2 Timoteo 3 - Qheshwa Biblia DC

Qhepaman sajra runas jamonqanku

¹ Yachanallaykitaj tiyan kayta: Qhepaman sajra p'unchaykuna jamonqanku.

^2-4 Runakuna kanqanku paykuna kikinkuta munakojkuna, qolqeta astawan munajkuna, alabakojkuna, jatunchakojkuna, Diospa contranta rimajkuna, tatasninkuta mana kasojkuna, mana yuyarejkuna, Diosta mana yupaychajkuna, mana khuyakojkuna, mana allinyakuyta munajkuna, qhasimanta tumpajkuna, sajra munaykunata mana atipayta atejkuna, rumi sonqos, allin kajta chejnejkuna, wasanchajkuna, mana kajmanta phiñakojkuna, runaykachajkuna, kay pacha kusikuykunata munakojkuna, Diosta munakunankumanta nisqaqa.

⁵ Chaykunaqa Diosta yupaychajkunaman rijch'akunku, manataj cheqamantaqa Diosta yupaychankuchu. Chaykunamanta t'aqakuy.

⁶ Kaykunamanta wakenqa wasimanta wasi purispa, juchasapa sipaskunata ch'aukiyaspa pusanku. Chay warmisqa imaymana millay munapayaykunawan apaykachasqas kanku.

⁷ Paykunaqa yachashallankupuni, manataj jayk'ajpis cheqa kajta rejsiyta atinkuchu.

⁸ Imaynatachus Janeswan, Jambreswan, Moisesta mana kasuyta munarqankuchu, ajinallatataj kaykunapis cheqa kajta mana kasuyta munankuchu. Sajra yuyayniyoj runas mana feniyojtaj kanku.

⁹ Astawanqa mana ñaupajman rinkumanchu, imaraykuchus tukuy rejsenqanku paykunaqa wampus kasqankuta, imaynatachus rejserqankuña chay iskay runasta, Moisesta mana kasojkunata, ajinata.

Pablo Timoteota yuyaychan

^10-11 Qanqa allinta jap'ikorqanki yachachisqayta. Yachankitaj imaynatachus kausasqayta, imaynatachus ruwayta munasqayta, feniy kallpayoj kasqanta, munakuyniyta, pacienciayta, qhatiykachawasqankuta, ñak'arisqayta ima. Qan yachanki imaynachus riwasqanta Antioquiapi, Iconiopi, Listrapi ima. Yachallankitaj mayta ñak'arisqayta. Chay tukuymantaqa Señorlla jark'awarqa.

¹² Ajinallatataj, tukuy Cristo Jesuspi Diosta yupaychajkunaqa ñak'arinankupuni tiyan qhatiykachasqas kaspa.

¹³ Sajra runas ch'aukiyajkunapis, sajra kasqankumanta, astawan sajrayanqanku, pantaspa, pantachispataj.

¹⁴ Qanrí allinta sayay imatachus yachakusqaykipi, creesqaykipi ima; yachaspa pimantachus yachakusqaykita.

¹⁵ Qanqa, wawamantapacha yachakuyta qallarerqanki ajllasqa Escriturasta. Chaykunataj yachayta qosonqanku, salvacionta tarinaykipaj, fenejta Cristo Jesuspi.

¹⁶ Tukuy Escriturasqa Diospa yuyaychasqan, walejtaj yachachinapaj, uyanchanapaj, k'amispa wanachinapaj, cheqan kajpi yuyaychanapaj ima.

¹⁷ Ajinamanta, Diospa runan atiyniyoj kanqa, sumaj wakichisqataj, tukuy ima allin kajta ruwanampaj.