2 Tesalonicenses 1 - Qheshwa Biblia DC

Pabloj napaykuynin

¹ Pablo, Silvanowan, Timoteowan ima, Tesalónica llajtayojkunaj iglesianman kay cartata escribimuyku, pikunachus Dios Tatawan, Señor Jesucristowan ima ujchasqas kashanku chaykunaman.

² Sonqo tiyasqa kausakuy, khuyakuytaj qankunawan kachun, Dios Tatanchejmanta, Señorninchej Jesucristomantawan.

Señorpa kutimuynin

³ Qankunamanta hermanos, Diosman graciasta qonaykupuni tiyan, maychus cheqan kasqanman jina; imaraykuchus feniykichej ashkhata wiñashan, jinallatataj sapa ujniykichejpa munakuyniykichejpis, qankuna ukhupi mayta yapakushan, jinallatataj wajkuna ukhupipis.

⁴ Chayrayku noqaykoqa Diospa iglesiasnimpi may kusisqa parlayku qankunamanta; imaraykuchus pacienciakorqankichej qhatiykachasqas, llakisqas kashaspapis.

⁵ Kay imasqa Diospa cheqan juicionta rikuchishanku; qankunarí, chay Diospa kamachiynimpaj ajllasqas kankichej. Chayrayku kay jinata ñak'arishankichej.

⁶ Cheqantaj Diospajqa, qankunata llakichisojkunaman, llakiyllawantaj kutichinanqa.

⁷ Qankunamantaj, pikunachus llakisqas kashankichej chaykunaman, noqaykumanwan khuska samarikuyta qosonqachej; janaj pachamanta Señor Jesús atiynimpi, angelesninwan rikhurimojtin.

⁸ Payqa nina larwaywan rikhurimuspa, juchachanqa Diosta mana rejsejkunata, Señorninchej Jesucristoj evangeliontapis mana kasojkunata.

⁹ Chaykunaqa wiñaypay ñak'arenqanku, Señorpa ñaupaqenmanta qharqosqas, atiynimpa k'anchayninmantawan.

¹⁰ Maypachachus Señor jamonqa ajllasqasninwan yupaychachikoj chaypacha, tukuy creejkuna mayta t'ukonqanku. Qankunataj jaqay p'unchaymanta willasqaykuta cheqamanta creerqankichej.

¹¹ Chayrayku, mañakuykupuni Diosninchej allimpaj jap'isunaykichejta, wajyayninman jina; junt'anantataj tukuy k'acha munayninta, creespa ruwasqaykichejtapis paypa atiyninwan.

¹² Ajinamanta, Señorninchej Jesucristoj sutin qankunapi yupaychasqa kachun, qankunataj paypi, Diosninchejpata Señorninchej Jesucristojtawan khuyakuyninrayku.