2 Samuel 8 - Qheshwa Biblia DC

Davidpa maqanakusqasnin

¹ Chaymantataj Davidqa filisteosta atiparqa, tukuy jallp'ankuta atiynin uraman churaspa.

² Ajinallataj moabitasta atipallarqataj, paykunataqa kamacherqa pampapi sirinankuta, chantá uj q'aytuwan miderqa: Pischus q'aytuwan iskay midisqas ukhupi kajkunaqa wañuchisqas kananku karqa, chay q'aytuwan uj midisqa ukhupi kajkunataj kausanankupaj karqa. Ajinamanta moabitasqa Davidpa kamachiynimpi karqanku, paymantaj tasata pagananku karqa.

³ Davidqa atipallarqataj Hadad-ezerta, payqa karqa Rehobpa wawan, Sobaj reynin. Davidqa Hadad-ezerta atiparqa Eufrates mayu chaynejman jallp'anta kutichikapoj rishaspa.

⁴ Chaykunamanta Davidqa presocharqa waranqa qanchis pachajniyoj caballopi maqanakojkuna soldadosta, jinataj chakillapi purejkuna soldadosmantataj iskay chunka waranqasta, chay jawaqa carrosta qhatatasharqanku chay caballospa chakisninkuta p'akirpararqa, pachaj carrospaj jinalla caballosta puchorqa.

⁵ Chaymantaqa Damascomanta sirios chayamorqanku Sobaj reynin Hadad-ezerta yanapaj, Davidqa siriosta atipallarqataj, paykunamanta iskay chunka iskayniyoj waranqata wañuchispa.

⁶ Chaymantataj Davidqa soldadosninta churarqa Damasco jallp'a Siriapi, jinamanta siriospis paypa kamachisnin karqanku, tasatataj pagaj kanku. Ajinata ari, Señorqa, Davidtaqa atipachillarqapuni maymampis rejtenqa.

⁷ Chaymanta Davidqa, Hadad-ezerpa yanapajkunasnimpa qori escudosninkuta jap'ikaporqa, Jerusalenmantaj aparqa.

⁸ Ajinallatataj jap'ikaporqa Beta llajtapi, jinataj Berotaipi ashqha bronce kasharqa chaykunata, chay llajtasqa rey Hadad-ezerpata karqanku.

^9-10 Maypachachus Hamat llajtaj reynin Toi yacharqa, David rey Hadad-ezerpa soldadosninta atipasqanta, chaypacha wawan Joramta kacharqa apachispa qolqemanta, qorimanta, broncemantawan ruwasqa imasta, napaykuchinampaj allin ruwasqanta nichinampajtaj rey Davidman, pay maqanakupi rey Hadad-ezerta atipasqanmanta. Toipis maqanakullapitaj Hadad-ezerwan kasqanrayku.

^11-12 Davidtaj chay tukuy imastaqa Señorpaj t'aqarqa chay qolqestawan qoristawan t'aqasqasña karqanku chaykunatawan khuska. Chaykunaqa jamorqanku tukuy kamachiynimpi kaj nacionesmanta: Siriamanta, Moabmanta, Amonmanta, filisteosmanta jinataj amalecitasmantapis, jinallataj Sobaj reynin Rehobpa wawan Hadad-ezermanta qhechusqasnintapis.

¹³ Davidqa may uyarisqa karqa. Siriosta atipasqanmanta kutimushajtintaj, wañuchillarqataj chunka pusajniyoj waranqa edomitasta Kachi Valle nisqapi.

¹⁴ Chaymantaqa qhawaj soldadosta churallarqataj tukuy Edom jallp'aman, edomitastaj Davidpa kamachiyninman yaykorqanku, ajinamanta Señorqa, Davidta atipachillarqapuni mayllamampis rejtenqa.

Davidpa yanapajkunasnin

¹⁵ Davidqa tukuy Israelpi kamacherqa, justiciawan cheqan kajwantaj ruwaspa tukuy ayllumpaj.

¹⁶ Soldadosta kamachejqa Sarviaj wawan Joab karqa, Ahiludpa wawan Josafattaj reypa qhelqerin karqa.

¹⁷ Ahitobpa wawan Sadoc, chantá Abiatarpa wawan Ahimelec imaqa, sacerdotes karqanku. Seraiastaj qhelqerin karqa,

¹⁸ Joiadaj wawan Benaiataj cereteospa, peleteospa qhawaj soldadospatawan kamachejninku karqa. Davidpa wawasnintaj sacerdotes karqanku.