2 Samuel 22 - Qheshwa Biblia DC

Davidpa atipasqanmanta takiy

¹ Davidqa kay takiyta Señorman takerqa, maypachachus Señor librarqa Saulpa makisninmanta jinataj enemigosninmantapis chaypacha.

² Kay jinata nerqa: Señor, qanllamin pakawajniy chhankaqa kanki, pakakunay lugartaj, kacharichiwajniytaj.

³ Diosníy, pakakunay chhanka, jark'akunay, atiyniyoj salvawajníy, aswan patapi kaj pakakunay, aswan patapi kaj ayqeykunay, salvawajníy, Qanlla salvawarqanki sinch'i llakiykunamanta!

⁴ Qanllata Señor jatunchasqayki. Qanta wajyakusojtiy, enemigosniymanta salvawanki.

⁵ Wañoyqa qhollchuqeyayninwan mayt'uykuwan; mancharikorqanitaj chay chhika wañuchejkuna jamuwajtinku.

⁶ Wañoyqa waskhasnimpi ch'ipaykuwarqa. Wañuypa tojllasnimpi rikhurerqani!

⁷ Llakiyniypi Señorta wajyakorqani, Diosniymanta yanapata mañakorqani, Paytaj yupaychana wasinmantapacha uyarimuwarqa, qhaparisqasneyqa ningrisninman chayarqanku!

⁸ Chaypacha uj sinch'i jallp'a ikhakuy karqa; janaj pachaj cimientosnin kharkaterqanku, Señorpa phiñakuyninrayku kuyuchisqas karqanku.

⁹ Senqanmanta q'osñi llojsimoj, siminmantataj wañuchikoj nina llojsimoj; siminmantarí larwashaj brasasta wijch'umoj!

¹⁰ Janaj pachakunata ladeyacherqa, uraykamorqataj. Chakisnin urapitaj manchay laqha phuyus karqa!

¹¹ Lijrasniyoj querubinman lloq'aykuspataj phawarqa; wayraj lijrasnin patapi phawaykacharqa.

¹² Maqanaku toldota jina churakorqa muyuynimpi kasharqa chay laqhayaykunasta, yakusniyoj yana phuyustapis.

¹³ Uj sinch'i k'anchay ñaupaqenmanta llojserqa; larwashaj carbonestaj paramorqanku.

¹⁴ Señor, patapi jatun Diosqa, janaj pachamantapacha uyarichimorqa qhon qhon jina parlayninta.

¹⁵ Wach'inasninta kacharerqa, lliuj lliujkunasnintapis, enemigosniytataj tukuynejman ch'eqeracherqa.

¹⁶ Mar qochej ukhupachampis q'alalasqa rikhurerqa; kay pachaj ura k'uchusnimpis rikuchisqa karqa; Señorpa qhapariyninwan manchachikuspa, sinch'i phukuyta senqanmanta kacharisqanwan.

¹⁷ Diosqa makinta janaj pachamantapacha jaywamuwarqa, makinwantaj jatun mar qochamanta orqhowarqa.

¹⁸ Atiyniyoj enemigosniymanta salvawarqa, chejniwarqanku chaykunamanta, noqamanta aswan kallpasniyoj kajkunamanta.

¹⁹ Noqa sinch'i llakiypi kashajtiy maqaj jamuwarqanku, chaywampis Señor noqata yanapawarqa.

²⁰ Kacharichispa ch'usaj lugarman orqhowarqa. Munakuwasqanraykutaj salvawarqa!

²¹ Señorqa t'inkata qowarqa, cheqanta kausasqayman jina.

²² Noqa qhaterqani Señorniypa ñanninta; mana jayk'ajpis Diosniymanta t'aqakorqanichu!

²³ Tukuy kamachisqasnin ñaupaqeypipuni kashanku. Mana jayk'ajpis leyesninmanta pantarqanichu!

²⁴ Paypa ñaupaqempi mana ima juchayoj purerqani; jucha ruwaymanta karunchakuni.

²⁵ Señor t'inkachiwan cheqanta purisqayrayku, Paypa ñaupaqempitaj llimphuta kausasqayrayku.

²⁶ Qanqa Señor, khuyakojtaqa khuyakullankitaj, cheqa sonqoyoj runawanqa qampis cheqallantaj kanki.

²⁷ Llimphu sonqoyojpajqa llimphullataj kanki, pichus llulla sonqoyojtataj allin yachayniykiwan qhawanki.

²⁸ Qan salvanki llamp'u sonqosniyojkunata, wapuykachajkunatataj allinta qhawanki, k'umuykuchinkitaj.

²⁹ Qan, Señoríy, k'anchayniy kanki; qan, Diosníy, laqhayaypi k'anchaykuwanki.

³⁰ Yanapayniykiwan enemigoyta maqaj yaykusaj, Diosniywantaj llajtasnimpa perqasninta wasaykusaj.

³¹ Diospa ñannenqa allin cheqanmin; Señorpa nisqasnenqa atienikunapaj jinapuni. Dios waqaychan tukuy paypi suyajkunata.

³² Pitaj Dios, Señormanta jawarí? Pitaj Dios kasqa chhanka jina waqaychanawanchejpajrí?

³³ Diosniymin atiyniyoj kallpachawajneyqa, Paylla mana k'aminata purichiwan,

³⁴ Paymin chakisniyta tarukaj chakisninta jina qowan. Pay patapi sinch'ita sayachiwan.

³⁵ Paymin maqanakunaypaj yachachiwan. Paymin kallpata qowan broncemanta arcosta mat'ita aysanaypaj.

³⁶ Qan waqaychawanki, salvawankitaj, k'acha kayniyki jatunyachiwan.

³⁷ Qanmin ñanniyta ñaupaqeypi pampachapuwanki, chakisniypis mana misk'ankuchu.

³⁸ Enemigosniyta qhatiykorqani, t'unararqanitaj, tukuyninkuta tukuchisparaj kutimporqani.

³⁹ Chinkacherqani! T'unararqanitaj! Manaña sayarikorqankuchu: Chakisniy uraman urmarqanku!

⁴⁰ Qan kallpata maqanakupi qowarqanki; chay enemigosniyta ñaupaqeyman k'umuykucherqanki.

⁴¹ Qan enemigosniyta ñaupaqeymanta ayqecherqanki; ajinamanta chejnikuwajkunata tukucherqani.

⁴² Yanapata mañakorqanku, manataj pipis yanaparqachu; Señorman wajyakorqanku, paytaj mana uyarerqachu.

⁴³ Ñut'u jallp'ata jina kutarqani! Sarurarqani ñan patapi t'uruta jina!

⁴⁴ Qan kacharichiwarqanki aylluy ukhupi maqanakusmanta. Nacionespa kamachejnillampuni kanayta munarqanki, mana rejsisqasniy runastaj sirviwarqanku.

⁴⁵ Uyariytawankama kasuwanku; mana rejsisqas runas wayllukuwanku.

⁴⁶ Waj llajtayoj runas mancharikunku, pakakusqasninkumanta kharkatispa llojsimunku.

⁴⁷ Jatunchasqa kachun Señor! Waqaychawajneyqa bendicisqa kachun! Jatunchasqa kachun, salvawaj, waqaychawaj Diosneyqa!

⁴⁸ Payqa noqaman kutikuspa vengakoj Dios, nacionesta kamachiy uraman churan.

⁴⁹ Pay enemigosniymanta librawan, contraypi oqharikojkunamanta aswan pataman churawan. Qan Señor, sajra runasmanta kacharichiwanki!

⁵⁰ Chayrayku naciones ukhupi yupaychayki, sutiykimantaj takiykunasta takini.

⁵¹ May chhika atipaykunasta kay ajllakusqayki reyman qonki; munakuywampunitaj wiñaypaj rikunki Davidta tukuy miraynintintapis.