2 Timoteo 1 - Qheshwa Biblia DC

Pabloj napaykuynin

¹ Noqa Pablo, Jesucristoj apostolnin kani, Diospa munayninrayku, Cristo Jesuspi kausay kasqanrayku Diospa qosqayki nisqanman jina.

² Timoteo, munasqa wawáy, kay cartata escribimuyki. Qanwan kachun Diospa yanapaynin, khuyakuynin, sonqo tiyakuynin, Dios Tatanchejmanta, Señorninchej Jesucristomantawan.

Cristomanta willana

³ Diosman graciasta qoni, pitachus kasuni ñaupa tatasniymantapacha, ch'uwa concienciawan; maypachachus mana sayk'uspa tuta p'unchay, Diosmanta mañakusqaypi qanmanta yuyarikunipuni.

⁴ Munani rikusuyta waqayniykimanta yuyarikuspa, kusiywan sonqo junt'asqa kanaypaj.

⁵ Yuyarikuni tukuy sonqo creesqaykimanta. Ñaupajtaqa abuelayki Loidapis, mamayki Eunicepis creerqanku. Noqa allinta yachani creesqallaykitataj.

⁶ Chayrayku yuyarichiyki, Dios qosorqa chay atiyta ninata jina larwarichinaykita; chay ateyqa qampi kashan, makisniyta pataykiman churasqayrayku.

⁷ Diosqa mana manchachikoj espiritutachu qowarqanchej. Astawanqa atiyniyoj espirituta, munakuyta, allin yuyayniyojtataj.

⁸ Chayrayku ama p'enqakuychu Señorninchejmanta willayta, nitaj noqamantapis payrayku carcelpi wisq'asqa kasqaymantapis. Astawanqa qampis noqawan khuska llakikuy evangeliorayku, Diospa atiyninman jina.

⁹ Pay salvawarqanchej, wajyawarqanchejtaj llimphu kausayman, mana allinta ruwasqanchejraykuchu; astawanqa paypa munakuyninrayku, khuyakuyninrayku ima. Diosqa wajyawarqanchej Cristo Jesuspi, manaraj kay pacha ruway qallarikushajtin.

¹⁰ Kunantaj khuyakuynenqa rikuchisqa Salvawajninchej Jesucristoj rikhurimusqanrayku. Pay wañuyta qhechorqa, kausaytataj sut'iman orqhorqa, evangelionejta manaña wañuy kanampaj.

¹¹ Chay evangelionejta noqapis churasqa karqani willanaypaj, apóstol, yachachejtaj.

¹² Chayrayku ñak'arishani kay tukuy imaspi. Chaymantaqa mana p'enqakunichu, imaraykuchus allinta yachani pipichus creesqayta, atiyniyojtaj kasqanta waqaychanampaj chay imatachus qowasqanta jamoj p'unchaykama.

¹³ Noqamanta cheqa palabrasta uyarerqanki chaykunata, sonqoykipi jap'ikuy fewan, munakuywan, Cristo Jesuspi.

¹⁴ Noqanchejpi tiyakoj Santo Espiritunejta tukuy nisusqayta waqaychay.

¹⁵ Ña yachankiña, Asiamanta kajkuna tukuyninku saqerpariwanku; chaykunamantataj kanku Figelo, Hermógenes ima.

¹⁶ Señor khuyakuchun Onesíforoj wasimpi kajkunata, imaraykuchus payqa ashkha kutista mana p'enqakuspa, carcelpi wisq'asqa kachajtiy kallpachawarqa.

¹⁷ Romapi kashajtiypis mayta mask'awarqa, taripanawankama.

¹⁸ Señorpa khuyakuyninta tarichun jamoj p'unchaypi. Qan yachanki may jinatachus yanapawasqanchejta Efesopi kashaspa.