2 Samuel 21 - Qheshwa Biblia DC

Gabaonitaspa vengakuyninku

¹ Davidpa tiemposnimpi kinsa wata junt'ata uj yarqhay karqa. Chaypacha Davidqa Señorta tapurerqa, Señortaj kuticherqa: Chay yarqhayqa jamun Saúl jinataj ayllumpis yawarta jich'asqankurayku, paykunaqa gabaonitasta wañuracherqanku.

² Davidqa gabaonitasta wajyaspa paykunawan parlarqa. Gabaonitasqa mana Israel ayllumantachu karqanku, manachayqa amorreosmanta puchojkuna karqanku, chaykunawantaj israelitasqa juramentota ruwasqanku, chaykunatataj Saulqa, Israelmanta kajkunapaj jinataj Judá ayllumanta kajkunapajwan allinta ruwayta munaspa tukurachiyta munarqa.

³ Davidtaj paykunata tapurerqa: Imatataj qankunarayku ruwaymanrí? Imaynapitaj qankunata llakiyta ruwasusqaykichejta allinyachiymanri, jinamanta Señorpa ayllunta bendicinaykichejpaj?

⁴ Gabaonitastaj kuticherqanku: Saulwan, aylluntinwan ch'ajwaqa mana qolqemantachu, nitaj qorimantachu, nillataj mayqen israelita wañunantapis munaykuchu. Davidtaj paykunaman nerqa: Niwaychej ari imatachus munankichej qankunarayku noqa ruwanayta.

⁵ Paykunataj kuticherqanku: Chay runaqa chinkachiyta munawarqayku, wakichikorqataj tukuchiwaykuta munaspa amaña kay Israel jallp'api tiyakunaykupaj.

⁶ Chay runaj ayllunmanta munayku qanchis qharista qonawaykuta, noqaykutaj chaykunata Señorpa ñaupaqempi warkhusqayku, Señorpa ajllasqan rey Saulpa Gabaa llajtampi. Reytaj nerqa: Qosqaykichej, nispa.

⁷ Chaywampis Davidqa, Saulpa allchhin, Jonatampa wawan Mefi-bosetta khuyarqa, paywan Jonatanwan Señorpa ñaupaqempi purajmanta uj juramentota ruwanakusqankurayku.

⁸ Chaywampis presosta jap'icherqa Ajaj warmi wawan Rizpaj iskaynin wawasninta, chay wawastaj Saulpaj karqa, Armoni jinataj Mefi-boset sutisniyoj, ajinallatataj jap'icherqa Saulpa warmi wawan Micalpa phishqa qhari wawasninta, chay wawasnenqa karqa Meholamanta Adrielpaj.

⁹ Chaykunatataj Gabaompi tiyakojkunaman jaywaykorqa, chaykunarí Señorpa ñaupaqempi chay orqo patapi sipirarqanku. Ajinamanta wañorqanku ujllapi qhanchisnintin runas, chay cebada oqhariykuna qallarikushajtin jina.

¹⁰ Chaypacha Ajaj wawan Rizpaqa qhashqa khatata jap'ispa uj chhanka pataman mast'aykukorqa. Chaypitaj qhepakorqa cebada oqharikuymantapacha paray tiempo chayamunankama, jark'aspa tukuy p'isqos chay ayasman p'unchaypi ama tiyaykunankupaj, jinallatataj ch'isimpis sajra monte animales ama qhayllanankupaj.

¹¹ Saulpa tanta warmin, Ajaj wawan Rizpa imatachus ruwasqanta Davidman willamorqanku.

¹² Chaypacha Davidqa rispa Saulpa tullusninta jinataj wawan Jonatampa tullusninta oqharimorqa, chaykunataj kasharqanku Galaadpi Jabes llajtayojkunaspa atiyninkupi. Paykunaqa suwamorqanku Bet-san plazamanta, maypichus filisteos warqhorqanku, Saulta Gilboapi atipaykuspa.

¹³ Chaymantaqa David kamacherqa Saulpata Jonatampatawan tullusninta apamunankuta, jinataj chay sipisqas karqanku chaykunajpatapis.

¹⁴ Saulpa tullusninta jinataj Jonatampatapis p'amparqanku Saulpa tatan Cispaj p'ampana covachampi, benjamimpa jallp'ampi, Zela nisqa llajtapi. Tukuy imataj ruwakorqa rey kamachisqanman jina. Kaymanta qhepamantaj Diosqa chay jallp'ata khuyakorqa.

Abisaeqa Davidpa kausayninta salvan

¹⁵ Filisteos watejmanta Israelpa contrampi oqharikorqanku. Chaypacha Davidqa chay yanapajkunasnin ima paykunawan maqanakoj llojserqanku. Davidtaj sinch'ita sayk'urparerqa.

¹⁶ Uj jatun runataj Isbi-benob sutiyoj Davidta wañuchiyta munarqa. Chay runaj lanzanqa kinsa kilos khuskanniyojmanta astawanraj pesarqa, chumpimpitaj uj mosoj espada kasharqa.

¹⁷ Sarviaj wawan Abisaitaj Davidta yanapaj rerqa, chay filisteotataj wañurparicherqa. Chaypacha Davidpa runasnenqa mañarqanku amaña paykunawan khuska maqanakoj rinanta, jinamanta Israelpa k'anchaynin ama wañunampaj.

Jatuchaj runaswan maqanaku

¹⁸ Chaymantataj Gob llajtapi filisteoswan uj maqanaku kallarqataj. Chay kutipeqa Sibecai husatitaqa Safta wañurparicherqa, chayqa jatuchaj runaspa mirayninmanta karqa.

¹⁹ Waj maqanaku filisteoswan Gob llajtapi kallarqataj, chaypachaqa Belenmanta Jairpa wawan Elhanán, Gatmanta Goliatta wañucherqa, chay Goliatpa lanzanqa sinch'i jatun karqa, puntanqa awanaj bola k'aspin chhikampuni.

²⁰ Gatpi uj maqanaku kallarqataj. Chaypi kallarqataj uj jatun runa iskay chunka tawayoj dedosniyoj, sojtakama sapa chakimpi, jinallataj sojtakama sapa makimpi. Chay runapis jatuchaj runakuna ayllullamantataj karqa.

²¹ Payqa israelitaspa contranta sayaykorqa, Davidpa hermanon Simeajpa wawan Jonatantaj wañucherqa.

²² Kay tawa jatuchaj runasqa Gat jallp'amanta Refaj mirayninmanta karqanku, chaykunatataj Davidwan yanapajkunasninwan ima wañucherqanku.