2 Samuel 23 - Qheshwa Biblia DC

Davidpa qhepa kaj parlasqasnin

¹ Kaykunamin kanku Davidpa qhepa kaj parlasqasnenqa: Isaejpa wawan David, pitachus mayta Dios jatunyacherqa, pitachus Jacobpa Diosnin ajllarqa, Israelpa misk'i takiykunasninta takejnin, kay jinata nin:

² Señorpa Espíritun noqanejta parlan; palabrasnenqa qalluypi kashan.

^3-4 Israelpa Diosnin parlan; Israelpa waqaychajnin niwan: Pichus kamachenqa runasta justiciawan, pichus kamachenqa Diosta manchachikuypi, sut'iyaymanta k'anchay llojsimoj jina kanqa, mana phuyusniyoj paqarimpi intej k'anchaynin jina, para pasayta qhorata wiñachej, ajina kanqa.

⁵ Chayrayku mirayneyqa Diospi sinch'i sayasqa kashan. Payqa noqawan uj wiñay tratota ruwarqa, sumaj cheqan ruwasqa sumaj segurasqataj. Pay tukuynin atipayta qowan, tukuy munasqasniy imastataj junt'achimpuni.

⁶ Tukuy sajra ruwaj runastaj khiskas jina qhesachasqas kanqanku, manataj pipis makinwan jap'iykunchu.

⁷ Jap'iykunankupajqa, fierrowan, chayri lanzawan jap'inanku tiyan ninamantaj wijch'uykunku tukuyninta q'olanankama.

Davidpa soldadosninmanta wapu kaj runasnin

⁸ Davidpa aswan allichaj kaj soldadosnimpa sutisnenqa kaykuna kanku: Hacmonita Is-boset, payqa kinsa aswan wapus kajkunamanta ujnin kaj karqa; uj kutipi pusaj pachaj runasta lanzanwan wañucherqa.

⁹ Qhepantaj, ahohíta Dodoj wawan Eleazar karqa, paypis chay kinsa aswan wapus kajkunamanta ujnin kajllataj karqa. Paykunaqa Davidwan kasharqanku maypachachus filisteos maqanakupaj tantasqas kashajtinku, chaypitaj paykunalla maqanakoj sayaykorqanku, israelitastaj karunchakorqanku.

¹⁰ Payqa mana iskayrayaspa maqanakullarqapuni, filisteostataj wañuracherqa makin sayk'unankama, makin espadanman k'askaykunankama. Chay diapi Señorqa uj jatun atipayta qorqa. Chaymantataj soldadosqa Eleazarta qhaterqanku chay enemigosninkoj imasninta jap'ikapunankupaj.

¹¹ Eleazarpa qhepantataj ararita Agej wawan Sama karqa. Filisteos maypachachus Lehi llajtapi tantakorqanku, lentejas tarpusqa kasharqa chay campopi, chaypacha israelitasqa ayqerqanku paykunamanta.

¹² Samataj chay tarpusqa chaupipi sayaykukuspa jark'arqa, jinamanta filisteosta atipaykuspa. Ajinamanta Señorqa jatun atipayta chay día qorqa.

¹³ Uj kutipirí, chajra oqhariy tiempopi, kinsa chunka kurajkunamanta kinsa ukhu Davidwan tinkukoj rerqanku Adulam nisqa jusk'upi, filisteosmanta soldados Rafaim valle chaypi jarasqas kashajtinku.

¹⁴ Davidqa jark'achasqa cheqapi kasharqa, maypachachus filisteospa uj t'aqa soldadosnin Belempi kasharqanku chaypacha.

¹⁵ Chaypacha Davidqa imatachus munasqanta parlarikorqa: Imaynapichus pillapis yakuta jaywariwanman Belén llajta punkupi kashan chay pujyumanta!, nispa.

^16-17 Chaypacha kinsantin wapu runasqa filisteospa jarankuman yaykuspa yakuta orqhomorqanku, Belén llajtaman yaykunapi kasharqa chay pujyumanta, Davidman apanankupaj. Davidtaj ujyayta mana munarqachu, mana chayqa jich'arqa, Señorman ofrendata jina jaywaspa, kayta nispa: Señor jark'awachun kay yakuta ujyanamanta! Ujyayman chayqa kay runaspa yawarnintapis ujyayman jina kanman, kay yakutaqa kausayninkuta wañuyman churaspa apamorqanku! Manataj ujyayta munarqachu. Kaytaqa chay kinsa wapu runas ruwarqanku.

¹⁸ Sarviaj wawan, Joabpa hermanon Abisaitaj chay kinsa chunka runaspa kamachejninku karqa. Uj kutipeqa maqaj sayaykorqa lanzanwan kinsa pachaj runasman, wañuracherqataj.

¹⁹ Ajinamanta chay kinsa chunka runas ukhupi uyarisqa karqa, payqa kamachejninku karqa, chaywampis manapuni chay kinsa wapus kajkunamanqa jap'ikorqachu.

²⁰ Cabseel llajtamanta; uj runa kallarqataj Joiadaj wawan, Benaía sutiyoj, chaypis wapu runa kaspa t'ukuna imasta ruwarqa. Moabmanta Arielpa iskaynin wawasninta pay wañucherqa. Uj kutitaj maypachachus rit'isharqa chaypacha uraykorqa uj t'oqoman, chay ukhupitaj uj leonta wañucherqa.

²¹ Wañuchillarqataj uj jatun sayayniyoj egipcio runata lanzanwan armasqa kashajtin. Benaíaqa k'aspiwan chimpaykuspa chay lanzanta qhechurparerqa makinmanta, chay kikin lanzallanwantaj wañurparicherqa.

²² Joiadaj wawan Benaiaqa, kayta ruwaspa may uyarisqa karqa chay kinsa chunka runas ukhupeqa.

²³ Chay ukhupi aswan uyarisqa karqa, chaywampis manapuni chay kinsa wapu kajkunaman jap'ikorqachu. Davidtaj payta churarqa payta qhawaj soldadosta kamachinampaj.

²⁴ Kinsa chunka wapu runas ukhumantaqa karqanku: Joabpa hermanon Asael, Belenmanta Dodoj wawan Elhanán;

²⁵ Harod llajtamanta Samawan, Elicawan;

²⁶ paltita Helespis; Tecoa llajtamanta Iquespa wawan Irapis;

²⁷ Anatotmanta Abiezerpis; Husah llajtamanta Sibecaipis;

²⁸ ahotita Salmompis; Netofa llajtamanta Mahraipis;

²⁹ Baanaj wawan Helebpis, chaypis Netofallamantataj karqa; Benjamimpa jallp'an Gabaamanta Ribaejpa wawan Itaipis;

³⁰ Piratonmanta Benaíapis; Gaas mayumanta Hidaipis;

³¹ arbatita Abi-albompis; Bahurinmanta Azmavetpis;

³² saalbonita Eliabapis, jinataj Jasempa wawasninmanta Jonatampis;

³³ ararita Samapis; Sararpa wawan Ahíampis, paypis araritallataj karqa;

³⁴ Maacamanta Ahasbaipa wawan Elifeletpis; Gilomanta Ahitofelpa wawan Eliampis;

³⁵ Carmel llajtamanta Hezraipis; arbita Paaraipis,

³⁶ Soba llajtamanta Natampa wawan Igalpis; Gat llajtamanta Banipis;

³⁷ Amonmanta Selecpis; Beerotmanta Naharaipis, payqa Sarviaj wawan Joabpa yanapajnin karqa;

³⁸ Jatirmanta Irawan, Garebwampis;

³⁹ hitita Uriaspiwan. Tukuyninkupi kinsa chunka qanchisniyoj karqanku.