2 Samuel 2 - Qheshwa Biblia DC

Davidta Judá aylloj reynimpaj churanku

¹ Chay qhepatataj Davidqa Señorta tapurerqa, nispa: Riyta atiymanchu Judamanta mayqen llajtallamampis? Señortaj kuticherqa: Arí, riyta atinki, nispa. Davidqa ujtawan taporqa: Maymantaj risajrí?, nispa. Señortaj kuticherqa: Hebrónman, nispa.

² Chaypacha Davidqa Hebronman rerqa iskaynin warmisninwan, Jezreel llajtamanta Ahinoam warminwan, chantá Carmel llajtapi wañoj Nabalpa warmin Abigail karqa, chaypiwan.

³ Davidqa pusallarqataj paywan kaj runasnintapis, sapa ujta ayllusnintintawan, jinamanta paykunaqa Hebrón llajtaspi tiyakaporqanku.

⁴ Chaymantataj Judá ayllumanta runas chayamorqanku. Chaypitaj Davidtaqa aceitewan umanman jich'aspa, ajllarqanku Judá ayllupi reyninku kanampaj. Davidmantaj willarqanku Galaadpi Jabesmanta kajkuna Saulta p'ampasqankuta.

⁵ Chaypacha Davidqa willajkunata Jabesman kacharqa, kay jinata nichispa: Señor qankunata bendicichun Saúl reyniykichejta khuyakusqaykichejrayku, payta jallp'aykichejpi p'ampaspa.

⁶ Señortaj qankunata qhawachun khuyaywan, mana jayk'aj qankunata qonqaspa. Noqapis qankunapaj allin imasta ruwasaj Saulta p'ampasqaykichejrayku.

⁷ Chaywampis qankunaqa kallpachakuychej, wapuchakuychejtaj. Reyniykichej Saúl wañusqanrayku, Judá ayllumanta kajkunaqa reyninkupaj ajllawanku.

Israelwan Judawan maqanakunku

⁸ Saulpa soldadosnimpa kurajnin Nerpa wawan Abnerqa, Saulpa wawan Is-bosetta Mahanaimman pusarqa.

⁹ Chaypitaj rey kanampaj ajllarqa kamachinampaj kay llajtaspi: Galaadpi, Gesuripi, Jezreelpi, Efarimpi, Benjamimpapi, jinataj tukuy Israel jallp'apipis.

¹⁰ Is-boset maypachachus Israelpi kamachiyta qallarerqa chaypachaqa tawa chunka watasniyoj karqa, iskay watastataj kamacherqa. Judá ayllutaj Davidta reyninkupaj rejsikorqanku.

¹¹ Jinamanta Davidqa Judá ayllu ukhupi kamacherqa qanchis wata sojta killayojta, Hebrón llajtapi.

¹² Chaypacha Abnerqa llojserqa Mahanaim llajtamanta Gabaón llajtaman Saulpa wawan Is-bosetpa soldadosninwan ima.

¹³ Chay jawaqa Sarviaj wawan Joabwan Davidpa soldadosninwan ima Hebronmanta llojsillarqankutaj. Gabaón yaku qocha chaynejpitaj tinkunakorqanku, chay qochaj puraj chimpampitaj sayaykukorqanku, Israelmanta soldadosqa ujnin chimpampi Judamanta soldadostaj chay ujnin chimpampi.

¹⁴ Chaypacha Abnerqa Joabman nerqa: Waynallaraj kajkuna ñaupajta maqanakuman ñaupaqenchejpi llojsichunku, nispa. Joabtaj kuticherqa: Arí, walej kanman, nispa.

¹⁵ Ajinaqa, Benjamimpa ladomanta, Saulpa wawan Is-bosetpamanta kajkuna llojserqanku chunka iskayniyoj qharis, Davidpa runasnin ladomantataj chay chhikallataj llojsimorqanku.

¹⁶ Sapa ujninkutaj chay enemigonkoj umanmanta jap'ispa espadawan t'ojsinakorqanku, jinamanta ujllapi tukuyninku wañorqanku. Chayrayku Gabaompi chay lugarqa Helcat-hazurim sutichasqa karqa.

¹⁷ Chay diapeqa may sinch'ipuni maqanakoqa karqa, Abnerwan Israelpa soldadosninwanqa Davidpa soldadosninwan atipachikorqanku.

¹⁸ Chay maqanakupi kasharqanku Sarviaj kinsantin wawasnin: Joab, Abisaí, Asael ima. Kay Asaelqa campopi taruka jina may sinch'itapuni correj.

¹⁹ Paytaj Abnerpa qhepanta qhatiykorqa mana t'aqakuspa paña ladoman nitaj lloq'e ladomampis.

²⁰ Abner qhepaman qhawarikamuspataj qhaparerqa: Asael, qan kasqankeqa!, nispa. Paytaj kuticherqa: Arí, noqa kani! nispa.

²¹ Chaypacha Abnerqa kuticherqa: Amaña qhatimuwaychu. Walej kanman mayqen kamachi runatapis jap'ispa tukuy kapuyninta jap'ikapunaykipaj. Asaeltaj mana saqespa qhatiykullarqapuni.

²² Abnerqa ujtawan nillarqataj Asaelman: Amaña qhatiwayñachu, manachayqa kutirimuspa pampaman wijch'usqayki! Chaymantarí ima uyaywantaj wauqeyki Joabman qayllaymanri?, nispa.

²³ Asaeltaj manapuni paymanta ithirikorqachu, chayrayku Abnerqa Asaelpa wijsanman lanzampa qhepa puntanta sat'irparerqa wasanman pasachinankama. Asaeltaj chay kikimpi wañusqa choqakorqa. Chaynejman tukuy runa chayaspataj, Asaelpa ayanta qhawanankupaj sayaykurikoj kanku.

²⁴ Joabwan Abisaiwantaj Abnertaqa qhatiykullarqankupuni. Inti yaykuy horastaqa Ama nisqa orqoman chayarqanku, chay orqoqa Gíaj chimpampi kashan, Gabaón ch'in pampaman rina ñan patapi.

²⁵ Chaypi benjaminitasqa Abnerwan tantakorqanku, ujllaman soldadosninkuta tantaykuspataj uj orqo puntanejpi maqanakunankupaj wakichikorqanku.

²⁶ Chaypacha Abnerqa qhaparerqa Joabta, nispa: Manapunichu wañuchinakuyta saqesunchej? Manachu reparanki kayqa qhepaman llakiyllata apamunawanchejtarí? Mayk'ajtaj chay soldadosniyki hermanosninkuta qhatiykuyta saqenankuta kamachinkirí?

²⁷ Joabtaj kuticherqa: Señorpa sutimpi jurayki, manachus ajinata qhaparimuwankiman karqa, soldadosneyqa sut'iyanankama hermanosninkuta qhatiykullankumampuni karqa.

²⁸ Chay rato Joabqa putututa waqacherqa, chantá tukuy soldadostaj sayarqanku, manañataj qhatiykorqankuchu israelitasta, nitaj paykunawan maqanakorqankuñachu.

²⁹ Abner, chay runasninwan khuska chay ch'isintinta Arabá pampanta thaskerqanku. Chay ñannillantapuni rispa Jordán mayuta chimpaspa, Bitronnejta pasaspataj Mahanaimman chayamorqanku.

³⁰ Joabtaj, Abnerta manaña qhatiykacharqachu, tukuy soldadosninta tantaykuspataj watunakorqanku listanejta, chaypitaj yachakorqa chunka isq'onniyoj soldados wañusqankuta Davidpa kajkunamanta, Asaelpiwan ima.

³¹ Davidpa soldadosnintaj kinsa pachaj sojta chunkayoj runasta wañuchisqanku Benjaminmanta, Abnerpata kajkunata.

³² Chay qhepantataj Asaelpa ayantaqa aparqanku Belén llajtaman, tatampa covachan chaypitaj p'amparqanku. Joab, chay runasnin imaqa chay tukuy tutantinta rispallapuni, sut'iyanampaj Hebronman chayarqanku.