2 Timoteo 2 - Qheshwa Biblia DC

Jesucristoj sumaj soldadon

¹ Qanqa, wawáy, kallpachakuy, Cristo Jesuspi kashan chay khuyakuywan.

² Imatachus ashkha runa rikushajtin nerqayki, chayta allin ruwajkunaman yachachiy, paykunapis wakichisqa kaspa yachachinankupaj.

³ Qampis noqawan khuska llakiykunata aguantallaytaj ari, Jesucristoj sumaj soldadon jina.

⁴ Pillapis kay jina maqanakupi sayaykojqa, mana kay pacha ruwanasman sat'ikunchu, imaraykuchus allimpi qhawachinan tiyan Cristota, pichus ajllakorqa soldadompaj.

⁵ Manallataj pujllaypi tinkojpis pilluchisqachu kanqa, manachus kamachisqaman jina tinkonqa chayqa.

⁶ Llank'aj runaqa poqoykunata oqharinampaj, ñaupajta llank'ananraj tiyan.

⁷ Kay nisqayta uyariy, Señortaj qosonqa yuyayta tukuy imata yachanaykipaj.

⁸ Jesucristomanta yuyarikuy. Payqa Davidpa mirayninmanta karqa; kausarimorqataj wañusqakunamanta, evangeliota willasqayman jina.

⁹ Chay evangeliorayku ñak'arini wisq'asqa kanaykama, uj sajra ruwaj jina. Diospa palabranrí mana wisq'asqachu kashan.

¹⁰ Chayrayku, tukuy imata aguantani Diospa ajllasqasninta munakusqayrayku, paykunapis salvacionta kusiywan wiñaypaj tarinankupaj Cristo Jesuspi.

¹¹ Kay palabraqa cheqapuni: Payman khuskachus wañunchej chayqa, paywan khuskallataj kausasunchej.

¹² Paywan khuskachus ñak'arisun chayqa, paywan khuskallataj reinopi kamachisunchej. Sichus Cristota qhesachasun chayqa, paypis qhesachallawasuntaj.

¹³ Sichus manaña paypi creesunmanchu chayqa, Diosqa kikillampuni sayan, qosqaykichej nisqanta junt'anampaj, imaraykuchus pay kikinta mana qhesachakuyta atinchu.

Llank'aj runaqa allimpaj rejsisqa

¹⁴ Kay imasta yuyarichiy Señorpa ñaupaqempi k'amispa, ama ima palabra jawapis churanakunankuta. Chayqa mana imapaj walejchu, uyarejkunata astawan pantachispa karunchachin.

¹⁵ K'uchi kaywan Diospaj allimpaj qhawasqa kayta munay, uj llank'aj runa jina, mana imamanta p'enqakuspa; cheqa kaj palabratataj allinta willaspa.

¹⁶ Qhasi mana kaj palabrasta saqey, imaraykuchus chaykunaqa astawan astawan Diosta qhesachachinku.

¹⁷ Palabrankoqa wajkunaman sarna jina chimpan; chaykunamanta kanku Himeneo, Filetowan.

¹⁸ Paykunaqa cheqa kajmanta t'aqakuspa, yachachinku kausarimoyqa ña ruwasqaña kasqanta. Ajinapi wakinkunaj creesqankuta pantachinku.

¹⁹ Diospa cimiento churasqanqa sumajta sayan, kay jina selloyoj: Señorqa paypata kajkunata rejsin. Juchamanta t'aqakuchun pichus Señorpa sutinta oqharejqa.

²⁰ Uj jatun wasipeqa vasos tiyan mana qorillamantachu, nitaj qolqellamantachu; manachayqa tiyallantaj k'ullumanta, t'urumantapis. Wakintaqa allin imaspaj waqaychanchej, wakintataj mana allin imaspaj.

²¹ Ajinaqa, pikunachus kay imasmanta llimphuchakun chayqa, uj sumaj vaso jina allin qhawasqa, ajllasqa Señorpaj, allin imasta ruwanampaj, tukuy imata allinta ruwanampajtaj wakichisqa.

²² Ajinallatataj, waynaspa sajra munapayayninkumantapis ayqey. Cheqa kajtapuni ruway fewan, munakuywan, sonqo tiyakuywan, pikunachus llimphu sonqowan Señorpa sutinta wajyakunku chaykunawan.

²³ Qhasi mana kaj wampu palabrasta qhesachay, yachaspa chaykunamanta churanakuykuna jamusqankuta.

²⁴ Señorpa kamachenqa mana churanakojchu kanan tiyan; manachayqa tukuypaj k'acha, yachachinapaj wakichisqa, pacienciayoj.

²⁵ Llamp'u sonqowan k'amichun contrampi sayaykukojkunatapis. Ichapis chay jinamanta Diosman kutirikunkuman, cheqan kajta rejsinankupaj.

²⁶ Ajinapi supaypa lazo churasqanmanta kacharichikunankupaj, mayqempichus watasqas karqanku munayninman jina.