Amós 2 - Qheshwa Biblia DC

¹ Ajinata nin Señorqa: Moabmanta runasqa ashkha sajra imasta ruwaspa juchallinku, chayrayku paykunata jasut'isajpuni; paykunaqa Edommanta kaj reypa tullusninta, llamp'u ushphaman tukunankama q'olachinku.

² Chayrayku Moab llajtaman ninata jap'iykuchisaj, jinamanta chay nina Queriotpa palaciosninta chinkachenqa, maqanaku ch'ajwa ukhupi jinataj, pututu waqay ukhupitaj, moabitasqa wañuranqanku.

³ Llajta rikushajtin reyta qhechuspa, sumachaj runasnintawan khuska wañurachisaj. Ajinatamin nin Señorqa.

⁴ Ajinata nin Señorqa: Judamanta kaj runasqa ashkha sajra imasta ruwaspa juchallikunku, chayrayku paykunata jasut'isajpuni; paykunaqa Señorpa yachachiykunasninta qhesacharqanku, manataj kamachisqasninta kasorqankuchu. Manachayqa tatasninku ima lantistachus yupaycharqanku, chaykunallatataj yupaycharqanku.

⁵ Chayrayku Judaman ninata jap'iykuchisaj, chay nina Jerusalempa palaciosninta q'olaykonqa.

Israelpa patampi jasut'i

⁶ Ajinata nin Señorqa: Israelitasqa ashkha sajra imasta ruwaspa juchallikunku; chayrayku paykunata jasut'isajpuni, paykunaqa mana juchayoj qolqerayku vendenku; wajcha runastataj ujut'asrayku vendenku.

⁷ Wajchasta ñak'arichinku, k'umuykachachinkutaj, manataj imatapis cheqanta ruwayta munankuchu pisi yachayniyoj runaspaj. Tatantaj wawantaj uj warmillawan puñuykunku. Ajinamanta llimphu sutiyta ch'ichichanku.

⁸ Prenda jap'isqanku p'achas patapi sirisqas mikhunku, lantikunata yupaychashaspa; qhasillamanta multasta orqhosqankuwan vinota rantinku, diosninkoj wasimpi ujyanankupaj.

⁹ Chaywampis noqaqa ñanta kicharerqani qankunapaj, amorreosta chinkachinaykama wañuchispa. Chaywampis paykunaqa jatuchaj runas karqanku cedro sach'as jina, sinch'istaj roble sach'as jina.

¹⁰ Qankunatataj Egiptomantapacha orqhomorqaykichej, tawa chunka watastataj pusaykacharqaykichej ch'in pampaspi, chay runaspa jallp'asninkuta qankunaman qonayrayku.

¹¹ Israelitasqa, mana niwaychejchu, mana jinachu nispaqa. Qankuna ukhumanta wakinta ajllarqaykichej profetasta wakintataj nazareosta. Ajinatamin sut'inchan Señorqa.

¹² Qankunataj nazareosta kamacherqankichej vinota ujyanankuta; profetastapis sutiymanta parlanankuta jark'arqankichej.

¹³ Kunanqa jallp'ata ikharichisaj chakisniykichej urapi, imaynatachus trigo cargayoj carro jallp'ata kharkatichin ajinata.

¹⁴ Correspapis mana atinkichejchu ayqeyta; aswan kallpayoj kajpatapuni kallpan pisenqa. Mana librakuyta atenqachu sumaj kallpayoj kajpuni.

¹⁵ Flechata jap'ej kajpis mana sayanqachu, mana librakonqankuchu ligero chakiyojkunapis, nitaj caballopi ayqej kajpis.

¹⁶ Chay p'unchaypeqa aswan waputa maqanakoj kajpis, imawanchus maqanasninta ch'uskikuspa q'alalla ayqenqa. Chayta cheqatapuni nin Señorqa.