2 Timoteo 4 - Qheshwa Biblia DC

Diospa palabranta willana

¹ Kayta niyki tukuy sonqowan, mañakuyki Diospa ñaupaqempi, Cristo Jesuspa ñaupaqempi ima. Pay jamonqa kausajkunata, wañusqastapis jamuynimpi reinompi juzganampaj.

² Chayrayku, Diospa palabranta willay tiempompi, mana tiempompipis; jinallataj uyanchay, k'amiy, sonqochay pacienciawan allinta yachachispa.

³ Uj p'unchay jamonqa maypachachus mana munanqankuchu uyariyta, cheqan kajtataj yachachiyta. Manachayqa paykunaj sajra munayninkuman jina yachachejkunata tantanqanku, imaynatachus uyariyta munasqankuta yachachinankupaj.

⁴ Cheqa kajta mana uyariyta munanqankuchu, qhasi mana kaj yachachiykunata uyarisqankurayku.

⁵ Qantaj maychus kajta kausakuy tukuy imapi, llakiykunata apay evangeliota willaraspa. Llank'ayniykita allinta junt'ay.

⁶ Noqaqa rikuchiku jina Diosman jaywasqa kanay tiyan. Wañuyniy qayllapiña kashan.

⁷ Allin tinkupi maqanakuniña, ruwanaytapis tukuychaniña, jinapis creespallapuni kani.

⁸ Chayrayku, noqapaj kaj pilloqa waqaychasqaña kashan. Chaytataj qowanqa Señor, cheqan kaj juez, jaqay p'unchaypi. Manataj noqallamanchu qowanqa, astawanqa jamunan p'unchayta munakuywan tukuy suyajkunamampis.

Timoteollaman parlan

⁹ Usqhaytapuni jamuy watukuwaj.

¹⁰ Demasqa saqerpariwan, Tesalonicamantaj ripun, kay mundoj imasninta munakuspa. Crescentepis Galaciaman rerqa, Titotaj Dalmaciaman.

¹¹ Lucaslla noqawan kashan. Marcosta pusamuway, imaraykuchus payqa, allin yanapanawampaj.

¹² Tiquicota Efesoman kacharqani.

¹³ Jamoj jinataj, Troaspi Carpoj wasimpi saqesqay qhatakunay p'achata, librosniytawan apampuway, astawanqa qarapi escribisqastawan.

¹⁴ Herrero Alejandro ashkha sajra imasta ruwawarqa; paymantaj Señorlla kutichipuchun ruwasqasninman jina.

¹⁵ Qampis allinta paymanta qhawakuy, imaraykuchus anchatapuni yachachisqanchejpa contrampi sayaykukorqa.

¹⁶ Ñaupaj kutita kurajkunaj ñaupaqempi kutichikushajtiy, mana pipis yanapawarqachu, tukuyninkutaj saqerpariwarqanku. Kaymantaqa ama paykunata Dios juchachachunchu.

¹⁷ Chaywampis, Señor noqawan karqa, kallpachawarqataj evangeliota allinta willanaypaj, tukuy mana judiostaj uyarinankupaj. Ajinamanta Señorqa leompa siminmanta kacharichiwarqa.

¹⁸ Tukuy ima sajramanta Señorqa jark'awanqa, waqaychawanqataj janaj pacha reinompaj. Pay yupaychasqa kachun, wiñaypa wiñaynimpaj. Amén.

Pablo napaykun hermanosta

¹⁹ Napaykapuway Priscata, Aquilata, Onesíforoj wasimpi kajkunatawan.

²⁰ Erasto qhepakorqa Corintopi, Trofimotataj saqerqani Miletopi onqosqata.

²¹ Chantá jamuypuni, amaraj chiri tiempo chayamushajtin. Qanta napaykamusunku Eubulo, Pudentewan, Linowan, Claudiawan, tukuy hermanospiwan.

²² Señortaj qanwan kachun. Jinallataj Diospa khuyakuynimpis qankunawan kachun.