2 Samuel 19 - Qheshwa Biblia DC

^1-2 Rey sinch'i llakiyta waqasqanta wawan Absalón wañusqanmanta, chayta Joabman willamorqanku. Jinamanta chay p'unchaypi atipasqankumanta kusikuyninkoqa llakiyman tukorqa.

³ Chay kutimoj soldadospis llajtaman pakayllamanta yaykorqanku, p'enqaywan thaskispa, maqanakumantapis ayqemushankuman jinata.

⁴ Chaykamataj reyqa uyanta qhataykukuspa sinch'ita qhaparisharqa: Absalón wawáy! Absalón wawáy, wawáy!, nispa.

⁵ Chaypacha Joabqa palacionman rispa reyman nerqa: Qan reyniykoqa kamachisniykita p'enqaypi rikhurichinki. Paykuna kausayniykita salvarqanku, qhari wawasniykita, warmi wawasniykita, warmisniykita, tanta warmisniykita ima, chaykunata.

⁶ Kunan qanqa rikuchishawayku, mana imapis dakususqanta kamachejkunasniykimanta, jinataj yanapasojkunamantapis; qanqa munakunki chejnikusojkunata, munakusojkunatataj chejninki. Kunan yachani, qampajqa aswan walej kanman karqa Absalón kausananqa, noqaykutaj tukuyniyku wañuraykuman karqa chayqa.

⁷ Kunan llojsiriy ari, sonqochamuytaj chay kamachisniykita, manachayqa Señorpa sutimpi jurayki, mana uj runallapis qanman kutikojkunamantaqa kunan ch'isi qanwan qhepanqachu. Kaytaj aswan jatun llakiy kanman qampaj, tukuy llakiykunas jamususqankumanta wayna kasqaykimantapacha kunankama nisqaqa.

⁸ Chaypacha reyqa jatarikuspa, llajtaj punkunman rispa tiyakamorqa. Tukuynin ayllutaj punkupi tiyakushasqanta yachaspa, tukuyninku paywan tinkoj rerqanku. Israelitakunamantaqa tukuyninku wasisninkuman ayqesqanku.

David kutipun Jerusalenman

⁹ Tukuynin Israel aylluspitaj runasqa siminakusharqanku, nispa: Rey Davidqa, kacharichiwarqanchej enemigosninchejmanta jinataj filisteosmanta, chaywampis Absalonrayku kay jallp'anchejmanta ayqerqa.

¹⁰ Absalonta reypaj ajllarqanchej chaytaj, maqanakupi wañun. Imatataj suyanchej, rey Davidta mana kutichimunanchejpajri?

¹¹ Chay tukuy Israel ayllumanta parlasqankutaj Davidpa wasinkama chayarqa. Chaypacha Davidqa willacherqa sacerdote Sadocman, Abiatarman ima, kay jinata nispa: Qankuna parlaychej Judá ayllumanta kurajkunawan, tapuychejtaj imaraykuchus qhepakushanku palacioyman mana kutichiwaspa.

¹² Nillaychejtaj mana walejchu qhepapi kanaykichej reyta kutichinaykichejpaj, qankuna kikin aylluymanta kashaspa.

¹³ Kamachillarqataj Amasaman ninankuta: Qanqa yawar masiy kanki, ajinaqa kunananta ñaupajmanqa soldadosniypa kuraj kamachejnin kanki, Joabpa cuentanmanta. Mana nisusqayta junt'asaj chayqa, Señor jasut'iwachun sinch'ita.

¹⁴ Ajinamanta Judá aylloj runaspa sonqonta suwarqa, paykuna tukuyninkutaj uj runa jinalla reyta yanapajkunasnintinta wajyachikamporqanku.

¹⁵ Chaypacha reyqa kutimpuspa Jordán mayukama jamorqa. Chay jawataj Judamanta kajkunaqa reyta taripaj Gilgalman rerqanku mayuta chimpayta yanapanankupaj.

¹⁶ Jinallataj Benjamimpa ayllunmanta, Bahurim llajtamanta Geraj wawan Simeipis, Judamanta runaswan khuska usqhayllata uraykamorqa rey Davidta taripamunampaj.

¹⁷ Paywantaj Benjamimpa ayllunmanta waranqa runas jamorqanku, jinallatataj Saulpa uywaqen Sibapis chunka phishqayoj wawasninwan, iskay chunka kamachisninwan ima rispa Jordán mayuta chayarqanku manaraj rey chayashajtin.

^18-19 Chay mayuta chimparqanku reypa ayllunta chimpachimunankupaj, tukuy nisqanta ruwanankupajpis. Maypachachus rey mayuta chimpanampaj wakichikushajtintaj, Geraj wawan Simeeqa reypa ñaupaqempi k'umuykorqa, nerqataj: Qan reyniymanta mañayki chay juchaymanta qhonqapunaykita, manañataj yuyanaykita Jerusalenmanta llojsimushajtiyki chay sajra kajta contraykipi ruwasqaymanta. Amataj sonqoykipi phiñapayawaychu.

²⁰ Noqa yachakuni juchallisqayta, chayrayku tukuynin José ayllumanta, noqaqa aswan ñaupajta qan reyniyta taripaj kunan llojsimuyki.

²¹ Chaypacha Sarviaj wawan Abisaí nerqa: Simeeqa manachu wañunan kanman, Señorpa ajllasqan reyta maldicisqanmanta?, nispa.

²² Davidtaj kuticherqa: Ni ima ruwanay kanchu qankunawan, Sarviaj wawasnin! Imaraykutaj churanakuwankichejri? Kunan cheqamanta yachani Israelpa reynin kasqayta, kanan p'unchayqa mana pipis Israelpi wañonqachu.

²³ Chaymantataj reyqa Simeiman jurarqa mana wañunanta.

²⁴ Chantá Saulpa wawan Mefi-bosetpis llojsillarqataj reyta taripamunampaj. Rey llojsisqanmantapacha walejlla kutimpunankama, Mefi-bosetqa chaskisninta mana mayllakusqachu, nitaj sunkhasnintapis k'utukusqachu, nillataj p'achasnintapis t'ajsakusqachu.

²⁵ Maypachachus Jerusalenmanta taripaj jamorqa chaypacha reyqa payman nerqa: Mefi-boset, imaraykutaj noqawan mana rerqankichuri?, nispa.

²⁶ Paytaj kuticherqa: Reyníy, kamachiy mana kasuwarqachu, wist'u kasqayrayku kamacherqani uj burrota sinchapunawanta, chayman lloq'aykuspa qan reyniywan rinaypaj.

²⁷ Chaywampis payqa qanman qhasimanta ch'ataykuwan, jinapis qan reyneyqa Diospa angelnin jina kanki, imachus allinta rijch'asusqantataj ruway.

²⁸ Tataypa tukuy ayllonqa, wañunan karqa qampa ñaupaqeykipi reyníy, chaywampis kay kamachiykeqa wajyasqa karqa reyniypa wasimpi qanwan khuska mikhunaypaj. Imatawantaj mañayman qan reyniymantari?

²⁹ Reytaj kuticherqa: Manaña kanchu imapis parlanaqa. Kamachiniña qanwan Sibawan jallp'asta rak'inakunaykichejta.

³⁰ Mefi-bosettaj kuticherqa: Paylla tukuynin jallp'ata jap'ikapuchun. Qan, reyníy, kutimorqanki palacioman walejllata, chay aswan allin noqapajqa kashan, nispa.

³¹ Galaadmanta Barzilaitaj Rogelim llajtamanta uraykamusqa Jordán mayuta reywan khuska chimpanampaj, chaypitaj Davidta kacharpayapunampaj.

³² Payqa allin machuña karqa, pusaj chunka watasniyojña, Mahanaim llajtapi rey kashanankamataj tukuy imaschus faltakojta reyman qorqa, may qhapaj kasqanrayku.

³³ Reyqa chaypacha Barzilaiman nerqa: Jerusalenman noqawan ripuna, chaypi noqa qhawasqayki.

³⁴ Barzilaitaj kuticherqa: Manaña unaytachu noqaqa kausasaj, Jerusalenman qanwan ripunaypajqa.

³⁵ Pusaj chunka watasniyojña kani, manaña yachanichu mayqenchus allin, mayqenchus mana allimpis mikhunasmanta, ujyanasmantapis. Manaña yachayta atinichu misk'ichus q'aymachus kasqantapis, manañataj uyariyta atinichu takejkuna takisqankutapis. Imaraykutaj qampa trabajoykipaj riymanri?

³⁶ Qanwan risaj Jordán mayumanta aswan jaqaynejkamalla. Imaraykutaj qan reyneyqa chay sumaj t'inkata qowankimanri?

³⁷ Reyníy, mañarikuyki saqenawaykita llajtayman kutipunayta, chaypi wañupunaypaj, p'ampakunaypajtaj tatasniypa covachampi. Chaywampis, reyníy, kaypi kashan uj kamachiyki. Chaytaj waway Quimam. Pay richun qanwan, qantaj paypaj ruway imachus allin rijch'asunki chayta.

³⁸ Reytaj kuticherqa: Quimam noqawan jamuchun, paypaj noqa ruwasaj imachus qanman aswan allin rijch'asusqanta. Tukuy mañawasqaykitataj qosqayki.

³⁹ Tukuynin runas Jordán mayuta chimparqanku, reytaj mayuta chimpaspaña uj much'aywan Barzilaimanta t'aqakaporqa, bendicerqataj. Chaypacha Barzilaeqa kutiporqa maypichus tiyakorqa chayman.

⁴⁰ Reytaj Gilgal llajtaman rerqa, Quimamwan khuska, jinataj Judamanta kaj tukuy runaswan, israelitasmanta khuskan jina runaspis paywan rillarqankutaj.

⁴¹ Chaypacha tukuynin israelitas reyta watukoj rerqanku, nerqankutaj: Imaraykutaj Judá ayllumanta kaj hermanosnillayku qan reyniykuta dueñochakunkumanri, paykunallataj qanta qhawaqasunku jinataj wasi aylluykita, tukuy soldadosniykitapis Jordán mayuta chimpachispari?

⁴² Judá ayllumanta kajkunataj israelitasman kuticherqanku: Imaraykuchus reyqa noqaykoj qaylla aylluyku. Imaraykutaj chayllamantaqa phiñakunkichejri? Noqaykutaqa reychu mikhuchiwayku, chayri payqa imatapis noqaykuman qowasqaykuchuri?

⁴³ Israelmanta kajkunataj kuticherqanku: Noqaykojtaqa reypi tiyapuwayku chunka jinaswanraj qankunamanta nisqaqa, Davidpipis qankunamanta astawanraj. Ajina kajtin, imaraykutaj mana kajpaj qhawawaykuri? Manachu noqaykoqa qankunamanta aswan ñaupajta mañarqayku reyninchej kutimpunanta? Chaywampis, Judá ayllumanta kajkunaqa aswan sinch'ita parlarqanku israelitasmanta nisqaqa.