2 Samuel 9 - Qheshwa Biblia DC

David Mefi-bosetta khuyapayan

¹ Uj kutipi Davidqa tapurerqa: Saulpa ayllunmanta pillapis kausanrajchu, Jonatampi sutimpi payta khuyanaypaj?, nispa.

² Saulpa uj kamachin Siba sutiyoj karqa, payta wajyarqanku rey Davidman chimpanampaj. Siba jamojtintaj reyqa tapurerqa: Qanchu Siba kanki?, nispa. Sibataj kuticherqa: Arí, noqa kani, reyníy, nispa.

³ Chaypacha reyqa payta taporqa: Saulpa ayllunmanta pipis qhepakunrajchu, payta Señorpa sutimpi khuyanaypaj?, nispa. Sibataj reyman kuticherqa: Uj kanraj, chayqa kashan Jonatampa wawan, payqa chakisninmanta onqoj.

⁴ Reytaj nerqa: Maypitaj kashanrí?, nispa. Sibataj kuticherqa: Lodebar llajtapi, Amielpa wawan Maquirpa wasimpi, nispa.

⁵ Chaypacha Davidqa kamacherqa chay Lodebar llajtamanta apamunankuta.

⁶ Saulpa allchhin, Jonatampa wawan Mefi-bosetqa Davidpa ñaupaqenman chayamuspaqa, payta napaykunampaj k'umuykukorqa. Davidtaj nerqa: Mefi-boset!, nispa. Paytaj kuticherqa: Kaypi kani, qanta sirvisunaypaj reyníy, nispa.

⁷ Davidtaj nerqa: Ama manchachikuychu, noqaqa cheqamanta khuyasqayki, Jonatanta munakusqayrayku. Jatun tataykej Saulpa jallp'asninta kutichipunasunkuta kamachisaj, qantaj noqawampuni mesaypi mikhunki.

⁸ Chaypi Mefi-bosetqa k'umuykukuspa nerqa: Qan reyneyqa, imaraykutaj kay kamachiykita jinata qhawanki, noqaqa uj wañusqa alqowan ninakushajtiypis?

⁹ Chaywampis Davidqa wajyaspa, Saulpa ñaupa kamachin Sibata nerqa: Qopuni uywaqeyki Saulpa allchhinman, imaschus Saulpata jinataj ayllumpata karqa chay tukuy kapuyninta.

¹⁰ Chayrayku qanwan, wawasniykiwan, kamachisniykiwan ima, paypa jallp'ampi llank'ankichej paypaj poqoykunasta jallch'apuspa, ajinamanta uywaqeyki Saulpa ayllun kausanampaj, Mefibosettaj noqawan khuskapuni mikhonqa. Sibajtaqa chunka phishqayoj wawasnin karqa, iskay kunka kamachisnintaj.

¹¹ Sibataj reyman kuticherqa: Qan reyniypa kay kamachiykiman tukuy nisqasniykeqa junt'akonqapuni. Mefi-bosetqa, Davidpa mikhunanmantapuni ujnin wawan jina mikhorqa.

¹² Chay jawaqa Mefi-bosetpataqa uj juch'uy qhari wawan karqa Micaía sutiyoj. Siba, jinataj tukuy wasimpi tiyakojkunapis Mefi-bosetpa kamachimpi karqanku.

¹³ Mefi-bosetqa Jerusalempi tiyakorqa, reywan khusqapunitaj mikhoj, payqa iskaynin chakisninmanta onqoj karqa.