2 Samuel 5 - Qheshwa Biblia DC

David kamachin Israelpi, Judapiwan

¹ Aswan qhepata Israelmanta tukuy ayllus tantakorqanku Hebrompi, chaypitaj Davidwan parlarqanku kay jinata: Noqaykoqa yawar masiyki kayku.

² Cheqamanta, Saúl reyniyku kashajtimpis, qampuni Israeltaqa tukuy maqanakusnimpi pusaykacharqanki. Chay jawaqa, Señor qanman nisorqa pusaykachanaykita kamachinaykitataj tukuy Israel ayllutaqa, nispa.

³ Chaypacha Israelmanta tukuy kurajkunas rerqanku parlarqankutaj Hebrompi rey Davidwan, paytaj uj tratota ruwarqa jamorqanku chay runasninwan, Señorpa ñaupaqempi. Chaypacha Davidta umanman aceitewan jawispa ajllarqanku tukuy Israel ukhupi rey kanampaj.

⁴ Davidqa kinsa chunka watasniyojña karqa rey jina kamachiyta qallarinampajqa, tawa chunka watastaj kamacherqa.

⁵ Hebrompeqa Judá aylluta qanchis wata sojta killayojta kamacherqa, chaymantataj Jerusalempi kamacherqa Israel aylluta jinataj Judá ayllutapis kinsa chunka kinsayoj watasta.

David jap'ikapun jark'achasqa Sión llajtata

⁶ Rey David runasninwan khuska Jerusalenman kachaykukorqanku, chaypi tiyakojkuna jebuseo runaswan maqanakamunankupaj. Chay jebuseostaj mana yuyarqankuchu David chay llajtaman yaykunanta, chayrayku nerqanku: Qanqa mana yaykuyta kay llajtaman atinkichu, ciegosllaraj chayri wist'usllaraj qharqoyta atisonqankupuni, nispa.

⁷ Chaywampis Davidqa sinch'i jark'achasqa Sión llajtata jap'erparerqa, chayrayku kunankama Davidpa llajtan nisqa kashan.

⁸ David, chay kutipi nisqa: Tukuy pischus jebuseosta wañurachej yaykojqa, yaku larq'anta yaykuspa wañurachimuchun chay ciegosta jinataj wist'u chakista ima, chaykunata sinch'ita chejnisqayrayku, nispa. Chaymantapachataj nej kanku: Ni ciegos nitaj wist'uspis Señorpa yupaychana wasinman yaykuyta atinkuchu, nispa.

⁹ Chaymantataj Davidqa jark'achasqayoj chaynejpi tiyakaporqa, chaytataj Davidpa llajtan nispa suticharqa. Muyuyninmantaj perqasta jataricherqa, Milo chaynejmantapacha palacio wasikama.

Hiramqa, Davidman kachan parlapayamojkunasninta

¹⁰ Davidtaj astawan atiyniyojman tukusharqa, Dios Tukuy Atiyniyoj Señor paywan kasqanrayku.

¹¹ Chayrayku Tiroj reynin Hiramqa kacharqa runasninta parlapayamunankupaj, chay jawa kachallarqataj, k'ullusta llajllaj runasninta, jinataj rumi ch'eqoj runasnintapis. Chaykunataj cedro k'ullusta apaspa Davidpa palacio wasinta ruwarqanku.

¹² Chaypacha Davidqa cheqamanta yacharqa Señor payta Israelpa reynin kanampaj churasqantapuni, tukuy imapitaj yanapashasqanta astawan jatunyachinampaj reinonta, Israel ayllunta khuyasqanrayku.

Jerusalempi nacekojkuna Davidpa wawasnin

¹³ Hebronmanta, Jerusalenman jampusqanmantaña, Davidqa waj warmiswan ima casarakullarqataj, wakinwantaj tantakullarqa, chay warmispitaj astawan qhari wawasnin jinataj warmi wawasnimpis kallarqankutaj.

^14-16 Jerusalempi nacejkuna wawasnimpa sutisninku karqanku: Samúa, Sobab, Natán, Salomón, Ibhar, Elisúa, Nefeg, Jafía, Elisama, Eliada, Elifelet ima.

David atipan filisteosta

¹⁷ Maypachachus filisteosqa David Israel ayllupi reypaj churasqa kasqanta yachaytawan, chaypacha tukuyninku Davidta mask'aj kachaykukorqanku. Davidtaj chayta yachaspa chay jark'achasqa chaynejman riporqa.

¹⁸ Chaypacha filisteosqa astawan ñaupajman rispa Refaim pampasman junt'aykorqanku.

¹⁹ Chayraykutaj Davidqa Señorta tapurerqa kay jinata: Filisteoswan maqanakoj riymanchu? Paykunawan maqanakojtiyrí, atipachiwankimanchu?, nispa. Señortaj payman kuticherqa: Arí, rillay maqanakoj, noqa atipachisqayki paykunata, nispa.

²⁰ Davidtaj, Baal-perazimman chayaspa, paykunata atipaykorqa. Chayrayku David nerqa: Uj ashkha yakuwan jina Señorqa enemigosniy ukhupi ñanta kicharipuwan, nispa. Chay lugartataj Ball-perazimta suticharqa.

²¹ Chay jawari filisteosqa lantisninkuta saqerpayarqanku, Davidwan runasninwantaj chaykunata oqharerqanku.

²² Chaywampis filisteosqa watejmanta Refaim pampasman junt'aykamullarqankutaj.

²³ Watejmanta Davidqa Señorta tapullarqataj, chaypitaj Señor kuticherqa: Maqanakuspaqa, ama ñaupajmanta yaykunkichu, manachayqa chay bálsamo sach'asnejman chayaspañaqa, muyuykuspa chay qhepapi kay soldadosninkunejta yaykunki.

²⁴ Maypachachus uyarinki sach'as patanejpi thaskisqasta jina, chaypacha maqanakuman yaykunki, chay niyta munanqa noqa Señor ñaupaqeykita rishasqayta filisteospa soldadosninta wañurachispa.

²⁵ Davidtaj Señorpa nisqanman jina ruwarqa, filisteostataj atipaykorqa Gabaón llajtamantapacha Gezer llajtakama.