2 Samuel 24 - Qheshwa Biblia DC

David yupachin ayllumpi runasta

¹ Señorqa sinch'ita phiñakullarqataj israelitaspa contrankupi, paykunaj contrankupitaj Davidta Señorqa yuyaycharqa, kamachispa Israel aylluta, Judá ayllutawan yupananta.

² Chaypacha reyqa Joabwan kasharqa, payqa soldadosnimpa kamachejnin karqa, reytaj payman kamacherqa: Tukuynin Israel ayllusta purimuy Dan chaymantapacha Beersebakama, chay runastataj yupamuy, noqa yachanaypaj mashkhachus tukuypi kasqankuta.

³ Joabtaj reyman kuticherqa: Qan reyniypa Señor Diosnenqa, uj pachaj jinatawan aylluta mirachichun kunan kasqanmanta nisqaqa, qan reyniytaj kausanki chayta rikunaykipaj. Niway, imapajtaj qan reyneyqa yupachiyta munankiri?

⁴ Chaywampis reypa kamachisqanqa aswan atiyniyoj karqa, Joabpamanta jinataj soldadosta kamachejkunamanta nisqaqa, chayrayku Joabqa jinataj soldadosta kamachejkunapis reypa ñaupaqenmanta ithiriporqanku, Israel aylluta yupamunankupaj.

⁵ Jordán mayuta chimpaspa Aroer llajtamanta qallarerqanku, chay valle chaupipi kasharqa chay llajtamanta, Gat, jinataj Jazer cheqanejpi kasharqa chaymanta.

⁶ Chaymantataj Galaadman chantá Gadesman ima rerqanku, chay hititaspa jallp'ankuman. Chaymantataj Danman chayarqanku, Dan chaynejmantataj Sidón chayninta muyuykamorqanku.

⁷ Chaymantataj rerqanku jark'achasqa Tiro llajtaman, heveospata chantá cananeospata tukuynin llajtasninkumanwan, Judamanta uranejmantaj llojsimorqanku, Beerseba chaynejman.

⁸ Isq'on killa iskay chunka diasniyojpi tukuynin jallp'ata muyumuytawankama Jerusalenman chayamorqanku.

⁹ Joabqa reyman jaywarqa mashkhachus runas chay yupasqankuman jina kasqanta, yachakorqataj Israel ayllupeqa tukuynimpi kasqankoqa pusaj pachaj waranqa qharis maqanakuman rinankupaj jina, Judá ayllupitaj phishqa pachaj waranqa qharis kasqanku.

¹⁰ Davidtaj juchallisqanta reparakorqa ayllumpi runasta yupachisqanrayku, Señormantaj juchanta willakorqa: Sinch'ita juchallini kay imasta ruwaspaqa. Chayrayku Señor, mañarikuyki kay kamachiykej juchanta perdonanaykita, noqaqa uj wampu jina ñaupaqeykipi ruwarqani.

^11-12 Q'ayantin paqarintaj, David jatarikushajtin, pitachus David tapurikoj, chay profeta Gadman Señorqa nerqa: Riy, Davidwan tinkumuy, nimuytaj kay kinsa imasta qoyta munasqayta, munasqantataj ajllakuchun, chayta ruwanaypaj.

¹³ Gadqa Davidman rispa tapurimorqa: Imatataj munanki, kay jallp'api qanchis wata yarqhaytachu, chayri kinsa killa junt'ata enemigosniykimanta ayqeykachaytachu, chayri kinsa p'unchaykunasta kay jallp'aman onqoy jamunantachu? Unanchay, niytaj kunan imatachus kachamuwajman kutichinaypaj.

¹⁴ Davidtaj Gadman kuticherqa: Jatun llakiypi kashani. Jinapis walej kanman kikin Señorpa mkisninman urmanayku, Paypa khuyakuynin may jatun kasqanrayku, amataj runaj makisninman urmanaykupaj.

¹⁵ Chaypacha Señor apachimorqa Israelman uj onqoyta chay paqarinmantapacha mayk'ajkamachus kanan karqa chaykama, Dan chaynejmantapacha Beersebakama qanchis chunka waranqa runas wañorqanku.

¹⁶ Maypachachus angelqa Jerusalén llajtata tukuchinampaj kashajtintaj, Señor llakikorqa chay jina llakiyta ruwachishasqanrayku, Señortaj kamacherqa: Ayllumanta kajkunata wañurachisharqa chay angelta: Chaykamalla, saqellayña!, nispa. Chay ratoqa Señorpa angelnenqa kasharqa jebuseo Arauna maypichus trigota trillasharqa chaynejpi.

¹⁷ Runasta wañurachisharqa chay angelta rikuspa Davidqa Señorman nerqa: Noqamin kani juchallejqa! Noqamin chay juchata ruwajqa kani! Kay ovejasrí imatataj ruwarqankuri? Noqa mañayki chay jasut'iykeqa noqaman chantá familiay patamantaj jamunanta.

Davidqa uj altarta jatarichin

¹⁸ Chay kikin diallataj Gadqa Davidta watukoj rerqa, nerqataj uj altarta Señorpaj jatarichinanta maypichus jebuseo Arauna trigota trillasharqa chaynejpi.

¹⁹ Chaypacha Davidqa ruwamorqa profeta Gad imatachus nisqanta, Señorpa kamachisqanman jina.

²⁰ Araunaqa qhawarispa rikorqa reyta chay runasnintawan ima jamushajta pay chaynejman. Chaypacha Araunaqa ñaupaykurispa reypa ñaupaqempi k'umuykorqa.

²¹ Araunaqa nerqa: Imaraykutaj qan reyneyqa, kay kamachiykita watukoj jamushankiri?, nispa. Davidtaj kuticherqa: Maypichus trigota trillasharqanki chayta rantikapuyta munayki, chaynejpi Señorman uj altarta jatarichinapaj, kay ayllunchej ukhumanta onqoy llojsipunampaj.

²² Araunataj kuticherqa: Qan, reyníy, jap'illay maynejllatapis, jaywaytaj imachari allin rijch'asunki chayta. Kaypi tiyan toros ñak'aspa q'olachinapaj, trigo wayrachina k'aspispis, kallantaj kay yuntaspata yugosnimpis, chaykunaqa walej kanman llant'apaj.

²³ Kay tukuyta qan reyniyman qopuyki! Chay jawaqa Araunaqa nillarqataj: Chay jaywasqaykeqa Señor Diosniykipaj allin kachun!

²⁴ Chaypitaj reyqa kutichillarqataj: Mana imarayku jap'iymanchu. Rantisunaypuni tiyan tukuy valesqanta pagasuspa, mana jaywaymanchu Señor Diosniymanqa, mana ni mashkha valewasqan q'olachinataqa. Jinamanta Davidqa chay lugarta ranterqa jinataj chay torostapis phishqa chunka qolqeswan.

²⁵ Chaypitaj Davidqa, Señorpaj uj altarta jataricherqa, chaypi uywasta q'olachispa jaywarqa, jinataj allinyakunapaj nisqa ñak'asqa uywastapis. Chaypacha Señorqa uyarerqa aylloj mañakusqasninkuta, chay onqoytaj Israel ayllu ukhumanta chinkaporqa.