Sichus uj p'isqo pampaman urman chayqa, p'isqo jap'inachá karqa chaynejpi. Sichus p'isqo jap'ina pampamanta oqharikun chayqa, imatachá jap'iykun.

⁶ Llajta ukhupi pututu qhaparin chayqa, runas mancharinkupacha; ima sajrapis llajta ukhupi kan chaytaqa, Señormin kachamun.

⁷ Señorqa manamin imatapis ruwanchu manaraj imatapis ñaupajta profetasninman willaspaqa.

⁸ Pitaj mana manchachikuspa kharkanmanchu león qhaparejtinri? Sichus Señor kamachin chayqa, pitaj mana parlanmanchu Señorpa sutimpiri?

Samariaj phirikuynin

⁹ Asdodpa palaciosnimpi, Egiptoj palaciosnimpiwan willamuychej, niychejtaj: Samaria orqosman tantakamuychej, qhawaychejtaj imayna pejtuchus chaypi kasqanta, imaynatatajchus runasta ñak'arichisqankuta.

¹⁰ Señorqa nin: Mana yachankuchu imatapis allinta ruwayta, palaciosninkupitaj kallpawan mithaspa suwasqasninkuta waqaychanku.

¹¹ Chayrayku ajinata nin Señorqa: Uj enemigo muyuykonqa llajtata, urmachenqataj sinch'i perqasniykita, orqhosonqataj palaciosniykimanta.

¹² Ajinatamin nin Señorqa: Imaynatachus uj michej leompa siminmanta qhechun iskay chakista, chayri uj ningrej cantollantaña. Ajinata ayqenqanku Samariapi pisi tiyakojkuna israelitas, chay pikunachus sumachaj camaspi sirejkuna.

¹³ Ajinata nin soldadospa Tukuy Atiyniyoj Diosnin: Jacobpa ayllumpa contrampi ch'ayaykuychej.

¹⁴ Ima p'unchaychus Israelmanta cuentata mañasaj juchata ruwasqasninmanta, chaypacha Betelpa altaresninta phirisaj, wajrasnimpis p'akikuspa pampaman urmanqanku.

¹⁵ Phirita ruwasaj chiri tiempo wasista, q'oñi tiempo wasistapis. Merfilmanta wasista chinkachisaj, jatuchaj palaciostapis t'unasaj. Ajinata nin Señorqa.