2 Samuel 20 - Qheshwa Biblia DC

Sebaj oqharikuynin

¹ Chaypacha Gilgal llajtapi kasharqa Benjamimpa ayllunmanta uj sajra sonqoyoj runa Seba sutiyoj: Payqa Bicrej wawan karqa. Chay Sebaqa tukuy aylluta oqharicherqa pututu waqachispa, nerqataj: Noqanchejqa mana parteyojchu nitaj chayaqeyojchu kanchej Isaejpa wawan Davidwanqa! Israelmanta runas, wasisniykichejman ripuychej!

² Israelmanta kaj tukuynin runasqa Davidta saqerparerpa rerqanku, Bicreg wawan Sebata qhatinankupaj. Judamanta kajkunataj Jordán mayumantapacha Jerusalenkama reyman kutisqallapuni kasharqanku.

³ Davidqa Jerusalempi palacionman kutipuspa chay chunka tanta warmisninta palaciota qhawanankupaj saqerqa, chaykunata uj wasiman wisq'aykucherqa soldadoswan qhawachispa. Chaypi mikhunamanta qhawallarqapuni, chaywampis manañataj ujtawan paykunawanqa puñuykorqachu. Ajinata chay warmisqa wisq'asqa qhepakorqanku, kausaspa warmi sapas jina wañupunankukama.

⁴ Chaymantataj reyqa Amasata kamacherqa: Judamanta kaj runasta wajyamuy, kinsa p'unchaymantawantaj qaypi paykunawan kanayki tiyan, nispa.

⁵ Amasataj Judamanta kajkunata tantamoj rerqa, chaywampis payman rey nisqan p'unchaymanta astawan qheparikorqa.

⁶ Chaypacha Davidqa Abisaiman nerqa: Sebaqa Absalonmanta astawanraj llakiykunasta qowasunchej. Chayrayku soldadosniyta pusariykukuspa qhepanta kachaykukuy, pajtataj llusp'iwasunman wakin jark'achasqa llajtasta tarispa.

⁷ Sebata qhatej rerqanku Joabpa runasnin, palaciopi qhawajkuna cereteos peleteos ima, chanta chay aswan allichaj kaj soldadospiwan, Jerusalenmanta llojserqanku Abisaiwan khuska.

⁸ Gabaompi jatun chhanka chaynejpiña kashajtinkuri, Amasa paykunata taripaj llojserqa. Joabqa maqanakuna p'achanta churasqa kasharqa, uj chumpiwan sumaj chumpisqa, uj ladompitaj vainampi espadayoj, chaytaqa orqhoyta atej uraman aysaspalla.

⁹ Chaypachataj Joabqa Amasaj sunkhasinmanta paña makinwan jap'erqa much'anampaj, tapurerqataj: Walejchu risunki hermanóy?, nispa.

¹⁰ Amasaqa mana qhawarikorqachu Joab makimpi espadata jap'ishasqantaqa. Jinallamanta Joabqa chaywan wijsampi t'ojsirparerqa, tukuynin wijsantaj thallikamorqa. Wañorqataj Joab mana ujtawan t'ojsejtillan. Chaymantataj Joabwan hermanon Abisaiwan imaqa Bicrej wawan Sebata qhatillarqankupuni.

¹¹ Chaypacha Joabpa ujnin kaj soldadonqa Amasaj ayan chayman qayllaykuspa nerqa: Pipis Joabman Davidmanwan kutisqa chayqa, Joabta qhatichun!

¹² Chaykamataj Amasaqa chay ñan chaupipi yawarnin patapi sunt'ishallarqaraj; chay soldadotaj tukuynin chaynejta rejkuna sayaykukuspa Amasaj ayanta anchata qhawajtinku, ñan cantoman ithirichispa qhataykorqa uj qhatanawan.

¹³ Ñan cantoman ithirichejtintaj, Joabwan tukuy rejkunaqa cheqanta rerqanku Sebata qhatiykunankupaj.

¹⁴ Sebataj pasarqa Israel tukuy ayllusnejta Abel-bet-maaca chaynejkama, Bicrej tukuy ayllusnintaj tantakuspa llajtaman yaykorqanku paypa qhepanta.

¹⁵ Joabpa runasnintaj Abel-bet-maacaman chayaspa, llajtaj perqanmanta qayllampi jallp'ata qolluykorqanku, chaymantapacha llajtaman maqanakoj yaykunankupaj, tukuynin runastaj perqata urmachiyta munaspa llank'asharqanku.

¹⁶ Jinallamanta uj viva warmi llajtaj perqanmantapacha qhaparimorqa: Uyariwaychej! Uyariwaychej! Mañarikuykichej Joabman willaripunawaykichejta chimpamunawanta, imaraykuchus paywan parlayta munani, nispa.

¹⁷ Joab qayllajtintaj chay warmeqa tapurerqa: Qanchu Joab kanki?, nispa. Paytaj kuticherqa: Noqa Joab kani, nispa. Chay warmitaj kuticherqa: Uyariy, kay warmi kamachiyki parlasusqanta. Joabtaj kuticherqa: Uyariyki, nispa.

¹⁸ Chaypacha chay warmeqa niyta qallarerqa: Unayqa nej kanku: Pillapis imallatapis yachayta munajqa tapurikuchun Abelpi, nispa. Ajinamanta ima parlaytapis tukuchaj kanku.

¹⁹ Llajtaykoqa tukuymanta aswan k'acha tiyakoj llajta, mana jayk'aj t'aqakoj Israelpa tukuy imasninmanta. Tukuymanta aswan uyarisqa kajtaj! Jinapis qanqa phiriyta munashanki. Imaraykutaj chinkachiyta munanki Señorpa llajtantarí?

²⁰ Joabtaj cuticherqa: Chaytaqa mana yuyallanipischu! Mana noqaqa yuyanichu chinkachiyta nitaj raqaykunata saqeytapis.

²¹ Chayqa mana jinachu, manachayqa Efraimpa orqosninmanta chay Seba sutiyoj runa, oqharikun rey Davidpa contrampi. Pusamuwaychej pay sapallanta, noqataj kay llajtamanta ithiripusaj. Chay warmitaj Joabman kuticherqa: Kay perqamantapacha umanta wijch'umusqayku.

²² Chay ratopacha chay warmeqa rerqa llajtapi tukuynin runasta yachayninwan umachaj, Sebaj umantataj qholuspa Joabman wijch'uykorqanku. Chaypacha Joabqa putututa waqacherqa, llajtamanta jataripunankupaj, sapa ujtaj riporqanku wasisninkuman, Joabtaj reywan parlaj Jerusalenman riporqa.

Davidpa yanapajkunasnin

²³ Joabqa tukuy Israel ayllumanta soldadosta kamachinampaj karqa, Joiadaj wawan Benaiataj cereteosta, jinataj peleteo soldadosta kamachisharqa.

²⁴ Adoramtaj llank'achinampaj churasqa karqa. Reypa qhelqerintaj Ahiludpa wawan Josafat karqa.

²⁵ Sevataj willaj qhelqerimpaj churasqa karqa, Sadocwan Abiatarwantaj sacerdotes karqanku.

²⁶ Jair llajtamanta Irataj Davidpa sacerdotellantaj karqa.