Abdías 1 - Qheshwa Biblia DC

Edompa k'umuykachachisqa kaynin

^1-2 Señor kayta rikucherqa mosqoypi jina Abdiasman. Uyarerqayku uj willayta Señormanta. Uj willajtaj rerqa willaraj nacionesman: Puririychej! Jakuchej Edompa contrampi maqanakoj! Señor Diosmin Edomman nin: Tukuy naciones ukhupi juch'uysituman tukuchisqayki maytataj k'umuykachachisqayki.

³ Chay wapuykachasqayki ch'aukiyasorqa kausanki chhanka k'ajlluspi tiyakunkitaj pata patasnimpi. Chayrayku creerqanki mana pipis urmachinasunta.

⁴ Águila jinapis pataman oqharikuwaj, ch'askakuna chaypipis thapachakuwaj, chaymantapis urmachimusqayki. Señor nillantaj:

⁵ Sichus suwas jamusunkuman tutapacha suwasoj, mana tukuytachu apankuman, sitajchus uvasta pallajkuna jamunkuman chaywampis wakin ch'ullchutapis saqenkumanraj. Jinapis enemigosniykeqa tukuyninta t'unarparisunku.

⁶ Esaú, imaynatataj kajniykita ch'uskisorqanku! Tukuy qhapaj kayniykita mana puchuyojta suwasorqanku!

⁷ Tukuy qanwan kajkunapis wasanchasorqanku, kikin jallp'aykimanta wijch'usorqanku. Kikin kausaqesnillaykitaj contraykipi churakorqanku, atienekorqanki chay kausaqesnillaykitaj urmanaykipaj tojllata churapusorqanku. Edompataqa mana yuyaynin kanchu!

⁸ Señor nillantaj: Maypachachus Edomta jasut'isaj chaypachaqa chay tukuy yachayniyojkunasninta chinkachisaj yachaynintataj qhechurparisaj chay Esaupa orqosnin chaynejpi tiyakojkunamanta.

⁹ Temán llajtamanta maqanakojkunaqa manchachikuywan kharkatitenqanku, Esaojpa orqosnin chaypi tiyakojkunamantataj mana pipis kausashajqa qhepakonqachu.

Edom llajtaj juchasnin

¹⁰ Qhepakunki q'ala p'enqaywan junt'asqa wiñaypajtaj t'una ruwasqa kanki Jacob hermanoykita sajrawan rikusqaykirayku wañuchisqaykiraykutaj.

¹¹ Qanqa uj ladoman ithirerqanki maypachachus enemigosniyki orqhoshajtinku llajtaj chay qhapaj kaykunasinta. Maypachachus waj llajtayoj soldados Jerusalén llajtaj punkusninta p'akirarqanku puchojtarí rak'inakorqanku, chantá tukuy qhapaj kaynintapis apakaporqanku chaypacha qampis paykuna jinallataj karqanki.

¹² Mana qanqa kusikunaykichu karqa maypachachus hermanoyki llakiypi rikhurerqa chay p'unchaypeqa. Mana llajtanman yaykunaykichu karqa ñak'ariypi kashajtin, nillataj kusikunaykichu karqa may llakiypi rikukushajtin. Manallataj kusikunaykichu karqa Judata rikuspa chay ñak'ariy llakiy p'unchaynimpeqa, nillataj asiykukunaykichu karqa llakiyninkupi.

¹³ Nillataj qhapaj kaykunasninta suwanaykichu karqa chay sinch'i ñak'ariy p'unchay payman chayajtenqa.

¹⁴ Mana sayaykunaykichu karqa chay ñan pasanasnimpi ayqekojkunata wañurachinaykipaj. Nillataj chay ñak'ariy p'unchaypi ayqakojkunata jap'ispa jaywaykunaykichu karqa.

¹⁵ Wajkunata chay kikin ruwasqasniyki jinallatataj qanwampis ruwakonqa. Chay ruwasqasniykiman jina jap'ikapunki! Qallapiñamin kashan tukuy nacionespaj Señorpa p'unchaynenqa.

Israel aylluy jatunchakuynin

¹⁶ Imayna k'allkuchus karqa chay llimphuchasqa orqoypi usqhay usqhayta ujyarqankichej chayqa, ajinallatataj waj nacionespis k'allkuchikuspa qhotumanta qhotu ujyanqanku. Mana ni uj puchuyojtaj chinkachisqas kankichej.

¹⁷ Jinapis, Sión orqoqa uj santo lugar kanqa. Chayman chay puchojkunaqa ayqekunaqanku. Jacob ayllumanta kajkunaqa jallp'asninkuman kutipullanqankutaj.

¹⁸ Jacobpata jinataj Josejpata ayllusninkoqa nina larwashajman jina tukuchisqas kanqanku. Esaojpa ayllunmanta kajkunataj q'opa jina mana chhikan puchuyojta ninawan q'olasqas kanqanku! Ni mayqempis Esaumanta kajkunamantaqa salvakonqachu. Noqa Señor chayta nini.

^19-20 Neguevmanta kajkuna israelitas, Esaojpa chaynejpi chay orqosta jap'ikaponqanku, Sefelamanta kajkunataj filisteospa jallp'asninkuta jap'ikaponqanku. Chantapis jap'ikapullanqankutaj Efraimpa jallp'asninta, Samariaj jallp'asninta, jinataj Benjamimpata kajkuna Galaadta jap'ikaponqanku. Chay chhika wijch'usqasmanta kajkunamanta israelitas cananeospa jallp'asninmanta, Sarepta chaynejkama. Jerusalempi presos kajkunamanta, chay Sefarad chaynejpi jina kashanku. Chaykunamantaqa Neguedpi chay llajtasta jap'ikaponqanku.

²¹ Chay atipajkunaqa Sión orqoman llojsenqanku chaymantapacha juzganankupaj Esaupa chay orqosniyoj lugaresnimpa contrampi, Señorlla kamachenqa.