2 Tesalonicenses 3 - Qheshwa Biblia DC

Diosmanta mañapuwayku

¹ Kunanrí, hermanos, noqaykupaj mañapuwayku, Señorpa palabran tukuynejpi rejsisqa kanampaj, yupaychasqataj, imaynachus qankuna ukhupi karqa ajinata.

² Diosmanta mañapuwayku, chay sajra runasmanta jark'asqa kanaykupaj, imaraykuchus mana tukuychu feniyoj kanku.

³ Cheqamanta Señorqa palabranta junt'ampuni. Pay sayachisonqachej waqaychasonqachejtaj sajramanta.

⁴ Noqaykoqa mayta qankunamanta suyayku Señorpi. Tukuy ima kamachisqaykuta junt'ashankichej; ajinallatataj qhepamampis junt'allankichejtaj.

⁵ Señortaj sonqoykichejta Diospa munakuyninman pusachun, Cristoj jamuyninta pacienciawan suyanaykichejpaj.

Dios kamachin llank'anata

⁶ Kunanqa, hermanos, qankunata kamachiyku Señorninchej Jesucristoj sutimpi, mayqen hermanopis mana allinta purejmanta, kamachisqaykutapis mana jap'ejmanta ima, t'aqakunaykichejta.

⁷ Qankunaqa yachankichej imaynatachus yachaqakunawaykuta; imaraykuchus qankuna ukhupi mana pantasqatachu purerqayku.

⁸ Nitaj pejpa t'antantapis qhasimanta mikhorqaykuchu, astawanqa jump'i suruyta tuta p'unchay llank'arqayku, ama ni mayqenniykichejpaj carga jina kanaykupaj.

⁹ Mana, mana atiyniyoj kasqaykuraykuchu, astawanqa qankunaman uj yachachiyta qonaykurayku, yachaqakunawaykuraykutaj.

¹⁰ Chayrayku qankunawan kashaspa, kayta kamacherqayku: Pichus mana llank'ayta munanchu chayqa, amallataj mikhuchunchu, nispa.

¹¹ Cheqamanta, uyariyku wakinkuna qankuna ukhupi pantasqata purisqankuta, mana imapi llank'aspa, astawanqa tukuy imaman sat'ikuspa.

¹² Chay jina kajkunataqa kamachiyku, k'amiykutaj Señor Jesucristoj sutimpi, tukuy sonqo llank'aspa t'antankuta mikhunankuta.

¹³ Qankunataj hermanos, ama sayk'uychejchu allin kajta ruwaspa.

¹⁴ Pichus kay cartapi nisqaykuta mana kasunmanchu chayqa, paymanta allinta qhawakuychej, amataj paywan tantakuychejchu, ajinamanta p'enqakunampaj.

¹⁵ Chaywampis, paytaqa ama enemigopaj jap'iychejchu, astawanqa hermanota jina k'amiykuychej.

Cartaj tukukuynin

¹⁶ Kikin sonqo tiyakuypa Señornin, qankunaman samakuyta tukuy imapi qochumpuni. Señortaj tukuy qankunawan kachun.

¹⁷ Noqa Pablo, kikin makiywampuni escribimuni napaykuspa. Kay jinamanta sapa uj cartay rejsikun. Ajinata escribini.

¹⁸ Señorninchej Jesucristoj khuyakuynin tukuyniykichejwan kachun. Amén.