2 Samuel 7 - Qheshwa Biblia DC

Diosqa nin Davidta bendicinanta

¹ Rey Davidqa ñapis palacio wasimpiña kashajtenqa, Señor saqesqa chay qayllasnimpi kaj enemigosninwan allillampi kausakunanta,

² Chaypacha rey Davidqa profeta Natanman nerqa: Qhaway, noqaqa sumaj cedromanta ruwasqa palacio wasispi tiyarikushani, Diospa trato ruwasqa cajonnintaj toldollapi kakushan.

³ Natantaj kuticherqa: Ruwallay tukuy imatachus yuyanki chayta, Señorqa qanwampuni kashan.

⁴ Chay ch'isipachataj, Señorqa Natanman nerqa, kay jinata:

⁵ Riy, parlamuytaj kamachiy Davidwan, willaytaj noqa Señor payman nisqayta: Mana qanchu noqapajqa uj yupaychana wasita ruwanki, chaypi tiyakunaypaj.

⁶ Egiptomanta orqhomorqani israelitasta chaymantapacha kunankama, mana ruwasqa yupaychana wasispichu tiyakorqani, manachayqa purerqani toldollapi.

⁷ Paykunawan purisqaymantapachaqa, mana israelitasmantaqa ni mayqen kurajkunasninkumampis, piskunatachus noqa ajllarqani Israel aylluypi kamachinankupaj, mana ni mayqenninkuman mañarqanichu cedromanta uj yupaychana wasita ruwapunawankutaqa, nispa.

⁸ Chayrayku kamachiy Davidman niy, noqa Señor Tukuy Atiyniyoj nisqayta: Noqa orqhomorqayki ovejasta campopi michisharqanki chaymanta, Israel aylluypa kamachejnin kanaykipaj.

⁹ Tukuy puriyniquykipi qanllawampuni karqani, enemigosniykita tukucherqani, sumaj uyarisqa runa kanaykitataj ruwani, kay pachapi may mentasqa runasta jina.

^10-11 Chay jawaqa wakichillanitaj uj lugarta Israel aylluypaj, chaypitaj churani kikin jallp'ankupi tiyakunankupaj, mana pipis paykunawan chejninakunampaj, nitaj chay sajra ruwaj runaspis ñaupajpi jina llakichisunaykichejpaj, maypachachus Israel aylluypi kamachejkunata churashajtiy jinataqa. Noqa kacharichisqayki tukuy enemigosniykimanta. Willachimuykitaj mirayniyki kananta.

¹² Maypachachus kausayniyki tukukapojtin, wañupunkitaj chaypachaqa, mirayniykimanta kajllatataj rey kanampaj churasaj, reinontataj sayachisaj.

¹³ Payqa uj yupaychana wasita jatarichipuwanqa, noqataj wiñaypaj reinonta sayachisaj.

¹⁴ Noqa, paypaj uj tata kasaj, paytaj waway kanqa, imapi juchallikuwajtimpis, noqa jasut'isaj imaynatachus uj tataqa wawanta jasut'in jinata.

¹⁵ Chaywampis khuyakuyniytaqa paymanta mana ithirichisajchu, imaynatachus Saulmanta ithiricherqani jinataqa, payta t'aqarqani qanta cuentanmanta churasunaypaj.

¹⁶ Mirayniykita reinoykitawanqa Noqa waqaychasaj wiñaypaj, ajinallatataj reinoykipis wiñaypaj qhepakonqa.

¹⁷ Natanqa kay tukuyta Davidman willarqa, kikin imaynatachus rikusqanta, uyarisqantapis.

¹⁸ Chaypacha rey Davidqa Señorman parlanampaj, Señorpa ñaupaqenman rerqa, nerqataj: Señor, pitaj noqa kasqani, pitaj aylluypis kasqa, kaykama qan chayachimunawaykipajrí?

¹⁹ Qanmanqa pisimanraj rijch'asunki kay tukoyqa, qanqa kamachiykej jamoj mirayninmantapis parlallankitaj! Mana pipis qan jina ruwajqa kanchu Señor!

²⁰ Imastawantaj niykiman Señor? Qanqa kay kamachiykitaqa rejsinkiña Señor Diosníy.

²¹ Tukuy kay t'ukuna imastaqa qan ruwarqanki, niwasqaykiman jina munasqaykiman jinataj, chay tukuyta noqa yachanaypaj.

²² Chayraykuman jatunchasqa kanki Señor Diosníy! Imaraykuchus mana pipis qan jinaqa kanchu, manataj qanmanta jawaqa waj diosqa kanchu, noqayku kikiyku uyarisqaykuman jinaqa.

²³ Israel aylluyki jinaqa, mana waj llajta pay jina kanchu tukuy kay pachapeqa? Qan Diosníy, aylluyki kanampaj kacharicherqanki, may uyarisqa kanantataj ruwarqanki, payrayku may t'ukuna k'acha imasta ruwaspa. Egiptomanta kacharicherqanki, chay aylluykej ñaupaqenmantataj qan wijch'orqanki chay waj nacionesta dioskunasnintawan.

²⁴ Imaraykuchus qan nerqanki Israelqa wiñaypaj aylluyki kananta, qantaj Señorníy, Diosninku kanaykita.

²⁵ Ajinaqa Señor Diosníy, qan ari wiñaypaj sayachiy imastachus kamachiykiman mirayninmampis nisqaykitaqa, junt'aytaj chay nisqaykiman jina.

²⁶ Sutiykeqa jatunchasqapuni kachun, nichunkutaj Tukuy Atiyniyoj Señorqa Israelpa Diosnin kasqanta! Kamachiyki Davidpa miraynenqa makiykipi sinch'i kap'isqa kachun!

²⁷ Qan, Tukuy Atiyniyoj Señorniy sut'inchawanki mirayniyta sayachinaykita, chayrayku kamachiyki kashaspapis kayta mañarikuyki.

²⁸ Qan Señor, Diosníy kanki, parlasqasniykitaj cheqapuni kanku, kay kamachiykiman chay jina k'acha imasta ninki.

²⁹ Yuyarikuy ari bendiciyta kay kamachiykej mirayninta, qampa makisnillaykipipuni kanankupaj. Qan, Señor Diosníy niwarqanki, chay bendicionesniykiwantaj kamachiykej miraynenqa wiñaypaj bendicisqa kanqa.